ចំនួនមនុស្សរស់នៅលើផែនដីឡើងដល់៨ពាន់លាននាក់ តើច្រើនជ្រុលឬ ?
ចំនួនមនុស្សរស់នៅលើផែនដី នឹងកើនឡើងដល់៨ពាន់លាននាក់ នៅថ្ងៃទី ១៥វិច្ឆិកា ២០២២ ហើយនឹងបន្តឡើងរហូតដល់១០ពាន់លាននាក់ មុននឹងចាប់ផ្តើមធ្លាក់ចុះមកវិញនៅចុងសតវត្សរ៍ (២១០០)។ បើមានកំណើនឥតឈប់ដូច្នេះ តើផែនដីអាចមានធនធានគ្រប់គ្រាន់នឹងចិញ្ចឹមមនុស្សទាំងអស់នេះទេ? សម្រាប់អ្នកជំនាញមួយភាគធំ ចំនួនមនុស្សមិនមែនជាបញ្ហាទេ តែគឺរបៀបរបបរស់នៅ និងការប្រើធនធានរបស់ផែនដីហួសចំណុះទេ ដែលនាំឱ្យផែនដីចិញ្ចឹមមិនរស់។
ចុះផ្សាយនៅថ្ងៃ៖
ស្តាប់ - ០២:២១
ដោយសារ មានអាយុវែងជាងមុន បូកផ្សំនឹងអត្រាមរណៈកុមារនិងទារកធ្លាក់ចុះ ចំនួនមនុស្សនៅលើផែនដីនឹងឡើងដល់៨ពាន់លាននាក់ នៅពាក់កណ្តាលខែវិច្ឆិកា ពោលគឺច្រើនជាងកាលពីឆ្នាំ១៩៥០ ដល់ទៅជាងបីដង។ នេះបើតាមមូលនិធិអង្គការសហប្រជាជាតិដើម្បីប្រជាជន ដែលលម្អិតថា ថ្វីបើកំណើនមនុស្សក៏ចាប់បន្ថយល្បឿន តាំងពីឆ្នាំ១៩៦០មកចំនួន២,១% និងមកនៅត្រឹម០,៥% នៅម្តុំឆ្នាំ២០៥០ក៏ដោយ ក៏ផែនដីនឹងមានមនុស្សកាន់តែច្រើនឡើងៗជាលំដាប់ រហូតដល់៨៥០០លាននាក់នៅឆ្នាំ២០៣០ ជាង៩ពាន់លាននាក់នៅឆ្នាំ២០៥០ និងឡើងនៅឆ្នាំ២០៨០ ដល់ជាង១០,៤លាននាក់។ បន្ទាប់មកចំនួនមនុស្សនឹងចាប់នៅថេរទល់នឹងឆ្នាំ២១០០ មិនមែនធ្លាក់ចុះមកនៅត្រឹម៨,៨ពាន់លាននាក់ ដូចការសិក្សារបស់វិទ្យាស្ថានវាយតម្លៃសុខភាពអាមេរិក (Institute for health Metrics and Evoluation) ចេញផ្សាយកាលពីឆ្នាំ២០២០។
បើតាមអង្គការសហប្រជាជាតិ ចំនួនក្មេងពេញវ័យបង្កកំណើតកើនឡើងខ្លាំងជាចំណែកសំខាន់មួយដែរក្នុងការបង្កើនចំនួនមនុស្សជាតិ បើទោះបីជាអត្រាបង្កកំណើតរបស់ស្ត្រីចាប់ធ្លាក់ចុះក៏ដោយ។ ស្រ្តីម្នាក់មានកូនជាមធ្យម២,១នាក់ នៅឆ្នាំ២០៥០ ទល់នឹង៥នាក់កាលពីឆ្នាំ ១៩៥០។
ប៉ុន្តែសូមកុំព្រួយបារម្ភ គិតថាផែនដីមានមនុស្សច្រើនជ្រុល ហើយខ្វះធនធានសម្រាប់រស់។ នេះជាពាក្យអំពាវនាវរបស់អង្គការសហប្រជាជាតិ ដែលពន្យល់ថាសម្រាប់អ្នកជំនាញជាច្រើន ចំណោទមិនស្ថិតនៅលើចំនួនមនុស្សទេ តែគឺរបៀបរបបរស់នៅនិងប្រើប្រាស់ធនធានហួសប្រមាណរបស់មនុស្សទេ ដែលធ្វើឱ្យផែនដីឡើងកម្តៅនិងមិនអាចផ្តល់ធនធនគ្រប់គ្រាន់សម្រាប់ចិញ្ចឹមមនុស្សជាតិ។ គំរូរស់នៅបច្ចុប្បន្ន តម្រូវឱ្យមានផែនដី ១,៧៥ ទើបអាចតបនឹងសេចក្តីត្រូវការរបស់មនុស្សជាតិប្រកបដោយនិរន្តរភាពបាន។ បើតាមរបាយការណ៍របស់ WWF បើរស់ដូចពលរដ្ឋឥណ្ឌា នោះមនុស្សជាតិស្រូបធនធានផែនដីតែ៨០%ប៉ុណ្ណោះក្នុងមួយឆ្នាំៗ ទល់នឹងត្រូវការផែនដីដល់ទៅ៥បើរស់របៀបអាមេរិក។
នៅឆ្នាំ២០៥០ អាមេរិក និង នីហ្សេរីយ៉ា នឹងក្លាយជាប្រទេសមានប្រជាជនច្រើនទីបី (៣៧៥លាននាក់) ចំណែកលេខមួយនឹងត្រូវបានទៅឥណ្ឌា ជាមួយនឹងចំនួនប្រជាជន១៦៦០លាននាក់នៅឆ្នាំ។ ចិនធ្លាក់មកនៅលំដាប់ទីពីរ ដោយមានចំនួនប្រជាជនតែ ១៣០០លាននាក់នៅឆ្នាំ២០៥០ទល់នឹង១៤២០លាននាក់នៅឆ្នាំ២០២២ ហើយត្រឹមតែ៨០០លាននាក់នៅដំណាច់សតវត្សរ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ