ប្រជាជនជប៉ុនកាន់ទុក្ខសពរបស់លោកស្ហ៊ីនហ្សូ អាបេដែលឃាតករបាញ់សម្លាប់កាលពីថ្ងៃសុក្រ
ជប៉ុន និងពិភពលោក នៅមិនទាន់បាត់ស្លុត នៅក្រោយឃាតកម្ម ទៅលើអតីតនាយករដ្ឋមន្រ្តីជប៉ុន លោកស្ហ៊ីនហ្សូ អាបេ។ តាំងពីថ្ងៃសុក្រទី៨កក្កដា ប្រជាជនជប៉ុននាំគ្នាដាក់ផ្កានៅកន្លែងកើតហេតុ ដែលលោកអាបេ ត្រូវឃាតករបាញ់សម្លាប់ ចំណែកសាកសពរបស់លោកអាបេត្រូវបានគេដឹកចេញពីទីក្រុងណារ៉ា ទៅកាន់គេហដ្ឋានរបស់លោក នៅទីក្រុងតូក្យូ នៅថ្ងៃសៅរ៍នេះ។ តាមការចុះផ្សាយរបស់កាសែតក្នុងស្រុកជប៉ុន ពិធីបុណ្យឈាបនកិច្ចក្នុងរង្វង់ក្រុមគ្រួសារសាច់ញាតិរបស់លោកស្ហ៊ីនហ្សូ អាបេ នឹងត្រូវប្រព្រឹត្តទៅនៅថ្ងៃអង្គារទី ១២កក្កដាសប្តាហ៍ក្រោយ។
ចុះផ្សាយនៅថ្ងៃ៖
ស្តាប់ - ០២:១៤
ប្រជាជនជប៉ុនចាប់ផ្តើមកាន់ទុក្ខសពអតីតនាយករដ្ឋមន្រ្តីជប៉ុន លោកស្ហ៊ីនហ្សូ អាបេដែលត្រូវបានខ្មាន់កាំភ្លើងបាញ់សម្លាប់ កាលពីថ្ងៃ សុក្រម្សិលមិញ នៅទីក្រុងណារ៉ា ភាគខាងលិចជប៉ុន។
ខ្មាន់កាំភ្លើង ឈ្មោះ តេស៊ូយ៉ា យ៉ាម៉ាហ្កាមី ដែលត្រូវបានគេចាប់ខ្លួនភ្លាមៗ នៅកន្លែងកើតហេតុបានឆ្លើយសារភាពថា គេលើកដៃបាញ់សម្លាប់ លោកស៊្ហីនហ្សូ អាបេ ព្រោះដោយមកពីជឿថា លោកស្ហ៊ីនហ្សូ អាបេ មានជាប់ពាក់ព័ន្ធនឹងបណ្តាញអង្គការមួយ ដែលខ្លួនស្អប់ប្រឆាំង។ ប៉ូលិសមិនបានបញ្ជាក់ឈ្មោះអង្គការដែលឃាតករសម្លាប់លោកអាបេ លើកឡើងនោះទេ ប៉ុន្តែ កាសែតក្នុងស្រុកជប៉ុន បានចុះផ្សាយថា ជាប្រភេទអង្គការសាសនា។
ឃាតកម្មទៅលើលោកស្ហ៊ីនហ្សូ អាបេ អតីតនាយករដ្ឋមន្រ្តី និងជាអ្នកនយោបាយដ៏មានស្នាដៃ បានធ្វើឲ្យជប៉ុន និងពិភពលោករន្ធត់តក់ស្លុត និងស្រឡាំងកាំង។ លោកស្ហ៊ីនហ្សូ អាបេត្រូវខ្មាន់កាំភ្លើង បាញ់សម្លាប់ នៅក្នុងពេលធ្វើយុទ្ធនាការឃោសនាបោះឆ្នោត ព្រឹទ្ធសភាជប៉ុន ដែលត្រូវរៀបចំ នៅថ្ងៃអាទិត្យស្អែក។
នៅថ្ងៃសុក្រ នៅក្រោយឃាតកម្មទៅលើលោកស្ហ៊ីនហ្សូ អាបេ នាយករដ្ឋមន្រ្តីជប៉ុន លោកហ្វូមីអូ គីស្ហ៊ីដា បានប្រកាសថា ការរៀបចំបោះឆ្នោតដែលជាមូលដ្ឋានគ្រឹះនៃលទ្ធិប្រជាធិបតេយ្យ នឹងត្រូវប្រព្រឹត្តទៅជាធម្មតា។
នៅថ្ងៃសៅរ៍នេះ នាយករដ្ឋមន្រ្តីជប៉ុនបានធ្វើដំណើរទៅជួយឃោសនាឲ្យគណបក្សប្រជាធិបតេយ្យសេរី ដែលធ្លាប់ដឹកនាំដោយលោកអាបេ នៅទីក្រុងយ៉ាម៉ាណាស្ហ៊ី នៅក្រោមការរឹតបន្តឹងសន្តិសុខខ្លាំងបំផុត។ សមាជិករបស់កងរក្សាសន្តិសុខជប៉ុនម្នាក់បាននិយាយប្រាប់កាសែតជប៉ុន Mainichi ថា គេនឹងមិនបណ្តោយឲ្យកើតមានហេតុការណ៍ ដូចកាលពីថ្ងៃសុក្រ ពោលគឺនៅពេលសាធារណជនអាចចូលទៅឈរកៀកជិត លោកស្ហ៊ីនហ្សូ អាបេ ដែលនៅក្នុងនោះមានផងដែរ ខ្មាន់កាំភ្លើង។ នៅថ្ងៃនេះ រាល់អ្នកចូលរួមក្នុងមិទ្ទិញរបស់លោកនាយករដ្ឋមន្រ្តីគីស្ហីដា ត្រូវឆ្លងកាត់ប៉ុស្តត្រួតពិនិត្យ និងការឆែកឆេរយ៉ាងល្អិតល្អន់ពីសំណាក់កងរក្សាសន្តិសុខ។
ប្រជាជនជប៉ុនចាប់ផ្តើមកាន់ទុក្ខសពលោកស្ហ៊ីនហ្សូ អាបេ ចំណែកប្រតិកម្មនៅក្នុងពិភពលោក ថ្កោលទោសលើឃាតកម្មលើអតីតនាយករដ្ឋមន្រ្តីជប៉ុន បានធ្លាក់បន្តបន្ទាប់។ ប្រធានាធិបតីអាមេរិក លោកចូ បៃដិន បាននិយាយថា លោករន្ធត់ និងជួបទុក្ខសោក ចំណែក ប្រធានាធិបតីចិន និងប្រធានាធិបតីកូរ៉េខាងត្បូង ដែលមិនសូវមានទំនាក់ទំនងល្អូកល្អឺនជាមួយប្រទេសជប៉ុន បានចូលរួមរំលែកទុក្ខជាមួយគ្រួសារសពរបស់អតីតនាយករដ្ឋមន្រ្តីជប៉ុន លោកអាបេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ