ពាណិជ្ជកម្ម យុទ្ធសាស្រ្ត និងអ៊ុយក្រែនជាប្រធានបទសំខាន់នៃទស្សនកិច្ចរបស់នាយករដ្ឋមន្រ្តីអង់គ្លេសនៅឥណ្ឌា
នៅថ្ងៃព្រហស្បតិ៍ ទី២១ មេសា នាយករដ្ឋមន្រ្តីអង់គ្លេសលោកបូរីស ចនសុនបានផ្តើមដំណើរទស្សនកិច្ចរយៈពេល ២ថ្ងៃនៅក្នុងប្រទេសឥណ្ឌា។ ពាណិជ្ជកម្ម យុទ្ធសាស្រ្ត និងសង្រ្គាមនៅអ៊ុយក្រែនជាប្រធានបទសំខាន់ដែលលោកបូរីស ចនសុនលើកយកទៅជជែកជាមួយសមភាគីឥណ្ឌាលោកណារិនដ្រា មូឌី។ តែរឿងសង្រ្គាមរុស្ស៊ីឈ្លានពានអ៊ុយក្រែនអាចជាប្រធានបទពិបាកនិយាយសំឡេងតែមួយ ព្រោះក្រុងឡុងដ៏ និងក្រុងញូដែលីមានជំហរមិនដូចគ្នាទេ។
ចុះផ្សាយនៅថ្ងៃ៖
ស្តាប់ - ០២:១០
នាយករដ្ឋមន្រ្តីអង់គ្លេសលោកបូរីស ចនសុនបានផ្តើមទស្សនកិច្ចនាថ្ងៃទី១ ក្នុងថ្ងៃព្រហស្បតិ៍ ទី២១ មេសានៅរដ្ឋហ៊្គូយ៉ារ៉ាតដែលជាស្រុកកំណើតរបស់នាយករដ្ឋមន្រ្តីឥណ្ឌាលោកណារិនដ្រា មូឌី។ នៅទីនោះ លោកបូរីស ចនសុនបានជួបសំណេះសំណាលជាមួយប្រធានរោងចក្រ សហគ្រាស និងបំពេញទស្សនកិច្ចវប្បធម៌ក្នុងស្រុកប្រវត្តិសាស្រ្ត Ahmedabad ដែលប្រជាជនពាក់កណ្តាលមានដើមកំណើតអង់គ្លេស។ បន្ទាប់មកនៅថ្ងៃសុក្រ ទី២២ មេសា លោកបូរីស ចនសុននឹងធ្វើដំណើរទៅកាន់ទីក្រុងញូដែលីដើម្បីជួបសន្ទនាជាមួយលោកណារិនដ្រា មូឌី។
« ទស្សនកិច្ចនេះនឹងពង្រឹងយុទ្ធសាស្ត្រស៊ីជម្រៅរវាងប្រទេសយើងទាំងពីរក្នុងវិស័យពាណិជ្ជកម្ម ការពារជាតិ និងទំនាក់ទំនងរវាងប្រជាជនយើងទាំងពីរ » នេះជាការថ្លែងរបស់លោកបូរីស ចនសុននៅក្នុងសភាអង់គ្លេសមុនពេលចេញដំណើរទៅឥណ្ឌា។ ចំណែកវិមានរដ្ឋាភិបាលអង់គ្លេសបានបញ្ជាក់ពីគម្រោងកិច្ចព្រមព្រៀងវិនិយោគទ្វេភាគីដែលមានតម្លៃប្រមាណ ១ ២០០លានអឺរ៉ូ និងថា គម្រោងកិច្ចព្រមព្រៀងវិនិយោគនេះអនុញ្ញាតឲ្យមានការបង្កើតការងារចំនួន ១១ ០០០ការងារនៅអង់គ្លេស។
បន្ទាប់មក ទស្សនកិច្ចរបស់នាយករដ្ឋមន្រ្តីអង់គ្លេសក៏មានគោលដៅឈានទៅរកភាពជាដៃគូថ្មីនៅក្នុងវិស័យការពារ បញ្ញាសិប្បនិម្មិត ថាមពលបៃតង រួមទាំងកិច្ចព្រមព្រៀងវិនិយោគក្នុងផ្នែកមនុស្សយន្ត រថយន្តអគ្គិសនី និងការបាញ់បញ្ជូនផ្កាយរណប។ តែក្រុងឡុងដ៏ទទួលស្គាល់ថា នៅមានការងារជាច្រើនដែលត្រូវធ្វើដើម្បីអាចមានកិច្ចព្រមព្រៀងទាំងអស់នេះ។ ដោយឡែក សង្រ្គាមរុស្ស៊ីឈ្លានពានអ៊ុយក្រែនក៏ជាប្រធានបទមួយនៃទស្សនកិច្ចរបស់លោកបូរីស ចនសុននៅឥណ្ឌាដែរ។ តែគេត្រូវដឹងថា ក្រុងឡុងដ៏ និងក្រុងញូដែលីមានជំហរខុសគ្នាស្រឡះ។
ខណៈដែលអង់គ្លេសបានថ្កោលទោស និងបន្តដាក់ទណ្ឌកម្មសេដ្ឋកិច្ចប្រឆាំងរុស្ស៊ី ពិសេសផ្តល់អាវុធឲ្យអ៊ុយក្រែន ឥណ្ឌាមិនបានថ្កោលទោសរុស្ស៊ីជាចំហ និងក៏មិនបានចូលរួមថ្កោលទោសរុស្ស៊ីនៅអង្គការសហប្រជាជាតិដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ