ធនាគារអភិវឌ្ឍន៍អាស៊ីសន្យាផ្តល់ប្រាក់កម្ចីចំនួន ១៤ ០០០លានដុល្លារដល់ក្រុមប្រទេសក្រីក្រនៅអាស៊ីប៉ាស៊ីហ្វិក
នៅថ្ងៃអង្គារ ទី២៧ កញ្ញា ធនាគារអភិវឌ្ឍន៍អាស៊ីបានសន្យាផ្តល់ប្រាក់កម្ចីចំនួន ១៤ ០០០លានដុល្លារសម្រាប់រយៈពេល ៤ឆ្នាំដល់ក្រុមប្រទេសក្រីក្រក្នុងតំបន់អាស៊ីប៉ាស៊ីហ្វិក។ កម្មវត្ថុនៃប្រាក់កម្ចី គឺដើម្បីជួយប្រទេសក្រីក្រទាំងនេះឲ្យទប់ស្កាត់នឹងអសន្តិសុខស្បៀង រួមទាំងផលវិបាកផ្សេងៗដែលកើតចេញពីការប្រែប្រួលអាកាសធាតុ។ តាមធនាគារអភិវឌ្ឍន៍អាស៊ី មានកត្តាជាច្រើនដែលបានធ្វើឲ្យពិភពលោកប្រឈមនឹងអសន្តិសុខស្បៀងនាពេលបច្ចុប្បន្ន។
ចុះផ្សាយនៅថ្ងៃ៖
ស្តាប់ - ០១:៥៩
កញ្ចប់ប្រាក់កម្ចីដែលមានទឹកលុយចំនួន ១៤ ០០០លានដុល្លារត្រូវបានធនាគារអភិវឌ្ឍន៍អាស៊ីលំអិតថា មាន ៣ ៣០០លានដុល្លារសម្រាប់ឆ្នាំ ២០២២ នេះ និងមាន ១០ ៧០០លានដុល្លារសម្រាប់រយៈពេលពីឆ្នាំ ២០២៣ ដល់ឆ្នាំ ២០២៥។ ចំណែកផ្ទាំងស៊ីបនៃប្រាក់កម្ចីដែលក្រុមប្រទេសក្រីក្រនៅអាស៊ីប៉ាស៊ីហ្វិកត្រូវយកទៅប្រើ គឺការបង្កើនផលិកម្ម និងការចែកចាយស្បៀង រួមទាំងការចាយវាយនៅក្នុងគម្រោងនៃការកាត់បន្ថយផលប៉ះពាល់អវិជ្ជមានដែលកើតចេញពីការប្រែប្រួលអាកាសធាតុ។
« អសន្តិសុខស្បៀងកំពុងគំរាមកំហែងលើភាពចម្រើនច្រើនទសវត្សន៍ក្នុងវិស័យអភិវឌ្ឍន៍នៅអាស៊ី និងនៅប៉ាស៊ីហ្វិក » នេះជាការថ្លែងរបស់ប្រធានធនាគារអភិវឌ្ឍន៍អាស៊ីលោកម៉ាសាស៊ូហ្គូ អាសាកាវ៉ានៅក្នុងសន្និសីទកាសែតតាមអនឡាញ។ លោកអាសាកាវ៉ាបានគូសបញ្ជាក់ថាបច្ចុប្បន្ន មានកត្តាជាច្រើនដែលពន្យល់ពីស្ថានភាពធ្លាក់ចុះដោយលោកបានលើកឡើងជាពិសេសពីសង្រ្គាមរុស្ស៊ីឈ្លានពានអ៊ុយក្រែន និងជំងឺឆ្លងរាលដាលសកលកូវីដ១៩ដែលបានធ្វើឲ្យសង្វាក់ផ្គត់ផ្គង់ជួបភាពរអាក់រអួល និងរុញតម្លៃស្បៀងឲ្យឡើងថ្លៃកប់ពពក។
តាមប្រធានធនាគារអភិវឌ្ឍន៍អាស៊ីរូបនេះដដែល មានមនុស្សជាង ១ ០០០លាននាក់នៅក្នុងតំបន់អាស៊ីប៉ាស៊ីហ្វិកកំពុងខ្វះចំណីអាហារដែលមានជីវជាតិទ្រទ្រង់សុខភាពដោយសារចំណីអាហារប្រភេទនេះមានតម្លៃខ្ពស់ខ្លាំង និងដោយសារភាពក្រីក្រ។ គួរបញ្ជាក់ថាថ្មីៗនេះ ធនាគារអភិវឌ្ឍន៍អាស៊ីទើបបានទម្លាក់ការព្យាករណ៍ពីកំណើនសេដ្ឋកិច្ចក្នុងតំបន់សម្រាប់ឆ្នាំ ២០២២ ពី ៥,២% មកនៅត្រឹម ៤,៣%។ ក្នុងពេលជាមួយគ្នា ធនាគារអភិវឌ្ឍន៍អាស៊ីបានដំឡើងការព្យាករណ៍ពីអតិផរណាសម្រាប់ឆ្នាំ ២០២២ ពី ៣,៧% ទៅ ៤,៥%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ