មេដឹកនាំបរទេសប្រតិកម្មថ្កោលទោសចាត់ទុកការធ្វើឃាតលើអតីតនាយករដ្ឋមន្រ្តីជប៉ុនថា ជាទង្វើដ៏ថោកទាប
ឃាតកម្មលើអតីតនាយករដ្ឋមន្រ្តីជប៉ុនបានបង្កឲ្យមានប្រតិកម្មរំជួលចិត្ត ទាំងនៅក្នុងស្រុក និងនៅបរទេស។ នៅបរទេស ប្រតិកម្មពីថ្នាក់ដឹកនាំ នៅក្នុងពិភពលោក មិនថា ពីមេដឹកនាំរបស់ប្រទេសសម្ព័ន្ធមិត្ត ឬប្រទេសសត្រូវរបស់ជប៉ុន បានធ្លាក់មកជាបន្តបន្ទាប់ នៅថ្ងៃសុក្រទី ៨ ខែកក្កដា ២០២២។
ចុះផ្សាយនៅថ្ងៃ៖
ស្តាប់ - ០៣:២៨
នៅជប៉ុន ដំណឹងមរណភាពរបស់លោកអតីតនាយករដ្ឋមន្រ្តី ស្ហ៊ីនហ្សូ បានធ្វើឲ្យគ្រប់គ្នាស្រឡាំងកាំង ភ័យរន្ធត់។ ជាមួយការរំជួលចិត្ត លោកនាយករដ្ឋមន្រ្តីជប៉ុន ហ្វូមីញ៉ូ គីស្ហីដា បាននិយាយថា លោកគ្មានពាក្យអ្វីមកថ្លែង សម្រាប់ការបាត់បង់លោកស្ហ៊ីនហ្សូ អាបេ ដែលជាគ្រូរបស់លោកបាននោះទេ។ លោកនាយករដ្ឋមន្រ្តីជប៉ុនបានថ្លែងទៅកាន់អ្នកកាសែត ទាំងទឹកមុខសោកសង្រេងយ៉ាងដូច្នេះថា “ខ្ញុំបានបន់ស្រន់ដើម្បីឲ្យលោកនៅមានជីវិត ប៉ុន្តែ ទោះជាយ៉ាងណា ខ្ញុំបានទទួលដំណឹងថា លោកបានលាចាកលោកទៅហើយ។ វាជារឿងមួយដ៏គួរឲ្យស្តាយស្រណោះខ្លាំងណាស់។ ខ្ញុំសូមចូលរួមរំលែកទុក្ខ និងបន់ស្រន់សូមឲ្យវិញ្ញាណក្ខន្ធរបស់លោកបានស្ងប់សុខ សន្តិភាព”។
ថោកទាប កំសាក រន្ធត់ នេះក៏ជាពាក្យដែលថ្នាក់ដឹកនាំបរទេសបានប្រើច្រើន ដើម្បីប្រតិកម្មទៅនឹងឃាតកម្មលើអតីតនាយករដ្ឋមន្រ្តីជប៉ុន លោកស្ហ៊ីនហ្សូ អាបេ នៅថ្ងៃសុក្រនេះ។ សហរដ្ឋអាមេរិក សម្ព័ន្ធមិត្តរបស់ជប៉ុន តាមរយៈ រដ្ឋមន្រ្តីការបរទេស បានសំដែងការទុក្ខសោក និងក្តីបារម្ភក្រែលែង នៅក្រោយលឺដំណឹងដ៏រន្ធត់នៅថ្ងៃនេះ។
ប្រធានាធិបតីបារាំង លោកអេម៉ានុយអែល ម៉ាក្រុងបានសរសេរសារទ្វីត សំដែងក្តីរន្ធត់ឥតឧបមា ដែលបានលឺការវាយប្រហារ ដ៏គួរឲ្យស្អប់ខ្ពើមទៅលើអតីតនាយករដ្ឋមន្រ្តីជប៉ុន។ សម្រាប់ប្រមុខរដ្ឋបារាំង បារាំងនៅក្បែរជាប់ជានិច្ច ជាមួយប្រជាជនជប៉ុន។
លោកណារិនដ្រា ម៉ូឌី លោកនាយករដ្ឋមន្រ្តីឥណ្ឌា ដែលឧស្សាហ៍ធ្លាប់ជួបប្រាស្រ័យផ្ទាល់ជាមួយ លោកស្ហ៊ីនហ្សូ អាបេ នៅក្នុងពេលលោកនៅជានាយករដ្ឋមន្រ្តីជប៉ុន បានសរសេរនៅក្នុងសារទ្វីតថា លោករន្ធត់ដែលលឺថា មិត្តរបស់លោករងការបាញ់ប្រហារ។
ដូចនាយករដ្ឋមន្រ្តី ថៃ និងមេដឹកនាំប្រទេសសមាជិកអាស៊ាន ផ្សេងទៀត នាយករដ្ឋមន្រ្តីសិង្ហបុរី បានសំដែងក្តីតក់ស្លុត នៅក្រោយលឺហេតុការណ៍អាក្រក់កើតឡើងទៅលើលោកស្ហ៊ីនហ្សូ អាបេ ដែលលោកចាត់ទុកជាមិត្តដ៏ល្អរបស់សិង្ហបុរី។
ជប៉ុនមិនមែនជាសមាជិករបស់អូតង់ ប៉ុន្តែ អគ្គលេខាធិការអង្គការអូតង់ បានសំដែងទុក្ខសោក ដែលឃើញមានឃាតកម្មទៅលើលោកស្ហ៊ីនហ្សូ អាបេ អ្នកការពារលទ្ធិប្រជាធិបតេយ្យ។
ពីខាងរុស្ស៊ី ដែលជាគូប្រជែងរបស់ជប៉ុន នៅក្នុងជម្លោះដណ្តើមប្រជុំកោះ ក្រសួងការបរទេសរុស្ស៊ីបានចេញសេចក្តីថ្លែងការណ៍ថ្កោលទោស ឧក្រិដ្ឋកម្មដ៏គួរឲ្យខ្លាច ដែលរុស្ស៊ីចាត់ទុកជាអំពើភេរវកម្ម ដែលគេមិនអាចលើកលែងឲ្យបាន។ នៅក្រោយ មន្ទីរពេទ្យប្រកាសមរណភាពរបស់លោកស្ហ៊ីនហ្សូ អាបេ អ្នកនាំពាក្យរបស់វិមានក្រេមឡាំងបាននិយាយប្រាប់អ្នកកាសែតថា រុស្ស៊ីមានទុក្ខព្រួយ និងថា រុស្ស៊ីកោតសរសើរលោកស្ហ៊ីនហ្សូ អាបេ ក្នុងនាមជាអ្នកស្នេហាជាតិពិតប្រាកដរបស់ជប៉ុន។
នៅក្នុងសារតេឡេក្រាម លោកប្រធានាធិបតី ពូទីន បានចាត់ទុកមរណភាពរបស់លោកស្ហ៊ីនហ្សូ អាបេថា ជាការបាត់បង់ដ៏ធំធេង។ នៅក្នុងសារផ្ញើរទៅកាន់ក្រុមគ្រួសាររបស់លោកអាបេ មេដឹកនាំរុស្ស៊ីបានចាត់ទុក លោកអាបេជាប្រមុខរដ្ឋដ៏មានស្នាដៃ ដែលបានរួមវិភាគទានដ៏ មិនអាចកាត់ថ្លៃបាន នៅក្នុងការអភិវឌ្ឍទំនាក់ទំនង រវាងប្រទេសទាំងពីរ ជប៉ុន រុស្ស៊ី ក្នុងគ្រប់វិស័យ ជាពិសេស ការកសាងជំនឿទុកចិត្ត និងទំនាក់ទំនងល្អក្នុងនាមជាប្រទេសជិតខាងនឹងគ្នា។
ប្រទេសចិន តាមរយៈ អ្នកនាំពាក្យរបស់ក្រសួងការបរទេសបរទេសក៏បានប្រតិកម្មភ្លាមៗ ដែរ នៅក្រោយ ព្រឹត្តិការណ៍បាញ់ប្រហារទៅលើលោកស្ហ៊ីនហ្សូ អាបេ។ តាមមន្រ្តីចិនខាងលើ ចិននៅ រន្ធត់ និងសំដែងក្តីអាណិតអាសូរដល់ក្រុមគ្រួសាររបស់លោកស្ហីនហ្សូ អាបេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ