អាល្លឺម៉ង់បញ្ជូនយន្តហោះចម្បាំង ទៅតំបន់ឥណ្ឌូប៉ាស៊ីហ្វិកជាលើកទីមួយ
ក្នុងបរិបទនៃភាពតានតឹងរវាងចិននិងតៃវ៉ាន់ អាល្លឺម៉ង់ បានបញ្ជូនយន្តហោះចម្បាំងប្រភេទ Eurofighter ចំនួន៦គ្រឿង ទៅតំបន់ឥណ្ឌូប៉ាស៊ីហ្វិក ជាលើកទីមួយ ដើម្បីចូលរួមធ្វើសមយុទ្ធពហុជាតិ មានជាអាទិ៍សមយុទ្ធរវាងឥណ្ឌូណេស៊ី និងសហភាពអឺរ៉ុប។ នេះសបញ្ជាក់ឱ្យឃើញអំពីឆន្ទៈចង់មានបង្ហាញវត្តមានកាន់តែខ្លាំងឡើងៗរបស់អាល្លឺម៉ង់ នៅក្នុងតំបន់ ដែលចិនពង្រីកឥទ្ធិពលគួរឱ្យព្រួយបារម្ភ។
ចុះផ្សាយនៅថ្ងៃ៖
ស្តាប់ - ០១:៤៩
នៅក្នុងសេចក្តីថ្លែងការណ៍ យោធាអាល្លឺម៉ង់ Bundeswehrបានបញ្ជាក់ថា នេះជាប្រតិបត្តិការដ៏ធំ និងប្រកបដោយមហិច្ឆតាបំផុត ដែលមិនធ្លាប់មានធ្វើទេ ក្នុងប្រវត្តិកងទ័ពអាកាសអាល្លឺម៉ង់។ “មិនមែនជាការបង្ហាញសាច់ដុំដាក់ចិនឡើយ” ប៉ុន្តែអាល្លឺម៉ង់ចង់បង្ហាញឱ្យឃើញថា កងទ័ពជើងអាកាស អាចចេញធ្វើបេសកកម្មបានយ៉ាងឆាប់រហ័សនិងនៅទីតាំងជាច្រើន ទូទាំងពិភពលោក ក្នុងពេលតែមួយ។ នេះបើតាមសេចក្តីថ្លែងការណ៍ដដែល។
ដោយជាក់ស្តែង ប្រតិបត្តិការយោធាអាល្លឺម៉ង់នេះ មានការចូលរួមពីសំណាក់កងទ័ពចំនួន ២៥០នាក់ និងយន្តចម្បាំងEurofighterចំនួន៦គ្រឿង អមដោយយន្តហោះដឹកជញ្ជូនយោធាA400Mចំនួនបួនគ្រឿង និងA330ចំនួនបីគ្រឿង សម្រាប់ធានាផ្គត់ផ្គង់ការចាក់ប្រេងលើអាកាសឱ្យយន្តហោះចម្បាំង ពេលកំពុងហោះហើរធ្វើប្រតិបត្តិការ។
នេះជាលើកទីមួយហើយ ដែលអាល្លឺម៉ង់បញ្ជូនកងទ័ពទៅតំបន់ឥណ្ឌូប៉ាស៊ីហ្វិក ក្នុងក្របខ័ណ្ឌនៃសមយុទ្ធពហុជាតិ ឥណ្ឌូណេស៊ី-សហភាពអឺរ៉ុប និងបន្ទាប់ពីមានការស្នើសុំឱ្យមានកិច្ចសហប្រតិបត្តិការជាមួយកងទ័ពជើងអាកាសអាល្លឺម៉ង់ ពីសំណាក់ឥណ្ឌា ឥណ្ឌូណេស៊ី និងម៉ាឡេស៊ី។
បន្តស្ថិតនៅក្នុងតំបន់ឥណ្ឌូប៉ាស៊ីហ្វិករហូតដល់ដើមខែតុលា យន្តហោះចម្បាំងអាល្លឺម៉ង់ ត្រូវចូលរួមធ្វើសមយុទ្ធពីរផ្សេងទៀតគឺសមយុទ្ធ "ការប្រយុទ្ធលើអាកាស PitchBlack និង Kakadu២០២២"នៅអូស្ត្រាលី ក្នុងខែនេះ និងខែកញ្ញា បន្ទាប់មកកងយន្តហោះចម្បាំងនេះ ត្រូវចូលទៅជប៉ុននិងកូរ៉េខាងត្បូងមួយភ្លែតសិន ទើបត្រលប់ចូលបន្ទាយវិញ។
តាំងពីរុស្ស៊ីចូលឈ្លានពានអ៊ុយក្រែននៅថ្ងៃទី ២៤កុម្ភៈ២០២២មក អាល្លឺម៉ង់បានលេចគំនិតរៀបចំគម្រោងធ្វើទំនើបកម្មវិស័យយោធារបស់ខ្លួនដ៏ធំធេង ដោយបម្រុងមូលនិធិពិសេសចំនួន១០០លានអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ