លោកស៊ីជីនពីង នឹងចេញជួបលោកពូទីន នៅក្រៅប្រទេសចិន ជាលើកទីមួយ
នេះជាលើកទីមួយ គិតចាប់តាំងពីផ្ទុះកូវីដមកដែលលោកប្រធានាធិបតីចិន ស៊ី ជិនពីង បានធ្វើដំណើរទៅបរទេស។ បើតាមសេចក្តីប្រកាសរបស់សារព័ត៌មានរដ្ឋចិន នៅសប្តាហ៍នេះលោក ស៊ីជីនពីង នឹងអញ្ជើញទៅប្រទេស កាហ្សាក់ស្ថាន និងអ៊ូសបេគីស្ថាន ដើម្បីបំពេញទស្សនកិច្ចផ្លូវរដ្ឋក្នុងប្រទេសទាំងពីរផង និងចូលរួមក្នុងជំនួបកំពូលក្រុមប្រទេសជាសមាជិកអង្គការកិច្ចសហប្រតិបត្តិការសៀងហៃផង។ នាឱកាសនោះ លោកស៊ីជីនពីងនឹងជួបសមភាគីរុស្ស៊ី លោក វ្លាដេមៀ ពូទីន ទៀត។
ចុះផ្សាយនៅថ្ងៃ៖
ពីថ្ងៃពុធទី ១៤កញ្ញាដល់ថ្ងៃសុក្រទី ១៦កញ្ញា លោក ស៊ីជីនពីង នឹងធ្វើដំណើរទៅអាស៊ីកណ្តាល អញ្ជើញទៅបំពេញទស្សនកិច្ចផ្លូវរដ្ឋនៅប្រទេសកាហ្សាក់ស្ថាន និងដើម្បីចូលរួមក្នុងជំនួបកំពូលរបស់មេដឹកនាំប្រទេសជាសមាជិកអង្គការកិច្ចសហប្រតិបត្តិការសៀងហៃ នៅប្រទេសអ៊ូសបេគីស្ថាន។ នេះបើតាមសេចក្តីថ្លែងការណ៍របស់ក្រសួងការបរទេសចិន។
អង្គការកិច្ចសហប្រតិបត្តិការសៀងហៃ ដែលមានសមាសភាព៨ប្រទេសគឺ ចិន រុស្ស៊ី និង៤ប្រទេសនៅតំបន់អាស៊ីកណ្តាល ដូចជា អ៊ូសបេគីស្ថាន កាហ្សាក់ស្ថាន តាហ្ស៊ីគីស្ថាន និងកៀហ្ស៊ីគីស្ថាន ព្រមទាំងឥណ្ឌានិងប៉ាគីស្ថាន ត្រូវបើកជំនួបកំពូលពីរថ្ងៃ នៅក្រុងសាម៉ាកង់ ដែលផ្លូវសូត្រចាស់របស់ចិនធ្លាប់ឆ្លងកាត់។
នាឱកាសជំនួបកំពូលនោះ លោកស៊ីជិនពីង នឹងជួបលោកប្រធានាធិបតីរុស្ស៊ី ពូទីន ដោយផ្ទាល់ផង ដើម្បីបញ្ជាក់អំពីឥទ្ធិពលរបស់ចិន និងផលប្រយោជន៍របស់រុស្ស៊ីសម្រាប់តំបន់អាស៊ី។ ជំនួបរវាងមេដឹកនាំទាំងពីរ ក៏ជាការបញ្ជាក់ជំហរប្រឆាំងនឹងសហរដ្ឋអាមេរិក និងក្រុមបស្ចិមលោក ដែលបាននាំគ្នាដាក់ទណ្ឌកម្មរុស្ស៊ី ពីបទបានចូលឈ្លានពានអ៊ុយក្រែន។
នេះគឺជាលើកទីមួយហើយតាំងពីផ្ទុះវិបត្តិកូវីដ ជាងពីរឆ្នាំមក ដែលលោកស៊ីជីនពីង សម្រេចធ្វើដំណើរចេញពីប្រទេស ហើយទៅជួបលោកពូទីន នៅក្រៅដែនដីចិន។ មេដឹកនាំទាំងពីរបានជួបគ្នាជាលើកចុងក្រោយបង្អស់ នៅទីក្រុងប៉េកាំង ក្នុងពេលបើកកីឡាអូឡាំពិករដូវរងារ និងតែប៉ុន្មានថ្ងៃមុនរុស្ស៊ី បើកប្រតិបត្តិការយោធាវាយប្រហារលើក្រុងកៀវ ថ្ងៃទី ២៤កុម្ភៈ។
នាយករដ្ឋមន្ត្រីឥណ្ឌា លោក ណារិដ្រា ម៉ូឌី ក៏នឹងអញ្ជើញទៅចូលរួមក្នុងជំនួបកំពូលនៅប្រទេសអ៊ូសបេគីស្ថានដែរ ប៉ុន្តែគ្មានព័ត៌មានបញ្ជាក់ថា តើមេដឹកនាំឥណ្ឌានឹងមានកិច្ចសន្ទនាទ្វេភាគីជាមួយប្រធានាធិបតីចិន ស៊ី ជីនពីង ឬប្រធានាធិបតីរុស្ស៊ី ពូទីនទេ។ ប្រធានាធិបតីចិន និងនាយករដ្ឋមន្ត្រីឥណ្ឌា គ្មានជំនួបទ្វេភាគី តាំងពីឆ្នាំ២០១៩មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ