លោកស៊ីជីនពីង ប្រកាសជួយការពារឯករាជ្យនិងបូរណភាពដែនដីកាហ្សាក់ស្ថាន
ជាលើកទីមួយ គិតចាប់តាំងពីផ្ទុះវិបត្តិកូវីដមក ដែលប្រធានាធិបតីចិនធ្វើដំណើរទៅបរទេស។ នៅថ្ងៃពុធទី ១៤កញ្ញា លោក ស៊ី ជីនពីង បានអញ្ជើញទៅដល់ប្រទេសកាហ្សាក់ស្ថាន អតីតរដ្ឋមួយរបស់សហភាពសូវៀត និងដែលមានប្រវត្តិជាសម្ព័ន្ធមិត្តរបស់មូស្គូ តែទើបចាប់ផ្តើមដកខ្លួនចេញពីរុស្ស៊ី ក្រោយឃើញសង្គ្រាមឈ្លានពាននៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០១:៥៧
ប្រធានាធិបតីកាហ្សាក់ស្ថាន លោក កាស៊ីម ចូម៉ារ តូកាអ៊ីវ Kassim Jomart Tokaïev បានទៅទទួលស្វាគមន៍លោកស៊ីជីនពីង ដល់ជណ្តើរយន្តហោះ ដោយពាក់ម៉ាស់ទាំងអស់គ្នា។ ក្នុងពេលជួបពិភាក្សាគ្នា បើតាមទូរទស្សន៍ជាតិចិន លោក ស៊ីជីនពីង បានធានាជួយថែរក្សា ឯករាជ្យជាតិ ការពារបូរណភាពដែនដី និងអធិបតេយ្យភាពជាតិកាហ្សាក់ស្ថាន។ លោកស៊ីជីនពីង មានប្រសាសន៍ដូច្នេះ ព្រោះកាហ្សាក់ស្ថាន ដែលជាអតីតរដ្ឋមួយរបស់សហភាពសូវៀត កំពុងព្រួយបារម្ភយ៉ាងខ្លាំង នៅពេលឃើញរុស្ស៊ីបើកប្រតិបត្តិការយោធាចូលឈ្លានពានអ៊ុយក្រែន។ មានជនជាតិភាគតិចជារុស្ស៊ីរស់នៅច្រើន កាហ្សាស្ថានខ្លាចរងជោគវាសនាដូចអ៊ុយក្រែន បានផ្តើមដកខ្លួន ឱ្យឃ្លាតឆ្ងាយពីនឹងរុស្ស៊ី តាំងពីមួយរយៈចុងក្រោយមកនេះ។
លោកប្រធានាធិបតីចិន ថែមទាំងបានប្រកាសសន្យា ប្រឆាំងជាដាច់ខាតនឹងការជ្រៀតជ្រែកកិច្ចការផ្ទៃក្នុងកាហ្សាក់ស្ថាន ពីគ្រប់ទម្រង់នៃកងកម្លាំងទាំងអស់ រាប់ទាំងកម្លាំងខាងក្រៅ ពោលគឺលោកចង់សំដៅលើកងកម្លាំងបរទេស ដែលកាហ្សាក់ស្ថានចោទថាបានបង្កឱ្យមានអំពើហិង្សាកាលពីខែមករាកន្លងទៅ។
ម្សិលមិញ ពេលចេញដំណើរ លោកប្រមុខដឹកនាំចិន បានអះអាងម្តងហើយ ថាចិននឹងការពារសន្តិសុខរួមជាមួយកាហ្សាក់ស្ថាន។ ប៉េកាំងចង់សហការជាមួយកាហ្សាក់ស្ថាន ប្រយុទ្ធប្រឆាំងនឹងការជួញដូរគ្រឿងញៀន អំពើឧក្រិដ្ឋកម្ម និងអំពើភេរវកម្ម ដែររាប់បញ្ជូលទាំងសកម្មភាពផ្តាច់ទឹកនិយម សាសនានិយមជ្រុល។
ជាចម្លើយតប ប្រធានាធិបតីកាហ្សាក់ស្ថាន លោក តូកាអ៊ីវ បានប្រកាសចាត់ទុក ដំណើរទស្សនកិច្ចលើកទីមួយក្រោយសម័យកូវីដរបស់លោកស៊ីជីនពីងថ្ងៃនេះ ថាមានលក្ខណៈប្រវត្តិសាស្ត្រ និងបានសម្តែងអំណរក្រៃ ចំពោះទំនុកចិត្ត និងកិច្ចសហប្រតិបត្តិការ រវាងចិននិងកាហ្សាក់ស្ថាន។
បន្ទាប់ពីកាហ្សាក់ស្ថាន លោកស៊ីជីនពីង នឹងបន្តដំណើរទៅកាន់ប្រទេសអ៊ូសបេគីស្ថាន នៅថ្ងៃព្រហស្បតិ៍ ដើម្បីចូលរួមក្នុងជំនួបកំពូលរបស់មេដឹកនាំប្រទេសជាសមាជិកអង្គការកិច្ចសហប្រតិបត្តិការសៀងហៃ ដែលនឹងអាចមានជំនួបទ្វេភាគីជាមួយប្រធានាធិបតីរុស្ស៊ី លោកពូទីនផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ