សង្រ្គាមអ៊ុយក្រែន និងមីស៊ីលគំរាមកំហែងរបស់កូរ៉េខាងជើងរុញច្រានជប៉ុនឲ្យបង្កើនសមត្ថភាពយោធា
ប្រឈមនឹងគ្រោះថ្នាក់កាន់តែកើនឡើង នៅក្នុងតំបន់ ជាពិសេស មីស៊ីលគំរាមកំហែងរបស់កូរ៉េខាងជើង និងសង្រ្គាមរុស្ស៊ីឈ្លានពានអ៊ុយក្រែន ជប៉ុនត្រូវការពង្រឹងជាបន្ទាន់ សមត្ថភាពកងទ័ពរបស់ខ្លួន។ ថ្លែងនៅក្នុងពិធីត្រួតនាវាចម្បាំង ក្នុងឱកាសលំហាត់ទ័ពជើងទឹក អន្តរជាតិ នៅតូក្យូ កាលពីថ្ងៃអាទិត្យ នាយករដ្ឋមន្រ្តីជប៉ុន លោកហ្វូមីអូ គីស៊ីដា បាននិយាយថា នៅក្នុងរឿងពង្រឹងសមត្ថភាពកងទ័ពជើងទឹក ជប៉ុនគ្មានពេលដែលត្រូវរង់ចាំតទៅទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
នៅក្នុងពិធីលំហាត់ទ័ពជើងទឹកអន្តរជាតិ ដែលមានការចូលរួមពីនាវាចម្បាំង នាវាមុជទឹករបស់ប្រទេសចំនួន ១២ នាយករដ្ឋមន្រ្តីជប៉ុន លោកហ្វូមីអូ គីស៊ីដាបានប្រកាសសន្យាពង្រឹងសមត្ថភាពយោធា និងកងកម្លាំងស្វ័យការពារជើងទឹកជប៉ុន។
រដ្ឋាភិបាលរបស់លោកគីស៊ីដាកំពុងរៀបចំបង្កើតផែនការសន្តិសុខ ដែលនៅក្នុងនោះ ថវិកាកងទ័ពនឹងអាចត្រូវបង្កើនទ្វេដង ក្នុងរយៈពេល ៥ឆ្នាំខាងមុខ។
សម្រាប់លោកគីស៊ីដា ការព្យាយាមចរចា និងជៀសវាងមិនឲ្យកើតមានជម្លោះ គឺជារឿងសំខាន់។ ប៉ុន្តែ វាក៏មានសារៈសំខាន់ណាស់ដែរ ដែលគេត្រូវត្រៀមខ្លួនគ្រប់គ្រាន់ រួចជាស្រេច ដើម្បីប្រឈមតទល់នឹងសកម្មភាពញុះញង់ និងគំរាមកំហែងសន្តិភាព។
ដោយនិយាយថ្កោលទោសសង្រ្គាមរុស្ស៊ីឈ្លានពានអ៊ុយក្រែន និងបរិហារការបាញ់សាកល្បងមីស៊ីល ជាបន្តបន្ទាប់ កូរ៉េខាងជើង ដែលនៅក្នុងនោះ មានមីស៊ីលមួយដើម ហោះរំលងជាលើកទី១ ពីលើប្រទេសជប៉ុន លោកនាយករដ្ឋមន្រ្តី គីស៊ីដាបានវាយតម្លៃថា នៅក្នុងកាលៈទេសៈដែលកំពុងកើតមានភាពតានតឹងនៅសមុទ្រចិនខាងកើត និងសមុទ្រចិនខាងត្បូង និងក្នុងពេលដែលតួអង្គថ្មីមិនគោរពច្បាប់ និងប្រើតែកម្លាំង ឬការគំរាមកំហែងដើម្បីបំផ្លាញ សន្តិភាព និងសន្តិសុខរបស់ប្រទេសជាតិសាសន៍ដទៃ យើងត្រូវត្រៀមខ្លួនជាប់ជានិច្ច។
តាមលោកគីស៊ីដា ជប៉ុនត្រូវការសាងសង់នាវាចម្បាំងបន្ថែម ពង្រឹងប្រព័ន្ធខែលមីស៊ីល និងកែលម្អលក្ខខណ្ឌការងារ ព្រមទាំងប្រាក់ឧបត្ថម្ភលើកទឹកចិត្តដល់កងកម្លាំងស្វ័យការពារជាតិជប៉ុន។
នៅក្នុងឱកាសលំហាត់ទ័ពជើងទឹកអន្តរជាតិ ដែលត្រូវប្រព្រឹត្តទៅ រហូតដល់ថ្ងៃ អង្គារ ក្រៅពីមានការចូលរួមរបស់នាវាចម្បាំងរបស់ប្រទេសអូស្ត្រាលី អាមេរិក កាណាដា ឥណ្ឌា សិង្ហបុរី គេសង្កេតឃើញមានផងដែរ វត្តមាននាវាចម្បាំងមួយគ្រឿងរបស់កូរ៉េខាងត្បូង។ នេះជាលើកទី១ ក្នុងរយៈពេល ៧ឆ្នាំចុងក្រោយ ដែលកូរ៉េខាងត្បូងបញ្ជូននាវាចម្បាំងរបស់ខ្លួនទៅប្រទេសជប៉ុន។ ការបាញ់មីស៊ីលគំរាមកំហែងរបស់កូរ៉េខាងជើង ដែលបានតាំងខ្លួនជាមហាអំណាចនុយក្លេអ៊ែរបានរុញច្រានជប៉ុន និងកូរ៉េខាងត្បូងខិតចូលជិតគ្នា និងទុកចោលមួយអន្លើ ទំនាក់ទំនងដ៏រកាំរកូសរវាងប្រទេសទាំងពីរ ដោយសារសំណុំរឿងអតីតកាល ក្នុងសម័យសង្រ្គាមលោកលើកទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ