ការសិក្សា ៖ ទឹកភ្លៀងនៅទូទាំងពិភពលោក ជាទឹកមិនស្អាតសម្រាប់បរិភោគ
ទឹកភ្លៀងជាទឹកមិនស្អាត មិនអាចបរិភោគបានទេ ព្រោះមានជាតិពុលហួសកំរិតសុវត្ថិភាពសុខភាព។ នេះបើតាមការសិក្សាថ្មីមួយ របស់ក្រុមអ្នកស្រាវជាវវិទ្យាសាស្ត្រនៃសកលវិទ្យាល័យស្តុកខុល ចេញផ្សាយក្នុងទស្សនាវដ្តីបរិស្ថាន Environmental Science and Technology។
ចុះផ្សាយនៅថ្ងៃ៖
ស្តាប់ - ០២:១២
បើតាមទិន្នន័យ គ្មានតំបន់ណាមួយនៃភពផែនដី មានទឹកភ្លៀង ជាទឹកស្អាត អាចបរិភោគបានទេ។ នេះជាសេចក្តីប្រកាសរបស់លោក អៀន ខាហ្សិន Ian Cousins សាស្ត្រាចារ្យនៅសកលវិទ្យាល័យស្តុកខុល ដែលជាអ្នកដឹកនាំសិក្សាអំពីគុណភាពទឹកភ្លៀង។
តាមរយៈទិន្នន័យប្រមូលបានតាំងពីឆ្នាំ២០១០មក ក្រុមការងាររបស់លោក អៀន ខាហ្សិន បានវិភាគឃើញថា សូម្បីតែនៅតំបន់អង់តាកទិក និងខ្ពង់រាបទីបេ ដែលគេចាត់ទុកជាកន្លែងមានបរិស្ថានល្អជាងគេ ក៏គេរកឃើញមានជាតិពុលក្នុងទឹកភ្លៀង លើសកំរិតសុវត្ថិភាពដែលភ្នាក់ងារការពារបរិសា្ថនអាមេរិកកំណត់ដែរ។ ទឹកភ្លៀង នៅតំបន់ទាំងពីរ មានកំរិតជាតិពុល Per polyfluoroalkylées ហៅកាត់ថា PFAS ដល់ទៅ១៤ដងលើសទឹកស្អាតសម្រាប់បរិភោគនៅសហរដ្ឋអាមេរិក។
មាននៅក្នុងសំបកវេចខ្ចប់ សាប៊ូកក់សក់ ឬក្នុងផលិតសំអាង PFAS ជាប់ងារថាជា “សារធាតុគីមីអមតៈ” ព្រោះវាអាចបញ្ជ្រាបចូលក្នុងសរីរាង្គកាយមនុស្សយ៉ាងយឺតៗជាទីបំផុត ហើយកកគផ្តុំនៅក្នុងខ្លួនយើង។ ការសិក្សាខ្លះបានបញ្ជាក់ថា PFAS អាចបង្កឥទ្ធិពលអាក្រក់លើសុខភាពច្រើនយ៉ាងដូចជា ធ្វើឱ្យមនុស្សអារ ធ្វើឱ្យទារកក្នុងផ្ទៃលូតលាស់មិនល្អ អាចបង្កហានិភ័យកើតជំងឺមហារីក (ប្រូស្តាត តម្រងនោម និងពងស្វាស) និងបង្កើនកំរិតជាតិខ្លាញ់ក្នុងឈាម។ ក្រោយពីរកឃើញថា PFAS អាចនឹងធ្វើឱ្យប្រព័ន្ធការពារខ្លួនកុមារមិនឆ្លើយតបនឹងថ្នាំបង្ការ ភ្នាក់ងារបរិស្ថានអាមេរិក ទើបបានបន្ទាបកំរិតសុវត្ថភាពសារធាតុគីមីអតមៈ ក្នុងទឹកស្អាតបន្ថែមទៀត។ នេះបើតាមលោកសាស្ត្រាចារ្យអៀន ខាហ្សិនដដែល។
នៅក្នុងរបាយការណ៍លោក ខាហ្សិន បានអះអាងថា ពេលនេះ សារធាតុគីមី PFAS មានគ្រប់ទិសទីនិងកាន់ក្រាស់ លែងអាចជម្រះបាត់ពីផែនដីបានហើយ។ ជាតិពុលបានឆ្លងពេញផែនដី ដោយមិនអាចបកថយបានទេ ហើយគ្មានដីមួយដុំណាមួយស្អាត មានសុវត្ថិភាពគ្រប់គ្រាន់សម្រាប់ជីវិតឡើយ។ ដូច្នេះមនុស្សជាតិត្រូវរៀនរស់មួយជាតិពុលនេះ ដែលមាននៅគ្រប់ទិសទី នៅលើភ្នំ ក្នុងប្រភពទឹក ឬចំណីអាហារ។
២០ឆ្នាំចុងក្រោយនេះ កំរិតជាតិពុល PFAS ក្នុងសរីរាង្គកាយមនុស្សបានចុះថយគួរជាទីកត់សម្គាល់ តែកំរិតជាតិពុលPFAS ក្នុងបរិយាកាសនៅដដែល។ ការចុះថយ គឺដោយសារ គេបានយល់ពីកាន់តែច្រើនពីភាពពុលរបស់សារធាតុគីមីមួយនេះ និងបានផ្តល់អនុសាសន៍ឱ្យបន្ថយកំរិតPFASក្នុងផលិតផល បានជាងមួយ១លានដងតាំងពីឆ្នាំ២០០០មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ