ចិនបដិសេធមិនឱ្យប្រដូចតៃវ៉ាន់ទៅនឹងស្ថានការណ៍អ៊ុយក្រែន
នៅថ្ងៃពុធទី ២៣កុម្ភៈនេះ ចិនបានសម្តែងការខឹងសម្បារយ៉ាងខ្លាំងនឹងពាក្យសំដីរបស់លោកស្រីប្រធានាធិបតីតៃវ៉ាន់ ដែលប្រៀបប្រដូច ការគំរាមកំហែងឈ្លានពានប្រទេសអ៊ុយក្រែនពីសំណាក់រុស្ស៊ី ទៅស្ថានការណ៍កោះតៃវ៉ាន់ ដែលប៉េកាំងគំរាមប្រើកម្លាំងត្របាក់យកវិញ។ សម្រាប់ចិន តៃវ៉ាន់បានធ្វើការប្រៀបធៀបមិនសមហេតុផល។
ចុះផ្សាយនៅថ្ងៃ៖
ស្តាប់ - ០២:០៨
នៅចំពោះមុខវិបត្តិអ៊ុយក្រែន ដែលរុស្ស៊ីទើបប្រកាសទទួលស្គាល់ឯករាជ្យតំបន់អប្បគមពីរនៅភាគខាងកើត ហើយត្រៀមបញ្ជូនកងកម្លាំងទ័ពទៅជួយការពារបើក្រុមមេដឹកនាំផ្តាច់ទឹកដីអ៊ុយក្រែនសុំជំនួយនោះ លោកស្រីប្រធានាធិបតីតៃវ៉ាន់ សៃ អ៊ីងវេន បានប្រកាសនៅថ្ងៃពុធទី ២៣កុម្ភៈ២០២២នេះ ថ្កោលទោសរុស្ស៊ីផង និងបានចេញបញ្ជាឱ្យកងទ័ពតៃវ៉ាន់ពង្រឹងកម្លាំងការពារខ្លួនពីការគំរាមកំហែងរបស់ចិន។ ដោយមិននិយាយឱ្យចំឈ្មោះរបបកុម្មុយនិស្តចិន លោកស្រីសៃអ៊ីនវេន បានអះអាងមានកម្លាំងខាងក្រៅកំពុងសាកល្បងរៀបចំស្ថានការណ៍តាមគំរូនៅអ៊ុយក្រែន និងពង្វក់អារម្មណ៍សង្គមតៃវ៉ាន់ហើយ។
គ្រាន់តែបានឮសេចក្តីប្រកាសរបស់តៃវ៉ាន់ភ្លាម ចិនបានបញ្ចេញប្រតិកម្មដោយមិនបង្អង់។ យកស្ថានភាពអ៊ុយក្រែនមកភ្ជាប់នឹងតៃវ៉ាន់ហើយស្រែកអាសន្នពិតជាមិនសមហេតុផលសោះ។ នេះជាប្រតិកម្មរបស់អ្នកនាំពាក្យក្រសួងការបរទេសចិន ដោយសង្កត់ធ្ងន់ថា តៃវ៉ាន់មិនដូចអ៊ុយក្រែនសោះ ! តៃវ៉ាន់ជាចំណែកមួយរបស់ចិន ដែលមិនអាចកាត់ផ្តាច់ពីចិនបានទេ។ គឺជាការពិតនៃប្រវត្តិសាស្ត្រ និងតាមផ្លូវច្បាប់ដែលមិនអាចប្រកែកបានឡើយ។
តាំងពីឆ្នាំ១៩៤៥មក តៃវ៉ាន់ស្ថិតក្រោមការដឹកនាំរបស់ ក្រុមសាធារណរដ្ឋ ដែលបានរត់ពីដែនដីចិន ក្រោយជ័យជំនះរបស់បក្សកុម្មុយនិស្ត ក្នុងសង្គ្រាមស៊ីវិល នៅឆ្នាំ១៩៤៩។ សម្រាប់សាធារណរដ្ឋប្រជាមានិតចិន ដែលដឹកនាំដោយបក្សកុម្មុយនិស្ត កោះតៃវ៉ាន់ គឺជាដីមួយដុំរបស់ប្រទេសចិន ដែលប៉េកាំងធ្លាប់គំរាមនឹងប្រើកម្លាំងវាយលុកយកវិញ ប្រសិនបើតៃប៉ិហ៊ានប្រកាសទាមទារឯករាជ្យជាផ្លូវការ។ ក្រុងប៉េកាំងបានថែមទាំងបង្កើនសម្ពាធយោធា ការទូត សេដ្ឋកិច្ចកាន់តែខ្លាំងលើតៃវ៉ាន់ តាំងពីឆ្នាំ២០១៦ ពោលគឺតាំងពីលោកស្រី សៃ អ៊ីងវេន ឡើងកាន់អំណាចមក។
ក្នុងវិបត្តិអ៊ុយក្រែន ចិនបានប្រកាន់ជំហរប្រុងប្រយ័ត្នណាស់ ប៉ុន្តែបានផ្តល់ការគាំទ្រច្រើនឡើងៗដល់ប្រធានាធិបតីរុស្ស៊ី លោកវ្លាដេមៀ ពូទីន។ កាលពីដើមខែ ប្រទេសទាំងពីរបានចុះហត្ថលេខាលើសេចក្តីថ្លែងការណ៍រួមមួយ មិនឱ្យអង្គការអូតង់/ណាតូ ពង្រីកសមាជិកភាព និងគាំទ្រតៃវ៉ាន់ត្រឡប់មកស្ថិតនៅក្រោមការគ្រប់គ្រងចិនវិញ។ ចិនបានសម្របខ្លួនជាមួយរុស្ស៊ី ក្នុងសំណុំរឿងអ៊ុយក្រែន ដោយបន្ទោសក្រុមលោកខាងលិចថាមានចរិតដូចសម័យសង្គ្រាមត្រជាក់ និងអំពាវនាវឱ្យក្រុមបស្ចឹមលោកគោរពក្តីព្រួយបារម្ភរបស់រុស្ស៊ីចំពោះបញ្ហាសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ