អតិផរណាជប៉ុនឡើងខ្ពស់ខ្លាំងមិនធ្លាប់មានគិតចាប់ពីឆ្នាំ១៩៩១មក
វិបត្តិទំនិញឡើងថ្លៃ កំពុងរីករាលដាលពេញពិភពលោក និងមិនសំចៃប្រទេសណាមួយឡើយ។ បន្ទាប់ពីមានបរិត្តផរណាអស់រយៈពេលជិត២០ឆ្នាំ ពេលនេះជប៉ុនក៏កំពុងមានអត្រាអតិផរណាឡើងខ្ពស់បំផុត ជាលើកទីមួយ គិតចាប់តាំងពីឆ្នាំ១៩៩១មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
អតិផរណាជប៉ុនបានឡើង៥ខែជាប់គ្នាមកហើយហើយនឹងបន្តឡើងទៀតនៅខែខាងមុខ យ៉ាងហោចរហូតដល់ដំណាច់ឆ្នាំ។ ២,៤%នៅខែកក្កដា ២,៨%នៅខែសីហា បើប្រៀបទៅឆ្នាំ២០២១... ជាអត្រាទាបទេបើប្រៀបទៅនឹងអតិផរណានៅតាមបណ្តាប្រទេសលោកខាងលិច ប៉ុន្តែខ្ពស់ជាងកម្មវត្ថុកំណត់ដោយធនាគារកណ្តាលជប៉ុន ត្រឹម២% និងជាការឡើងថ្លៃទំនិញដ៏ខ្ពស់បំផុត និងមិនធ្លាប់មានទេ ក្នុងរយៈពេល៣១ឆ្នាំកន្លងមក។
២,៨% ជាអត្រាអតិផរណាជាតិ ដែលមិនរាប់បញ្ចូលផលិតផលស្បៀងអាហារទេ។ ដោយជាក់ស្តែងទៅនោះ តម្លៃនំប៉័ងបានឡើងដល់ទៅ ១៥% ប្រេងឆា៣៦% ចំណែកថាមពល ហ្កាសនិងអគ្គីសនីវិញ ឡើង២០ និង២១%។ ជាមួយនឹងការឡើងថ្លៃបែបនេះប្រជាជនស្រទាប់កណ្តាលកំពុងរងផលវិបាកជាងគេ ដោយត្រូវបង្ខំចិត្តប្តូរផ្លាស់ទម្លាប់ទទួលទានអាហារ ដើម្បីទ្រទ្រង់ជីវភាព។
ទំនិញឡើងថ្លៃ តែប្រាក់បៀវត្សរ៍មិនឡើងតាមទេ។ ពលរដ្ឋជប៉ុនខ្លះ មានប្រាក់ខែដដែល តាំងពី១០មកហើយ។ បន្ថែមពីលើនេះទៀត លុយយ៉េនធ្លាក់ថ្លៃយ៉ាងខ្លាំង មិនធ្លាប់ប្រទះតាំងពី២៤ឆ្នាំមក។ ក្នុងរយៈពេលតែ៦ខែ លុយយ៉េនបានបាត់បង់តម្លៃអស់២០% បើប្រៀបទៅនឹងប្រាក់ដុល្លារ។ ជាលទ្ធផល ពលរដ្ឋជប៉ុនត្រូវប្រឈមនឹងការឡើងថ្លៃទំនិញយ៉ាងខ្លាំង ព្រោះ៦០%នៃ ស្បៀងអាហារជប៉ុន ជាផលិតផលនាំចូលមកពីបរទេស។
បើតាមការស្ទង់មតិ ប្រជាពលរដ្ឋជប៉ុនបីភាគបួនមិនសប្បាយចិត្តនឹងវិធានការរបស់អាជ្ញាធរប្រឈមនឹងទំនិញឡើងថ្លៃទេ។ ធនាគារកណ្តាលបានអះអាងកំពុងតាមដានស្ថានភាពវិវឌ្ឍនៃទីផ្សារហិរញ្ញវត្ថុ ផលប៉ះពាល់នៃសកម្មភាពសេដ្ឋកិច្ច តម្លៃទំនិញ យ៉ាងល្អិតល្អន់ ប៉ុន្តែធនាគារកណ្តាលយល់ថា ពុំទាន់មានលក្ខខណ្ឌគ្រប់គ្រាន់នឹងរឹតបន្តឹងនយោបាយរូបិយបណ្ណទេ។ រដ្ឋាភិបាលជប៉ុនវិញ បានអះអាងថាត្រៀមធ្វើអន្តរាគមន៍គាំទ្រប្រាក់យ៉េនដែរ ប៉ុន្តែបើតាមអ្នកជំនាញ ប្រតិបត្តិការបែបនេះស្មុគស្មាញណាស់ បើគ្មានការពិគ្រោះយោបល់ជាមួយសហរដ្ឋអាមេរិកនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ