ចិនអំពាវនាវឲ្យអូស្រា្តលីកសាងឡើងវិញនូវទំនុកចិត្តរវាងគ្នាទៅវិញទៅមក
នៅថ្ងៃអង្គារ ទី៨ វិច្ឆិកា ប្រមុខការទូតចិនលោកវ៉ាង យីបានជួបសន្ទនាតាមទូរស័ព្ទជាមួយសមភាគីអូស្រ្តាលីលោកផេនី វ៉ុង។ នៅក្នុងកិច្ចសន្ទនា លោកវ៉ាង យីបានអំពាវនាវឲ្យអូស្រា្តលីកសាងឡើងវិញនូវទំនុកចិត្តរវាងគ្នាទៅវិញទៅមក។ ការមានកិច្ចសន្ទនារវាងថ្នាក់ដឹកនាំចិន និងអូស្រា្តលីពេលនេះជាសញ្ញានៃភាពធូរស្រាលមួយ បន្ទាប់ពីប្រទេសទាំងពីរបានស្គាល់ភាពតានតឹងរវាងគ្នាអស់ជាច្រើនឆ្នាំ ពោលតាំងពីមុនផ្ទុះជំងឺឆ្លងរាលដាលកូវីដ១៩ ទៅទៀត។
ចុះផ្សាយនៅថ្ងៃ៖
ស្តាប់ - ០២:២៥
តាំងពីថ្ងៃផ្ទុះជំងឺកូវីដ១៩ដំបូងមកដល់ពេលនេះ អូស្រា្តលី និងចិនមិនដែលមានជំនួបកម្រិតខ្ពស់ជាសាធារណៈរវាងគ្នាទេ។ នេះក៏ដោយសារតែនៅក្នុងឆ្នាំ ២០២០ អូស្រា្តលីបានចេញមុខស្នើជាផ្លូវការឲ្យមានការស៊ើបអង្កេតឯករាជ្យមួយស្តីពីប្រភពជំងឺកូវីដ១៩នៅចិន។ សំណើនេះបានធ្វើឲ្យចិនក្តៅស្លឹកត្រចៀកដោយក្រុងប៉េកាំងយល់ថា អូស្រ្តាលីបានធ្វើតាមបញ្ជារបស់អាមេរិកដើម្បីប្រឆាំងខ្លួន។ ជាវិធានការវាយបកវិញ ចិនបានឈប់ទិញផលិតផលអូស្រា្តលីជាង ១០ មុខ ក្នុងនោះមានធ្យូងថ្ម ស្រា និងគ្រាប់ធញ្ញជាតិ។ តែតាំងពីការឡើងកាន់អំណាចរបស់លោកអង់តូនី អាល់បានីស៊ីក្នុងខែឧសភា ឆ្នាំ ២០២២ នៅអូស្រ្តាលីមក ទំនាក់ទំនងរវាងប្រទេសទាំងពីរបានស្គាល់ភាពធូរស្រាលឡើងវិញបន្តិចដោយមានជំនួបផ្ទាល់ចំនួនពីរដងរវាងប្រមុខការទូតនៃប្រទេសទាំងពីរ។
« ការបន្ធូរបន្ថយ និងការធ្វើឲ្យបានប្រសើរនូវទំនាក់ទំនងចិន អូស្ត្រាលី គឺស្របតាមផលប្រយោជន៍ជាមូលដ្ឋានរបស់ភាគីទាំងពីរ » នេះជាការថ្លែងរបស់ប្រមុខការទូតចិនលោកវ៉ាង យីនៅក្នុងសេចក្តីប្រកាសព័ត៌មានមួយ។ តាមសេចក្តីប្រកាសព័ត៌មានដដែល លោកវ៉ាង យីបានគូសបញ្ជាក់ថា ចិន និងអូស្រា្តលីត្រូវកសាងឡើងវិញទំនុកចិត្តរវាងគ្នា និងរួមគ្នាដោះស្រាយក្តីកង្វល់ទៅវិញទៅមក ព្រមទាំងចូលរួមដោះស្រាយបញ្ហាប្រឈមរបស់ពិភពលោក។ តាមក្រុមអ្នកវិភាគ ប្រធានាធិបតីចិនលោកស៊ី ជីនពីងអាចមានជំនួបជាមួយនាយករដ្ឋមន្រ្តីអូស្រា្តលីលោកអង់តូនី អាល់បានីស៊ីនាឱកាសជំនួបកំពូល G២០ ដែលគ្រោងរៀបចំនៅកោះបាលី ប្រទេសឥណ្ឌូណេស៊ីនាសប្តាហ៍ក្រោយ។
ទោះជាយ៉ាងនេះក្តី គេនៅមិនអាចនិយាយពីទំនាក់ទំនងប្រក្រតីរវាងចិន និងអូស្រា្តលីបាននៅឡើយទេ។ ចិនបានរិះគន់ចាស់ដៃលើកិច្ចព្រមព្រៀងដែលអូស្រា្តលីបានចុះហត្ថលេខាជាមួយអាមេរិក និងអង់គ្លេសក្នុងឆ្នាំ ២០២២ នេះ។ គឺជាកិច្ចព្រមព្រៀងដែលអាមេរិកលក់នាវាមុជទឹកដើរដោយនុយក្លេអ៊ែរទៅឲ្យក្រុងកង់បេរ៉ា។ ក្រុងប៉េកាំងបានចាត់ទុកកិច្ចព្រមព្រៀងនេះជាការគំរាមកំហែងលើសន្តិសុខខ្លួន និងក៏ជាហានិភ័យនៃការសាយភាយនុយក្លេអ៊ែរដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ