អាល្លឺម៉ង់ដំឡើងថវិកាការពារជាតិ ក្រោយពីរុស្ស៊ីចូលឈ្លានពានអ៊ុយក្រែន
ការឈ្លានពានរបស់រុស្ស៊ីលើប្រទេសអ៊ុយក្រែន កំពុងរុញច្រានឱ្យមានការប្តូរផ្លាស់គោលនយោបាយការពារជាតិនិងការទូតរបស់ប្រទេសអាល្លឺម៉ង់ យ៉ាងលឿនស្លេវ។ នៅចំពោះសភាអាល្លឺម៉ង់ ប្រមុខរដ្ឋាភិបាលអាល្លឺម៉ង់ អូឡាហ្វ ស្ហុលស៍ បានប្រកាសធ្វើទំនើបកម្មវិស័យយោធា និងដំឡើងកញ្ចប់ថវិកាការពារជាតិប្រចាំឆ្នាំ ឱ្យច្រើនជាង២%នៃផលិតផលសរុបប្រទេស បើទោះបីជាបំណុលជាតិត្រូវកើនឡើងក៏ដោយ។
ចុះផ្សាយនៅថ្ងៃ៖
ស្តាប់ - ០២:០៦
ប៉ុន្មានថ្ងៃចុងក្រោយមកនេះ សំឡេងប្រឆាំងនឹងសង្គ្រាមអ៊ុយក្រែនបានលាន់ឮកាន់តែខ្លាំងឡើងនៅអាល្លឺម៉ង់ ដោយមានពលរដ្ឋច្រើនកកកុញនាំធ្វើបាតុកម្មនៅរដ្ឋធានីប៊ែរឡាំង (យ៉ាងហោចណាស់១សែននាក់នៅថ្ងៃអាទិត្យទី ២៧កុម្ភៈនេះ)។
ចំណែកប្រមុខរដ្ឋាភិបាលអាល្លឺម៉ង់វិញ លោក អូឡាហ្វ ស្ហុលស៍ បានប្រកាសនៅចំពោះសភាដែលជួបប្រជុំវិសាមញ្ញនៅថ្ងៃអាទិត្យនេះដែរ ថា អាល្លឺម៉ង់នឹងចាប់បង្កើនចំណាយផ្នែកយោធា នៅឆ្នាំខាងមុខ។
“ពិភពលោកចូលសករាជថ្មី ! ក្រោយការឈ្លានពានរបស់រុស្ស៊ីលើអ៊ុយក្រែន ពិភពលោកថ្ងៃអនាគតមិនដូចពេលកន្លងទៅទេ ដូច្នេះអាល្លឺម៉ង់ក៏ត្រូវប្តូរផ្លាស់ដែរ!” នេះជាប្រសាសន៍របស់លោក អូឡាហ្វ ស្ហុលស៍ ដោយគូសបញ្ជាក់ថា រដ្ឋាភិបាលនឹងទម្លាយកញ្ចប់ថវិកាចំនួន ១០០ពាន់លានដុល្លារ ភ្លាម សម្រាប់យកមកធ្វើទំនើបកម្មវិស័យយោធាអាល្លឺម៉ង់។ ហើយចាប់ពីពេលនេះតទៅ ពីមួយឆ្នាំទៅមួយឆ្នាំ អាល្លឺម៉ង់នឹងបង្កើនថវិកាវិនិយោគវិស័យការពារជាតិ ឱ្យឡើងលើសពី២%នៃផលិតផលសរុបក្នុងស្រុក ពោលគឺច្រើនជាងកម្មវត្ថុដែលកំណត់ដោយក្រុមប្រទេសជាសមាជិកអង្គការណាតូទៅទៀត (អូតង់បានស្នើឱ្យរដ្ឋសមាជិកនីមួយៗចំណាយថវិកាការពារជាតិម្តុំ២%នៃផលិតផលក្នុងស្រុកសរុប)។
ឡើងកាន់អំណាចទើបបានជាងពីរខែ លោកអូឡាហ្វ ស្ហុលស៍ បានប្រកាសត្រៀមខ្លួនប្រឈមនឹងការកើនឡើងនៃប្រាក់បំណុលជាតិ និងលែងប្រកាន់ជំហរទប់ត្បៀតខុសនិងលើសគេឯងដូចមុនទៀតហើយ ក្នុងវិស័យការពារជាតិនិងការបរទេស។ នេះបើតាមប្រសាសន៍របស់លោករដ្ឋមន្ត្រីការបរទេស ដែលជាអ្នកបរិស្ថាននិយមនិងជាដៃគូត្រីភាគីនៃរដ្ឋាភិបាលចម្រុះរបស់លោកអូឡាហ្វ ស្ហុលស៍។
ក្រោយសង្គ្រាមត្រជាក់បិទបញ្ចប់ទៅ អាល្លឺម៉ង់បានប្រកាន់ជំហរសន្តិនិយម និងរំពឹងលើអាមេរិកក្នុងការការពារខ្លួន។ អាល្លឺម៉ង់មិនខ្វល់នឹងចំណាយលើផ្នែកការពារជាតិទេ រហូតធ្វើឱ្យសហរដ្ឋអាមេរិកស្រែកបន្ទោសដោយចំៗផងកាលពីប៉ុន្មានឆ្នាំមុន។ តាំងពី បង្រួបបង្រួមជាប្រទេសតែមួយនៅឆ្នាំ១៩៩០មក អាល្លឺម៉ង់បានកាត់បន្ថយចំនួនយោធាជាលំដាប់ពី ៥សែននាក់មកនៅត្រឹមតែ២សែនប៉ុណ្ណោះថ្ងៃនេះ។ បើនិយាយអំពីសម្ភារៈបរិក្ខារយោធាវិញ សុទ្ធតែចាស់ទ្រុឌទ្រោមទាំងអស់ ព្រោះអាល្លឺម៉ង់មិនសូវចំណាយធ្វើវិនិយោគទេ។ មេបញ្ជាការយោធាជើងគោកអាល្លឺម៉ង់បានព្រលយថា យោធាអាល្លឺម៉ង់គ្មានអ្វីសោះ គឺននលគក។
ប៉ុន្តែសង្គ្រាមនៅអ៊ុយក្រែន បានដាស់ស្មារតី អាល្លឺម៉ង់ឱ្យប្តូរផ្លាស់នយោបាយការពារជាតិ និងប្រពៃណីសន្តិនិយម ដោយថែមទាំងបានសម្រេចបញ្ជូនអាវុធទៅឱ្យអ៊ុយក្រែន ក្រោមសំឡេងអបអររបស់លោកប្រធានាធិបតី ហ្សេឡេនស្គី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ