នៅក្នុងសៀវភៅស ក្រសួងការពារជាតិជប៉ុនចាត់ទុករុស្ស៊ីជាការគំរាមកំហែង
សង្រ្គាមរុស្ស៊ីឈ្លានពានអ៊ុយក្រែនបានធ្វើឲ្យជប៉ុន នៅមិនស្រណុកចិត្ត។ នៅក្នុងរបាយការណ៍ប្រចាំឆ្នាំ ដែលចេញផ្សាយនៅថ្ងៃសុក្រនេះ ក្រសួងការពារជាតិជប៉ុនបានចាត់ទុករុស្ស៊ីថា ជាការគំរាមកំហែង។ ជប៉ុនដែលខ្លាចខា្លចការគំរាមកំហែងរបស់ចិន និងកូរ៉េខាងជើង សម្រាប់ សន្តិសុខ ផ្ទាល់ខ្លួន បារម្ភផងដែរ នៅពេលឃើញចិនបង្កើនការដាក់សម្ពាធកាន់តែខ្លាំងលើកោះតៃវ៉ាន់។ នៅថ្ងៃពុធ ប្រធានទីភ្នាក់ងារស៊ើបការណ៍សម្ងាត់អាមេរិក CIA ទើបបាននិយាយថា សង្រ្គាមរុស្ស៊ីឈ្លានពានអ៊ុយក្រែន គឺជាមេរៀនដែលធ្វើឲ្យចិនត្រៀមកម្លាំងវាយចូលគ្រប់គ្រងកោះតៃវ៉ាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ក្រសួងការពារជាតិជប៉ុនបានចេញផ្សាយសៀវភៅស ដែលបានទាញសញ្ញាអាសន្នពីការគំរាមកំហែងថ្មីរបស់រុស្ស៊ី និងការព្រួយបារម្ភកាន់តែខ្លាំងពីសន្តិសុខរបស់តៃវ៉ាន់ នៅចំពោះមុខមហាអំណាចចិន ដែលបានឃើញមេរៀនរុស្ស៊ីចូលធ្វើសង្រ្គាមឈ្លានពានអ៊ុយក្រែន។
នៅក្នុងរបាយការណ៍ប្រចាំឆ្នាំ ចេញផ្សាយនៅថ្ងៃសុក្រទី ២២ខែកក្កដា គេបានផ្តោតមួយជំពូកពេញដើម្បីនិយាយពីសង្រ្គាមឈ្លានពានរបស់រុស្ស៊ីនៅ ប្រទេសអ៊ុយក្រែន។ តាមរបាយការណ៍ សង្រ្គាមឈ្លានពានអ៊ុយក្រែន អាចជាសារមួយដែលថា ការប៉ុនប៉ងផ្លាស់ប្តូរលក្ខន្តិករដើម Statut Quo ដោយឯកតោភាគី និងដោយការប្រើកម្លាំងយោធា គឺជារឿងដែលគេអាចទទួលយកបាន។ អ្វីដែលធ្វើឲ្យក្រសួងការពារជាតិជប៉ុនបារម្ភកាន់តែខ្លាំង គឺ ដោយសាររុស្ស៊ីអាចចុះទន់ខ្សោយដៃ នៅក្នុងសង្រ្គាមអ៊ុយក្រែន រុស្ស៊ី អាចរត់ទៅពង្រឹងទំនាក់ទំនងកាន់តែជិតស្និទ្ធជាមួយ មហាអំណាចចិន ដែលជាគូបដិបក្ខរបស់ជប៉ុន។
សៀវភៅស របស់ជប៉ុនដែលផ្តោតទៅលើស្ថានភាពគំរាមកំហែងផ្នែកភូមិសាស្រ្តនយោបាយ នៅក្នុងពិភពលោក និងការគំរាមកំហែងជាពិសេស សម្រាប់ប្រទេសជប៉ុន បរិយាយផងដែរ ពីគ្រោះថ្នាក់របស់រុស្ស៊ី ដែលមានលេសកាន់តែច្រើនដើម្បី ប្រើអាវុធនុយក្លេអ៊ែរ។ ក្រសួងការពារជប៉ុនព្រួយបារម្ភថា នាវាមុជទឹករបស់រុស្ស៊ីមានអាវុធនុយក្លេអ៊ែរនឹងបង្កើនសកម្មភាព នៅក្នុងសមុទ្រជុំវិញប្រទេសជប៉ុន។ នៅខែ ឧសភាកន្លងទៅ ចិន និងរុស្ស៊ីបានធ្វើសមយុទ្ធរួមគ្នា ដោយបានបញ្ជូនយន្តហោះទម្លាក់គ្រាប់បែក ទៅហោះក្បែរប្រទេសជប៉ុន។
ក្រសួងការពារជាតិជប៉ុនបានរបាយការណ៍ទាញសញ្ញាអាសន្នស្តីពីការគំរាមកំហែងរបស់រុស្ស៊ី និងចិន នៅក្នុងកាលៈទេសៈដែល រដ្ឋាភិបាលជប៉ុនគ្រោងនឹងបង្កើនថវិកាកងទ័ពក្នុងកម្រិតមួយដ៏ខ្ពស់។ នៅចំពោះមុខការគំរាមកំហែងអាវុធនុយក្លេអ៊ែររបស់កូរ៉េខាងជើង និងយុទ្ធសាស្រ្តពង្រីកដែនឥទ្ធិពលរបស់ចិន នៅក្នុងតំបន់ ជប៉ុនបានបង្កើនថវិកាការពារជាតិជាបន្តបន្ទាប់។ ប៉ុន្តែ បើប្រៀបធៀប នឹងសមាជិករបស់ក្រុមប្រទេសមហាឧស្សាហកម្មG7ផ្សេងទៀត ថវិកាកងទ័ពជប៉ុនមានតិចជាង ២%នៃផលិតផលក្នុងស្រុកសរុប។ គណបក្សកាន់អំណាចរបស់លោកនាយករដ្ឋមន្រ្តី ហ្វូមីអូ គីស្ហ៊ីដា ដែលទើបបានទទួលសំឡេងភាគច្រើននៅព្រឹទ្ធសភា មានគម្រោងសើរើរដ្ឋធម្មនុញ្ញសន្តិភាព ដើម្បីពង្រឹងសមត្ថភាពរបស់កងទ័ពជាតិជប៉ុន ដោយមិនចាំបាច់ត្រូវការពឹងអ្នកដទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ