នយោបាយសូន្យកូវីដរបស់ចិន កំពុងទម្លាក់តួលេខពាណិជ្ជកម្ម ជាលើកទីមួយ
នយោបាយសូន្យកូវីដ អមដោយភាពប្រឈមនឹងសេដ្ឋកិច្ចពិភពលោកដើរថយក្រោយ បានធ្វើឱ្យការនាំចេញរបស់ចិន ស្គាល់ការធ្លាក់ចុះជាលើកទីមួយ គិតចាប់តាំងពីឆ្នាំ២០២០។ នេះបើតាមតួលេខផ្លូវការ ប្រចាំខែតុលា២០២២ ដែលបញ្ជាក់ថាសកម្មភាពនាំចូលរបស់ចិន ក៏រងការប៉ះពាល់ដែរ។
ចុះផ្សាយនៅថ្ងៃ៖
ចិនបន្តអនុវត្តនយោបាយសូន្យកូវីដយ៉ាងតឹងតែង ដោយបន្តធ្វើតេស្តរកកូវីដស្ទើរជារៀងរាល់ថ្ងៃ ធ្វើចត្តាឡីស័កជាចាំបាច់រាល់គ្រប់បុគ្គលវិជ្ជមាននិង បិទខ្ទប់សង្កាត់នៅពេលមានលេចករណីឆ្លងកូវីដក្នុងសហគមភ្លាម។ តែវិធានការនេះ ជាហ្វាំងទប់សកម្មភាពសេដ្ឋកិច្ចនិងលទ្ធភាពចាយវាយរបស់ពលរដ្ឋ។
កាលពីខែកញ្ញា ការនាំចេញនៅមានកំណើន៥,៧% ក្នុងមួយឆ្នាំ។ តែនៅខែតុលា២០២២ បើតាមតួលេខផ្លូវការ ការនាំចេញចិនបានធ្លាក់ចុះ០,៣%ក្នុងមួយឆ្នាំ។ នេះគឺជាលើកទីមួយគិតចាប់តាំងពីខែឧសភា២០២០មក ដែលសន្ទទស្សន៍ពាណិជ្ជកម្មបានធ្លាក់ចុះបែបអវិជ្ជមានដូច្នេះ។ មិនតែប៉ុណ្ណោះ អ្នកជំនាញធនាគារNomura បានព្យាករថា ទិន្ននាការនៃការនាំចេញនឹងបន្តធ្លាក់ចុះនៅពីរខែខាងមុខទៀត ដែលនឹងជះឥទ្ធិពលអវិជ្ជមានលើវិស័យសេដ្ឋកិច្ចចិនទាំងមូលផង ព្រោះថា ការនាំចេញជាក្បាលម៉ាស៊ីនអូសទាញកំណើនផលិតផលសរុបក្នុងស្រុកដ៏ចម្បងរបស់ចិន តាំងពីឆ្នាំ២០២០។ ដូច្នេះការនាំចេញអាប់អួរនឹងធ្វើឱ្យកំណើនសេដ្ឋកិច្ច ទីផ្សារការងារ និងវិនិយោគត្រូវរងផលប៉ះពាល់ដោយចៀសមិនរួចឡើយ។
មូលហេតុសំខាន់មួយទៀត ដែលធ្វើឱ្យការនាំចេញចិនថយចុះ គឺគ្រោះធ្លាក់ក្នុងវិបត្តិសេដ្ឋកិច្ចដើរថយក្រោយ នៅត្រីមាសខាងមុខ បូករួមនឹងវិបត្តិថាមពលឡើងថ្លៃ នៅសហរដ្ឋអាមេរិកនិងសហភាពអឺរ៉ុប។
ចំណែកការនាំចូលចិន ក៏បានធ្លាក់ចុះអស់០,៧%ដែរ នៅខែតុលានេះ។ ការនាំចូលចិន ធ្លាប់ធ្លាក់ចុះម្តងកាលពីខែមីនា ពោលគឺមុនពេលក្រុងសៀងហៃបិទខ្ទប់ ក្រោយមានការឆ្លងរាលដាលកូវីដ១៩។
តួលេខពាណិជ្ជកម្មដ៏អាក្រក់ ទំនងអាចជាគន្លឹះចុចគ្រលាស់ចិនឱ្យប្តូរផ្លាស់នយោបាយសូន្យកូវីដ នេះបើតាមសេដ្ឋវិទូKen Cheung នៃធនាគារជប៉ុនMizuho។ ប៉ុន្តែសម្រាប់អ្នកវិភាគធនាគារNomura ពួកគេសំឡឹងឃើញថា ចិនមិនអាចលើកនយោបាយសូន្យកូវីដនៅមុខខែមីនា២០២៣ទេ។
ការនាំចេញនាំចូលចិនចុះថយមែន ប៉ុន្តែសល់ផលពាណិជ្ជកម្ម នៅខែតុលា មានដល់ទៅ ៨៥,១៥ពាន់លានដុល្លារ ទល់នឹងកាលពីខែកក្កដា ១០១,២ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ