កូរ៉េខាងត្បូង បានរកឃើញបំណែកមីស៊ីលដ៏ធំមួយ របស់កូរ៉េខាងជើង និងកំពុងតែសិក្សាវិភាគ
កូរ៉េខាងជើង បានបាញ់គ្រាប់មីស៊ីលបាលីស្ទិកជាថ្មី ក្នុងថ្ងៃពុធ ទី៩វិច្ឆិកា។ ចំណែក កូរ៉េខាងត្បូងបានបញ្ជាក់ថា ខ្លួនកំពុងវិភាគ និងសិក្សាលើបំណែកមីស៊ីលរបស់កូរ៉េខាងជើង ដែលទើបតែស្រង់បានពីសមុទ្រ។ ប្រឈមនឹងការបាញ់សាកល្បងមីស៊ីលរបស់ កូរ៉េខាងជើង យ៉ាងច្រើនសន្ធឹកនាប៉ុន្មានសប្តាហ៍នេះ ទីបញ្ជាការយោធាកូរ៉េខាងត្បូង បញ្ជាក់ថាបានជម្លៀសប្រជាជនចេញពីកន្លែងប្រឈមនឹងគ្រោះថ្នាក់ខ្ពស់ ។ រដ្ឋបាលទីក្រុងសេអ៊ូល បានគូសបញ្ជាក់ទៀតថា ការបាញ់សាកល្បងមីស៊ីលមួយរយៈចុងក្រោយក្រោយ ពីសំណាក់របបក្រុងព្យុងយ៉ាង គឺជា«ការឈ្លានពានអធិបតេយ្យភាពដែនដី» ព្រោះនេះជាការបាញ់មីស៊ីលចូលកៀកខ្លាំងបំផុតមិនធ្លាប់ជួបប្រទះ តាំងពីក្រោយពីកិច្ចព្រមព្រៀងបទឈប់បាញ់ នៅឆ្នាំ១៩៥៣។
ចុះផ្សាយនៅថ្ងៃ៖
ស្តាប់ - ០២:០៩
រដ្ឋបាលទីក្រុងសេអ៊ូល ប្រញាប់ប្រញាលបញ្ជូននាវាមួយទៅស្វែងរកបំណែកគ្រាប់មីស៊ីលរបស់កូរ៉េខាងជើង ហើយបានរកឃើញបំណែកគ្រាប់មីស៊ីលមួយ ដែលវាបាញ់ក្នុងរយៈកម្ពស់ ១៥០០ម៉ែត្រ ទៅ ២ ០០០ ម៉ែត្រ។ នេះបើតាមសេចក្តីថ្លែងការណ៍ របស់ ក្រសួងការពារជាតិកូរ៉េខាងត្បូង នៅថ្ងៃពុធ ទី៩វិច្ឆិកា។ បំណែកមីស៊ីលរបស់កូរ៉េខាងជើងនេះ គឺជាកម្ទេចបំណែកមីស៊ីលដែលទើបនឹងបាញ់ចេញកាលពីពេលថ្មីៗនេះ។ វាមានទំហំធំ ប្រវែងបណ្តោយប្រមាណជា៣ម៉ែត្រ ហើយរយៈទទឹង ប្រហែល ២ ម៉ែត្រ។ រដ្ឋបាលទីក្រុងសេអ៊ូល បន្តលើកឡើងទៀតថា បំណែកមីស៊ីលនេះ គឺជាមីស៊ីលកូរ៉េខាងជើង ឈ្មោះថា SA-5 ហើយមីស៊ីលប្រភេទនេះហើយដែលគេឃើញមានប្រើប្រាស់ក្នុងសង្គ្រាមនៅអ៊ុយក្រែន ទៀតផង។
ក៏ប៉ុន្តែ ភាគីរបបក្រុងព្យុងយ៉ាងវិញ គឺក្រសួងការពារជាតិកូរ៉េខាងជើង បានទាត់ចោលការចោទប្រកាន់កូរ៉េខាងត្បូង ហើយ រដ្ឋបាលទីក្រុងព្យុងយ៉ាង ក៏ថែមទៀតបានបដិសេធដែរ ចំពោះការចោទប្រកាន់របស់សហរដ្ឋអាមេរិក ដែលចោទថា កូរ៉េខាងជើង បានផ្គត់ផ្គង់គ្រឿងសព្វាវុធនិងគ្រាប់រំសេវឲ្យរុស្ស៊ី ។
គួររំឮកជូនថា លោក John Kirby អ្នកនាំពាក្យក្រុមប្រឹក្សាសន្តិសុខជាតិអាមេរិកប្រចាំសេតវិមានប្រធានាធិបតីអាមេរិក មានប្រសាសន៍កាលពីសប្តាហ៍មុន ថាកូរ៉េខាងជើង បានបញ្ចូនមីស៊ីលចំនួនច្រើនសន្ធឹក ឲ្យទៅរុស្ស៊ី ដើម្បីធ្វើសឹងសង្គ្រាមលើអ៊ុយក្រែន ដោយរបបក្រុងព្យុងយ៉ាងខំប្រឹងបង្វែងដាន និងយកលេសឲ្យគេជឿថា ផ្ញើបញ្ជូនគ្រឿងចម្បាំងនោះ ទៅតំបន់ដើមបូព៌ានិងអាហ្វ្រិកទៅវិញ។
ជាការកត់សម្គាល់ មីស៊ីលរបបក្រុងព្យុងយ៉ាងបាញចេញថ្ងៃពុធ គឺតែពីរថ្ងៃប៉ុណ្ណោះ មុនបើកកិច្ចប្រជុំអាស៊ាន ដែលថ្នាក់ដឹកនាំសំខាន់ៗលើពិភពលោក មានថ្នាក់ដឹកនាំអាស៊ាន ចិន អាមេរិក ជាដើម ទៅជួបប្រជុំនៅភ្នំពេញ។ សំណុំរឿងឧបទ្វីបកូរ៉េ គឺ ច្បាស់ជាប្រធានមួយដែលមិនអាចរំលងនោះឡើយ។ ជុំវិញបញ្ហាឧបទ្វីបកូរ៉េ, កាសែតជប៉ុន បញ្ជាក់ថា សហរដ្ឋអាមេរិក នឹងត្រូវជួបពិភាក្សាគ្នា ក្នុងពេលឆាប់ៗនេះ ជាមួយសម្ព័ន្ធមិត្ត ជប៉ុន និង កូរ៉េខាងត្បូង នៅឱកាសជំនួបអាស៊ាន និងប្រជុំ G20 ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ