ប្រទេសអូស្រ្តាលីប្តូរចិត្តដោយឈប់ទទួលស្គាល់ហ្សេរ៉ុយសាឡឹមជាទីក្រុងរបស់អ៊ីស្រាអែល
នៅក្នុងប្រទេសអូស្រា្តលី រដ្ឋាភិបាលបានប្រកាសក្នុងថ្ងៃអង្គារ ទី១៨ តុលាពីការឈប់ទទួលស្គាល់ហ្សេរុយសាឡឹមជាទីក្រុងផ្តាច់មុខរបស់ប្រទេសអ៊ីស្រាអែល។ រដ្ឋាភិបាលអ៊ីស្រាអែលបានបញ្ចេញប្រតិកម្មភ្លាមភ្លែតដោយចាត់ទុកការសម្រេចចិត្តរបស់អូស្រា្តលីថាជាចម្លើយទាន់ហន់តបនឹងព័ត៌មានមិនពិតនៅក្នុងសារព័តមាន។ តែរដ្ឋអំណាចប៉ាឡេស្ទីនបានស្វាគមន៍លើការសម្រេចចិត្តរបស់អូស្រា្តលី។ គួររម្លឹកថា គឺរដ្ឋាភិបាលអូស្រ្តាលីក្នុងជំនាន់នាយករដ្ឋមន្រ្តីលោកស្កុត ម៉ូរីសសុនដែលបានទទួលស្គាល់ហ្សេរុយសាឡឹមជាទីក្រុងរបស់អ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:២៥
ការប្តូរចិត្តឈប់ទទួលស្គាល់ហ្សេរុយសាឡឹមជាទីក្រុងផ្តាច់មុខរបស់អ៊ីស្រាអែលត្រូវបានប្រមុខការទូតអូស្រ្តាលីលោកស្រីផេនី វ៉ុងបញ្ជាក់ថា លក្ខន្តិកទីក្រុងហ្សេរុយសាឡឹមត្រូវដោះស្រាយតាមរយៈការចរចារវាងអ៊ីស្រាអែល និងប៉ាឡេស្ទីន ពោលមិនមែនតាមការសម្រេចចិត្តជាលក្ខណៈអន្តោម័តទេ។ លោកស្រីផេនី វ៉ុងបានបន្ថែមថា ស្ថានទូតអូស្រា្តលីប្រចាំអ៊ីស្រាអែលតែងស្ថិតនៅទីក្រុងតេឡាវីជានិច្ច។ ជំហរវិលក្រោយវិញរបស់អូស្រ្តាលីពេលនេះដូចគ្នានឹងការចង់បានរបស់អង្គការសហប្រជាជាតិដែលថា លក្ខន្តិកទីក្រុងហ្សេរុយសាឡឹមត្រូវតែជាកម្មវត្ថុនៃកិច្ចព្រមព្រៀងរវាងអ៊ីស្រាអែល និងប៉ាឡេស្ទីន។
តែនេះមិនមែនជាការទាមទារចង់បានរបស់អ៊ីស្រាអែលទេ។ នៅក្នុងសេចក្តីប្រកាសព័ត៌មានចេញផ្សាយក្នុងថ្ងៃអង្គារ ទី១៨ តុលា នាយករដ្ឋមន្រ្តីអ៊ីស្រាអែលលោកយ៉ាអៀរ ឡាពីដបានចាត់ទុកការសម្រេចចិត្តរបស់អូស្រា្តលីថាជាចម្លើយតក់ក្រហល់នឹងព័ត៌មានមិនពិតនៅក្នុងសារព័ត៌មាន។ តែលោកយ៉ាអៀរ ឡាពីដមិនបានបញ្ជាក់ពីព័ត៌មានមិនពិតណាមួយទេ។ ចំណែកក្រសួងការបរទេសអ៊ីស្រាអែលបានកោះហៅឯកអគ្គរដ្ឋទូតអូស្រា្តលីប្រចាំអ៊ីស្រាអែលទៅជួបដើម្បីសម្តែងការខកចិត្តជាពន់ពេករបស់រដ្ឋាភិបាលអ៊ីស្រាអែលចំពោះការសម្រេចចិត្តរបស់អូស្រា្តលី។
យ៉ាងណាក៏ដោយ ប្រមុខការទូតអូស្រ្តាលីលោកស្រីផេនី វ៉ុងបានគូសបញ្ជាក់ថា ការសម្រេចចិត្តរបស់អូស្រា្តលីនេះមិនមែនជាទង្វើប្រឆាំងអ៊ីស្រាអែល និងថា ការគាំទ្ររបស់អូស្រា្តលីចំពោះអ៊ីស្រាអែល និងសហគមន៍ជ្វីហ្វនៅអូស្រា្តលីមិនប្រែប្រួលទេ។ ទន្ទឹមគ្នានេះ លោកស្រីផេនី វ៉ុងមិនភ្លេចបញ្ជាក់ពីការគាំទ្ររបស់អូស្រា្តលីចំពោះប៉ាឡេស្ទីន ក្នុងនោះក៏មានជំនួយមនុស្សធម៌ដែរ។ ខុសពីអ៊ីស្រាអែល ប៉ាឡេស្ទីនបានស្វាគមន៍លើការសម្រេចចិត្តរបស់អូស្រា្តលី និងបានសាទរលើការសន្យារបស់អូស្រា្តលីដែលថា អនាគតអធិបតេយ្យភាពទីក្រុងហ្សេរុយសាឡឹមអាស្រ័យលើដំណោះស្រាយអចិន្ត្រៃយ៍ដោយផ្អែកលើភាពស្របច្បាប់អន្តរជាតិ។ គួរបញ្ជាក់ថាសព្វថ្ងៃ មានតែ ៤ប្រទេសដែលបានទទួលស្គាល់ហ្សេរុយសាឡឹមជាទីក្រុងផ្តាច់មុខរបស់អ៊ីស្រាអែល គឺអាមេរិក កូសូវ៉ូ ហុងឌូរ៉ាស និងក្វាតេម៉ាឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ