ប្រធានាធិបតីតៃវ៉ាន់ប្តេជ្ញាការពារអធិបតេយ្យជាតិ និងរបៀបរស់នៅដោយសេរី និងប្រជាធិបតេយ្យ
ប្រធានាធិបតីតៃវ៉ាន់លោកស្រីសៃ អ៊ីងវេនបានថ្លែងព្រមានចិនដីគោកនាឱកាសបុណ្យជាតិថ្ងៃចន្ទ ទី១០ តុលានេះថា តៃវ៉ាន់នឹងមិនបោះបង់ចោលជាដាច់ខាតនូវសេរីភាព និងរបៀបរស់នៅដោយប្រជាធិបតេយ្យ។ នៅក្នុងសុន្ទរកថាដដែល លោកស្រីសៃ អ៊ីងវេនមិនភ្លេចលើកឡើងពីសង្រ្គាមរុស្ស៊ីឈ្លានពានអ៊ុយក្រែនដែលបានបង្កើនឲ្យមានការព្រួយបារម្ភនៅតៃវ៉ាន់ពីការប៉ុនប៉ងចូលលុកលុយតៃវ៉ាន់ពីសំណាក់ចិនដីគោក។ តាមលោកស្រីសៃ អ៊ីងវេន ការបំផ្លិចបំផ្លាញលទ្ធិប្រជាធិបតេយ្យ និងសេរីភាពរបស់តៃវ៉ាន់ជាបរាជ័យយ៉ាងធ្ងន់ធ្ងរសម្រាប់លទ្ធិប្រជាធិបតេយ្យក្នុងលោក។ គួរបញ្ជាក់ថា ពលរដ្ឋតៃវ៉ាន់ទាំង ២៣លាននាក់កំពុងរស់នៅដោយការគំរាមកំហែងជាប់ជាប្រចាំពីការចូលឈ្លានពានរបស់ចិនដីគោក។ តែអ្នកជំនាញលោកវ៉ាំងសង់ គ្រ័រហ្សឺឡូបានយល់ឃើញថា ប្រតិបត្តិការយោធារបស់ចិនលើតៃវ៉ាន់មិនមែនជារឿងងាយស្រួល ព្រោះជាប្រតិបត្តិការស្មុគស្មាញ លំបាក និងប្រកបដោយហានិភ័យខ្ពស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
« គឺពិបាកខ្លាំងណាស់ និងក៏គ្រោះថ្នាក់ខ្លាំងណាស់ដែរ ព្រោះតាមពិតទៅ វាជាប្រតិបត្តិការមួយដែលតម្រូវឲ្យមានការបញ្ជូនតាមសមុទ្រនូវកងទ័ពក្នុងចំនួនដ៏ច្រើនសម្បើម បញ្ជូនរថយន្តដ៏សន្ធឹកសន្ធាប់ និងត្រូវមានឡូជីស្ទិកយ៉ាងសំខាន់។ ដូច្នេះ គេត្រូវការនាវាយ៉ាងច្រើនសម្បើម ពិសេសនាវាជំនាញដែលអាចដឹកជញ្ជូនទ័ព រួមទាំងគ្រឿងសព្វាវុធគ្រប់ប្រភេទសំដៅទៅកាន់ឆ្នេររបស់តៃវ៉ាន់។
នាវាជំនាញប្រភេទនេះច្រើនជានាវាដែលមានល្បឿនយឺតខ្លាំង និងងាយរងគ្រោះខ្លាំង។ ដើម្បីអាចឲ្យប្រតិបត្តិការដឹកជញ្ជូនទ័ព និងគ្រឿងសព្វាវុធគ្រប់ប្រភេទមានដំណើរការដោយសុវត្ថិភាព និងរលូនបាន គឺត្រូវមានលក្ខខណ្ឌមួយ។ លក្ខខណ្ឌនោះ គឺចិនត្រូវគ្រប់គ្រងឲ្យបាននូវដែនសមុទ្រ និងដែនអាកាសរបស់តៃវ៉ាន់។ ប្រសិនបើចិនមិនអាចគ្រប់គ្រងដែនអាកាសតៃវ៉ាន់បានទាំងស្រុងទេ កងទ័ពចិនដែលកំពុងធ្វើដំណើរតាមសមុទ្រងាយនឹងរងគ្រោះដោយការវាយប្រហារផ្លូវអាកាសខ្លាំងណាស់។
ទន្ទឹមគ្នានេះ នៅមានប្រព័ន្ធការពារតាមឆ្នេរ និងប្រព័ន្ធការពារផ្លូវសមុទ្ររបស់តៃវ៉ាន់។ សរុបមកវិញ មុននឹងចាប់ផ្តើមបើកការវាយប្រហារតៃវ៉ាន់ជាយថាហេតុ ចិនគួរណាស់តែត្រូវកំចាត់កងទ័ពជើងទឹកតៃវ៉ាន់ កម្ទេចប្រព័ន្ធការពារតាមឆ្នេរតៃវ៉ាន់ ហើយមុនគេ គឺត្រូវកំចាត់កងទ័ពអាកាសតៃវ៉ាន់ដើម្បីអាចឲ្យកងទ័ពចិនដាក់ជើងលើកោះតៃវ៉ាន់បាន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ