ជប៉ុនគ្រោងទិញមីស៊ីល ដើម្បីប្រឈមនឹងការគំរាមកំហែងរបស់ព្យុងយ៉ាង
រដ្ឋមន្ត្រីក្រសួងការពារជាតិជប៉ុន បានប្រកាសនៅថ្ងៃសុក្រនេះ ថាជប៉ុនគ្រោងនឹងទិញមីស៊ីល រយៈចម្ងាយឆ្ងាយ និងមធ្យម ដើម្បីការពារខ្លួនទល់នឹងការគំរាមកំហែងយោធារបស់កូរ៉េខាងជើង។ ប៉ុន្តែគម្រោងទិញអាវុធបែបនេះ អាចនឹងត្រូវបំផុសចំណោទស្តីអំពីនយោបាយសន្តិនិយមរបស់ប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
មីស៊ីលដែលជប៉ុនមានគម្រោងទិញនេះ ជាប្រភេទមីស៊ីលបណ្តែត (មីស៊ីលការពារខ្លួន) Jassm និង Lrasm របស់អាមេរិក ដែលអាចបាញ់បានចម្ងាយដល់ទៅ៩រយគីឡូម៉ែត្រ និង មីស៊ីល Joint Strikes របស់ក្រុមហ៊ុនន័រវែស Kongsberg Defence and Aerospace ដែលអាចបាញ់បានចម្ងាយ៥រយគីឡូម៉ែត្រ។ នេះបើតាមប្រភពសារព័ត៌មានជប៉ុន។
ដើម្បីអាចទិញមីស៊ីលរយៈឆ្ងាយ និងមធ្យមនេះមកបំពាក់ឱ្យយន្តហោះចំបាំងរបស់ខ្លួន រដ្ឋមន្ត្រីក្រសួងការពារជាតិជប៉ុន នឹងទៅស្នើសុំថវិកាពិសេសពីរដ្ឋាភិបាល ដោយពន្យល់ថា មីស៊ីលនេះនឹងអនុញ្ញាតឱ្យជប៉ុនអាចប្រឈមទប់ទល់នឹងគូសត្រូវបាន ពីគ្រប់ទិសទីទាំងអស់។
ប៉ុន្តែគម្រោងទិញអាវុធមីស៊ីល អាចនឹងបំផុសឱ្យមានភាពចម្រូងចម្រាស ព្រោះជប៉ុនមានរដ្ឋធម្មនុញ្ញសន្តិនិយម ប្រកាន់យកនយោបាយការពារខ្លួន និងហាមឃាត់ដាច់ខាតមិនឱ្យប្រើប្រាស់កម្លាំងយោធាជាដំណោះស្រាយវិវាតជាមួយអន្តរជាតិ។ ជប៉ុនរំពឹងតែលើសហរដ្ឋអាមេរិកក្នុងការពារប្រទេស ស្របតាមសន្ធិសញ្ញាចងសម្ព័ន្ធភាពជប៉ុន-អាមេរិកផ្នែកសន្តិសុខ។
មួយរយៈចុងក្រោយនេះ ជប៉ុនមានអារម្មណ៍ថារងការគំរាមកំហែងខ្លាំងឡើងៗ ពីសំណាក់កូរ៉េខាងជើង។ ព្រឹទ្ធសភាជប៉ុន បានចាត់ទុកការបាញ់សាកល្បងមីស៊ីលអន្តរទ្វីប កាលពីថ្ងៃទី ២៩ វិច្ឆិកា ២០១៧ របស់ព្យុងយ៉ាង ដែលធ្លាក់ក្នុងសមុទ្ទជប៉ុន គឺជាការគំរាមកំហែងពិតសម្រាប់ជប៉ុន។ ចំណែកលោកស៊ីនហ្សូអាបេ បានប្រកាសថាការចរចាជាមួយព្យុងយ៉ាងលែងមានន័យហើយ។ សេចក្តីអំពាវនាវរបស់អាមេរិក កាលពីសប្តាហ៍មុន ឱ្យសហគមន៍អន្តរជាតិផ្តាច់ទំនាក់ទំនងពាណិជ្ជកម្ម និងការទូតជាមួយកូរ៉េខាងជើង ដើម្បីបង្ខំរបបនេះឱ្យបោះបង់មហិច្ឆតានុយក្លេអ៊ែរ តែត្រូវម៉ូស្គូ និងប៉េកាំងច្រានចោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ