ចិន ប្រកាសសាកល្បងដោយជោគជ័យប្រព័ន្ធប្រឆាំងមីស៊ីល
ក្រសួងការពារជាតិចិនបាន ប្រកាសធ្វើការសាកល្បង ប្រកបដោយជោគជ័យ ប្រព័ន្ធប្រឆាំងមីស៊ីលនៅយប់ថ្ងៃទី ១៩ មិថុនា ២០២២ ឆ្លងចូលថ្ងៃទី ២០ មិថុនា២០២២។ នៅក្នុងសេចក្តីថ្លែងការណ៍ អាជ្ញាធរចិនបានបញ្ជាក់បន្ថែមទៀតថា នេះជាដំណើរការសាកល្បងក្នុងកម្មវត្ថុការពារខ្លួន ពុំមានលក្ខណៈដៅប្រឆាំងនឹងប្រទេសណាមួយឡើយ។
ចុះផ្សាយនៅថ្ងៃ៖
ការធ្វើតេស្តសាកល្បងប្រព័ន្ធប្រឆាំងមីស៊ីល បានសម្រេចដូចការគ្រោងទុក ! នេះជាសេចក្តីថ្លែងការណ៍របស់ក្រសួងការពារជាតិចិន ចេញផ្សាយនៅថ្ងៃចន្ទទី ២០មិថុនា២០២២ ដោយបានប្រកាសជាសាធារណៈទៀតថា នេះជាការសាកល្បងប្រព័ន្ធប្រឆាំងមីស៊ីល លើកទី៦ហើយ។ ពីមុនមក បើតាមសារព័ត៌មានផ្លូវការ ចិន ទំនងជាបានចាប់ផ្តើមធ្វើការសាកល្បងប្រព័ន្ធប្រឆាំងមីស៊ីលតាំងពីឆ្នាំ២០១០មកម្ល៉េះ និង ធ្លាប់បានទទួលជោគជ័យចំនួន ៥លើកនៅបន្តបន្ទាប់ពីឆ្នាំ២០១០-២០១៣-២០១៤-២០១៨និង២០២១។
ក្នុងក្របខ័ណ្ឌនៃការធ្វើទំនើបកម្មយោធាដែលជាមហិច្ឆតាដ៏ចំបងរបស់លោកប្រធានាធិបតី ស៊ីជីនពីង ចិនបានពន្លឿនការសិក្សាស្រាវជ្រាវមីស៊ីលគ្រប់ធុន ដែលខ្លះអាចមានសមត្ថភាពកម្ទេច ផ្កាយរណបក្នុងអវកាស ឬជាមីស៊ីលបាលីស្ទិកបំពាក់ក្បាលគ្រាប់នុយក្លេអ៊ែរដ៏ទំនើបបំផុតផង។ ប៉ុន្តែប៉េកាំងកម្រលម្អិតព័ត៌មានទាក់ទងនឹងកម្មវិធីមីស៊ីលរបស់ខ្លួនណាស់។ យូរៗម្តងទើបគេឃើញមានសេចក្តីថ្លែងការណ៍ខ្លីមួយរបស់ក្រសួងការពារជាតិ ឬការជូនដំណឹងតាមរយៈសារព័ត៌មានផ្លូវការប៉ុណ្ណោះ។ សេចក្តីជូនដំណឹងទាក់ទងនឹងការអភិវឌ្ឍប្រព័ន្ធមីស៊ីលចុងក្រោយគេ ប្រព្រឹត្តទៅកាលពីខែកុម្ភៈ២០២១។
ការសាកល្បងប្រព័ន្ធមីស៊ីលប្រព្រឹត្តទៅក្នុងបរិបទនៃភាពតានតឹងជាមួយសហរដ្ឋអាមេរិក។ ចិនក៏ដូចជារុស្ស៊ី ធ្លាប់បានសម្តែងការមិនពេញចិត្តនឹងការបំពាក់ប្រព័ន្ធខែលមីស៊ីលប្រឆាំងមីស៊ីលអាមេរិកលើទឹកដីកូរ៉េខាងត្បូងជាយូរឆ្នាំមកហើយ ប៉ុន្តែនៅក្នុងសេចក្តីថ្លែងការណ៍ថ្ងៃនេះ ក្រសួងការពារជាតិចិន បានអះអាង ដំណើរការសាល្បងនេះ ប្រព្រឹត្តទៅក្នុងបរិបទនៃការការពារខ្លួនពុំមានកម្មវត្ថុដៅប្រឆាំងលើប្រទេសណាមួយទេ។
សូមបញ្ជាក់ថា គិតរហូតមកទល់ពេលបច្ចុប្បន្ននេះ មានតែប៉ុន្មានប៉ុណ្ណោះនៅលើពិភពលោក (សហរដ្ឋអាមេរិក រុស្ស៊ី និងចិន) ដែលមានសមត្ថភាពអភិវឌ្ឍ និងប្រើប្រាស់ប្រព័ន្ធប្រឆាំងមីស៊ីល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ