ចិនបដិសេធថា គ្មានបំណងចង់ដណ្តើមធ្វើជាម្ចាស់ផ្តាច់មុខលើឋានព្រះចន្ទ
អស់ពីភពផែនដី ចិននិងអាមេរិកបានទៅប្រកួតប្រជែងគ្នាបន្ថែមទៀត នៅឋានព្រះចន្ទ។ នៅក្នុងសន្និសីទកាលពីថ្ងៃចន្ទម្សិលមិញ អ្នកនាំពាក្យរបស់ក្រសួងការបរទេសចិន បាននិយាយចោទប្រកាន់ ប្រធានទីភ្នាក់ងារអវកាសអាមេរិក NASA ថា បាននិយាយបង្ខូចឈ្មោះប្រទេសចិន និងថា ចិននៅតែមានឆន្ទៈចង់ឲ្យមានគម្រោងអវកាសអន្តរជាតិ។ ប្រតិកម្មរបស់អ្នកនាំពាក្យក្រសួងការបរទេសចិនធ្វើឡើង ដើម្បីឆ្លើយតបនឹងការចោទប្រកាន់របស់ប្រធានទីភ្នាក់ងារអវកាសអាមេរិកដែលថា ចិនកំពុងមានមហិច្ឆតាចង់ចូលក្តោបក្តាប់យកឋានព្រះចន្ទតែម្នាក់ឯង។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងបទសម្ភាសន៍ជាមួយកាសែតអាល្លឺម៉ង់ ដែលចុះផ្សាយកាលពីថ្ងៃសៅរ៍សប្តាហ៍មុន ប្រធានទីភ្នាក់ងារអវកាសអាមេរិក ណាសា (NASA) លោកប៊ៀល ណែលសុន Bill Nelsonបាននិយាយត្រង់ៗ ចាត់ទុកមហិច្ឆតាអវកាសរបស់ចិនថា ជាគំរាមកំហែងដល់គម្រោងការរុករកនៅក្នុងទីអវកាស។ កង្វល់ដ៏ធំរបស់លោកប៊ៀល ណែលសុនគឺថា នៅពេលយានរបស់ចិនចុះចតលើឋានព្រះចន្ទហើយ ចិននឹងប្រកាសថា “នេះជាដែនដីរបស់ចិន ហើយអ្នកផ្សេងគ្មានសិទ្ធិចូលមកពាក់ព័ន្ធ”។
នៅប៉ុន្មានទសវត្សរ៍ចុងក្រោយនេះ ចិនបានបង្កើនសមត្ថភាពកម្មវិធីអវកាសរបស់ខ្លួន គួរឲ្យកត់សំគាល់ ដោយផ្តោតសំខាន់ទៅលើការរុករកនៅលើឋានព្រះចន្ទ ដែលជាផ្កាយរណបរបស់ភពផែនដី។ ចិនធ្លាប់បានបញ្ជូនយានឲ្យទៅចុះចតដំបូងគេ នៅលើឋានព្រះចន្ទ នៅឆ្នាំ ២០១៣ មុននឹងបញ្ជូនយាន សាជាថ្មី នៅចុងឆ្នាំ ២០១៨ ឲ្យទៅចុះនៅលើផ្ទៃមួយចំហៀងទៀតនៃឋានព្រះចន្ទ ដែលជាបេសកកម្មដ៏លំបាក និងមិនដែលមានប្រទេសណាធ្លាប់ធ្វើពីមុនមក។ នៅចុងឆ្នាំ២០២០ ចិនក៏បានបញ្ជូនយានទៅជីកយកថ្មពីឋានព្រះចន្ទ មកស្រាវជ្រាវ។ បន្ទាប់ពីបញ្ជូនម៉ូឌុលកណ្តាលសម្រាប់គម្រោងការបញ្ចប់ការសាងសង់ស្ថានីយ៍អវកាសជាតិចិន កាលពីចុងខែមេសាកន្លងទៅ ចិនបានបង្ហាញគម្រោងមួយទៀតរបស់ខ្លួន ស្តីពីការបញ្ជូនយានឲ្យទៅចុះចតនៅភាគខាងត្បូងនៃឋានព្រះចន្ទ នៅដំណាច់ទសវត្សរ៍នេះ។
ភាគខាងត្បូងនៃឋានព្រះចន្ទ ជាកន្លែងដែលទីភ្នាក់ងារណាសាបានដៅទុករួចហើយដែរ សម្រាប់ការចុះចតយានដឹកអវកាសយានិកអាមេរិក នៅក្នុងក្របខ័ណ្ឌកម្មវិធីArtemis ដែលណាសាគ្រោងនឹងធ្វើនៅឆ្នាំ ២០២៥។
សម្រាប់ប្រធានណាសា កម្មវិធីអវកាសរបស់ចិនមានគោលដៅយោធា និងថា ចិនបានលួចគំនិត និងបច្ចេកវិទ្យាពីអ្នកដទៃ។ ការចោទប្រកាន់របស់ប្រធានណាសា ត្រូវបានអ្នកនាំពាក្យរបស់ក្រសួងការបរទេសចិនចាត់ទុកជា ការនិយាយបង្ខូចកេរ្តិ៍ឈ្មោះ និងថា ចិនប្រឆាំងដាច់ខាត រាល់សំដីចោទប្រកាន់ដោយគ្មានការទទួលខុសត្រូវ។ សម្រាប់មន្រ្តីចិន ចិននៅតែលើកទឹកចិត្តជានិច្ចឲ្យមានការកសាងអនាគតអវកាសរួមគ្នា ដើម្បីមនុស្សជាតិ ហើយនិងប្រឆាំងដាច់ខាតនឹងការប្រកួតប្រជែងសព្វាវុធនៅក្នុងអវកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ