ព្រឹត្តិការណ៍រត់ជាន់សម្លាប់មនុស្ស នៅឥណ្ឌូណេស៊ី៖ ក្រុមស៊ើបអង្កេតចាប់ផ្តើមសួរចម្លើយប៉ូលិស
នៅឥណ្ឌូណេស៊ី ២ថ្ងៃក្រោយព្រឹត្តិការណ៍រត់ជាន់គ្នា នៅក្នុងស្តាត នៅហ្សាវ៉ា ខាងកើត ក្រុមអ្នកស៊ើបអង្កេតបានចាប់ផ្តើមសួរចម្លើយ ប៉ូលិសៗដែលពាក់ព័ន្ធនឹងការប្រើកម្លាំងវាយបំបែកក្រុមអ្នកគាំទ្រ កីឡាករ។ តាមការប្រកាសរបស់ក្រសួងសុខាភិបាលឥណ្ឌូណេស៊ី ចំនួនមនុស្សស្លាប់ដោយសារហេតុការណ៍ជ្រួលច្របល់រត់ជាន់គ្នា បានកើនឡើងពី១២៥នាក់ ដល់១៣១នាក់ គិតត្រឹមថ្ងៃអង្គារនេះ។ នៅថ្ងៃអង្គារនេះដែរ ប្រធានប៉ូលិសប្រចាំតំបន់ហ្សាវ៉ាខាងកើត បានចេញមុខសូមទោស ជាសាធារណៈ។
ចុះផ្សាយនៅថ្ងៃ៖
នៅចំពោះមុខកំហឹង និងការរិះគន់របស់មហាជនដែលទាមទារឲ្យគេស្វែងរកមុខអ្នកទទួលខុសត្រូវលើព្រឹត្តិការណ៍រត់ជាន់គ្នា នៅពហុកីឡាដ្ឋាន ម៉ាឡង់ នៅហ្សាវ៉ាខាងកើត គណៈកម្មការស៊ើបអង្កេត ចាប់ផ្តើមសាកសួរចម្លើយអ្នកទទួលខុសត្រូវសំខាន់ៗរបស់ប៉ូលិសឥណ្ឌូណេស៊ី។
នៅក្រោយព្រឹត្តិការណ៍រត់ជាន់គ្នា នៅក្នុងស្តាត ដែលបានសម្លាប់មនុស្សដ៏ច្រើនមិនធ្លាប់មានក្នុងប្រវត្តិសាស្រ្តឥណ្ឌូណេស៊ី ប្រធានប៉ូលិសក្រុងម៉ាឡង់ និងសមាជិកកងកម្លាំងពិសេស ៩នាក់ ដែលល្បីខាងប្រើកម្លាំងបង្រ្កាបហិង្សា ដើម្បីបំបែកក្រុមមនុស្ស ត្រូវបានដកចេញពីតំណែង។ តាមប៉ូលិសជាតិឥណ្ឌូណេស៊ី ប៉ូលិស១៩នាក់ផ្សេងទៀតត្រូវគេសួរចម្លើយទាក់ទងនឹងហេតុការណ៍រត់ជាន់គ្នាកាលពីថ្ងៃសៅរ៍។
នៅក្នុងសន្និសីទកាសែត នៅថ្ងៃអង្គារនេះ លោកNico Afinta ប្រធានប៉ូលិសប្រចាំខេត្តហ្សាវ៉ាខាងកើត បានចេញមុខសូមទោសជាសាធារណៈ ពីការថ្លោះធ្លោយក្នុងដំណើរការ រក្សាសន្តិសុខ៕
ប៉ូលិសឥណ្ឌូណេស៊ីបានក្លាយជាគោលដៅនៃការស៊ើបអង្កេត នៅក្រោយ រងការចោទប្រកាន់ថា បានប្រើកម្លាំងបង្រ្កាបជ្រុលហួសហេតុ ជាពិសេសការបាញ់គ្រាប់បែកផ្សែងបង្ហូរទឹកភ្នែកដ៏ច្រើនសន្ធឹកសន្ធាប់ សំដៅកន្លែងអ្នកអង្គុយមើលបាល់ទាត់។ នៅថ្ងៃកើតហេតុ ប៉ូលិសឥណ្ឌូណេស៊ី ធ្លាប់អះអាងប្រើគ្រាប់បែកផ្សែង ដើម្បីបំបែកក្រុមកុបករ និងថា ប៉ូលិស២នាក់ បានស្លាប់នៅក្នុងការប៉ះទង្គិចជាមួយអ្នកគាំទ្រកីឡាករ។
ក្រុមអ្នកគាំទ្រកីឡាករ អារ៉េម៉ា FCដែលមានវត្តមានច្រើនលើសលប់នៅក្នុងស្តាត នៅថ្ងៃកើតហេតុ បានបង្ហាញជំហរប្រឆាំងនឹងកាលើកឡើងរបស់ប៉ូលិសដោយថា បើសិនមានកុបកម្មមែន ប៉ូលិសគួរបាញ់គ្រាប់បែកផ្សែងតែនៅលើទីលានប្រកួត ប៉ុន្តែ មិនត្រូវបាញ់សំដៅកន្លែងអ្នកអង្គុយមើលនោះទេ។ ការបាញ់គ្រាប់បែកផ្សែង សំដៅកន្លែងអង្គុយ បានធ្វើឲ្យអ្នកទស្សនា ភ័យស្លន់ស្លោរ ប្រញាប់ប្រញាល់រត់ចេញពីស្តាត។ ប៉ុន្តែ មនុស្សចាប់រត់ជាន់គ្នា សម្រុករកចេញ តាមទា្វរតូចៗ នៅពេលទ្វារជាច្រើនរបស់ស្តាត ត្រូវបិទនៅក្នុងពេលកំពុងកើតមានចលាចល។
ហេតុការណ៍រត់ជាន់គ្នា នៅក្នុងស្តាត នៅទីក្រុងម៉ាឡង់ ប្រទេស ឥណ្ឌូណេស៊ី បានសម្លាប់មនុស្សយ៉ាងតិច ១២៥នាក់ ដោយអ្នកខ្លះត្រូវគេរត់ជាន់ពីលើ ហើយខ្លះទៀតត្រូវថប់ដង្ហើមស្លាប់ដោយផ្សែងបង្ហូរទឹកភ្នែករបស់ប៉ូលិស។
តាមការប្រកាសរបស់ក្រសួងសុខាភិបាលឥណ្ឌូណេស៊ី សោកនាដកម្មកាលពីថ្ងៃសៅរ៍បានធ្វើឲ្យមានមនុស្សរបួស ២៨៥នាក់ ដែលនៅក្នុងនោះ ៦៦នាក់ របួសធ្ងន់។ នៅថ្ងៃអង្គារ អ្នករបួសធ្ងន់ ៦នាក់បានស្លាប់ ដែលធ្វើឲ្យចំនួនមនុស្សស្លាប់ កើនដល់ ១៣១នាក់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ