អាមេរិក ជប៉ុន និងអូស្ត្រាលីសន្យាពង្រឹងកិច្ចសហការយោធា ដើម្បីទប់ទល់ចិន
រដ្ឋមន្រ្តីការពារជាតិអាមេរិក ជប៉ុន និងអូស្ត្រាលីប្រកាសជំរុញសហប្រតិបត្តិការយោធា ដើម្បី ទប់ទល់មហាអំណាចចិន។ នៅក្នុងជំនួបត្រីភាគី នៅទីបញ្ជាការដ្ឋានទ័ពអាមេរិក នៅHonolulu លើកោះហាវ៉ៃ កាលពីថ្ងៃសៅរ៍ ប្រមុខការពារជាតិអាមេរិក អូស្ត្រាលី និងជប៉ុន មានជំហរយល់ឃើញដូចគ្នា នោះគឺ ចិនកំពុងធ្វើសកម្មភាពកាន់តែគំរាមកំហែង ទៅលើកោះតៃវ៉ាន់ ហើយនិងទីកន្លែងផ្សេងទៀត ក្នុងតំបន់អាស៊ីប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០២:១៨
ក្នុងពេលទទួលជួបសមភាគីជប៉ុន និងអូស្ត្រាលី កាលពីថ្ងៃសៅរ៍ រដ្ឋមន្រ្តីការពារអាមេរិក លោក ឡយ អូស្ទីន Lloyd Austin បានលើកឡើងពីក្តីបារម្ភរបស់អាមេរិក នៅចំពោះមុខឥរិយាបទកាន់តែបង្កហេតុ និងគំរាមកំហែងរបស់ចិន នៅច្រកសមុទ្រតៃវ៉ាន់ និងនៅក្នុងតំបន់។ រដ្ឋមន្រ្តីការពារជាតិអូស្ត្រាលី លោក រីឆាត ម៉ាល់Richard Marles បាននិយាយសង្កត់ធ្ងន់ ដោយរិះគន់មហាអំណាចចិនថា កំពុងចង់ចាត់ចែងតំបន់ជុំវិញ ចិន នៅក្នុងរបៀបមួយដែលគេមិនធ្លាប់ឃើញមានពីមុនមក។
សម្រាប់រដ្ឋមន្រ្តីការពារជាតិជប៉ុន លោកយ៉ាស៊ុយកាហ្សុយ ហាម៉ាដា Yasukazu Hamada នៅចំពោះមុខមហិច្ឆតារបស់ចិន ដែលរំលោភលក្ខន្តិកៈ ដែលមានពីមុនមក នៅសមុទ្រចិនខាងត្បូង និងនៅសមុទ្រចិនខាងកើត និងការគំរាមកំហែង បាញ់មីស៊ីលរបស់កូរ៉េខាងជើង សម្ព័ន្ធមិត្តអាមេរិក ជប៉ុន និងអូស្ត្រាលី គួរ ពិភាក្សាគ្នាពីអ្វីដែលគេអាចធ្វើបាន ដើម្បីពង្រឹងសមត្ថភាពទប់ទល់ និងវាយបក នៅក្នុងតំបន់។
វត្តមានរបស់រដ្ឋមន្រ្តីការពារជាតិជប៉ុន និងអូស្ត្រាលី នៅទីបញ្ជាការដ្ឋានកងទ័ពអាមេរិក នៅលើកោះហាវ៉ៃ ជាផ្នែកមួយ នៃយុទ្ធនាការទូតរបស់អាមេរិក ដើម្បីទប់ទល់ឥទ្ធិពលរបស់ចិន នៅក្នុងតំបន់យុទ្ធសាស្រ្តដូចជាអាស៊ីប៉ាស៊ីហ្វិក។
នៅថ្ងៃព្រហស្បតិ៍ អាមេរិកបានប្រកាសផ្តល់កញ្ចប់ជំនួយ៨១០លានដុល្លារសម្រាប់ជួយប្រទេសកោះ នៅប៉ាស៊ីហ្វិកខាងត្បូង ជាទីដែលអាមេរិកគ្រោងនឹងបង្កើនសកម្មភាពការទូតរបស់ខ្លួន។
ឆ្លៀតឱកាសនៃជំនួបទ្វេភាគី ជាមួយរដ្ឋមន្រ្តីការពារអូស្ត្រាលី ប្រមុខការពារជាតិអាមេរិកបានផ្តោតសំខាន់ផងដែរលើកិច្ចព្រមព្រៀងAUKUS ឆ្នាំ ២០២១ ដែលនិយាយពីការទិញនាវាមុជទឹកដើរដោយនុយក្លេអ៊ែររបស់អាមេរិក សម្រាប់បំពាក់ឲ្យកងទ័ពអូស្ត្រាលី។ ត្រូវបានអញ្ជើញឲ្យទៅត្រួតពិនិត្យមើលនាវាមុជទឹកទំនើបចុងក្រោយ របស់អាមេរិក USS Mississipi នៅមូលដ្ឋានទ័ពជើងទឹកអាមេរិក នៅPearl Harbor រដ្ឋមន្រ្តីការពារជាតិអូស្ត្រាលីបានបញ្ជាក់ទៅសមភាគីអាមេរិក ពីសារៈសំខាន់នៃកាលបរិច្ឆេទ ការផ្គត់ផ្គង់នាវាមុជទឹកសម្រាប់កងទ័ពអូស្ត្រាលី។ សម្រាប់រដ្ឋមន្រ្តីការពារជាតិ អូស្ត្រាលី ដោយយោងទៅលើកត្តាភូមិសាស្រ្តនយោបាយបច្ចុប្បន្ន អូស្ត្រាលីចាំបាច់ត្រូវការជាបន្ទាន់ នាវាមុជទឹកទំនើបៗមកជំនួសនាវាមុជទឹកវ័យចំណាស់របស់អូស្ត្រាលី។ ដោយលុបចោល កិច្ចសន្យាទិញនាវាមុជទឹករបស់បារាំង អូស្ត្រាលីបានងាកមកចុះហត្ថលេខាជាមួយ អាមេរិក និងអង់គ្លេស ដើម្បីទិញនាវាមុជទឹកដើរដោយថាមពលនុយក្លេអ៊ែរ ដែលអូស្ត្រាលីជឿថា នឹងមានសមត្ថភាពជួយឲ្យអូស្ត្រាលីអាចប្រឈមមុខ ទប់ទល់ចិននៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ