កូរ៉េខាងត្បូង និងអាមេរិកជជែកពីការធ្វើសមយុទ្ធនុយក្លេអ៊ែរ ខណៈដែលកូរ៉េខាងជើងបង្កើនសព្វាវុធនុយក្លេអ៊ែរ
នៅកូរ៉េខាងត្បូង ប្រធានាធិបតីលោកយូន ស៊ុកយោលបានប្រាប់ឲ្យដឹងថា ក្រុងសេអ៊ូល និងក្រុងវ៉ាស៊ីនតោនជជែកគ្នាពីការធ្វើសមយុទ្ធនុយក្លេអ៊ែរនាពេលខាងមុខ។ ការលើកឡើងរបស់លោកយូន ស៊ុកយោលបានធ្វើឡើង ក្រោយពីកូរ៉េខាងជើងបានបិទទំព័រឆ្នាំចាស់ដោយស្វាគមឆ្នាំថ្មីជាមួយនឹងការបាញ់សាកល្បងមីស៊ីលបាលីស្ទិកចំនួន ៣គ្រាប់នាចុងសប្តាហ៍កន្លងទៅ។ លើសពីនេះ មេដឹកនាំកូរ៉េខាងជើងលោកគីម ជុងអ៊ុន ថែមទាំងបានបញ្ជាឲ្យបង្កើនអាវុធនុយក្លេអ៊ែរកាន់តែច្រើនជាងមុននាពេលខាងមុខ។
ចុះផ្សាយនៅថ្ងៃ៖
ស្តាប់ - ០២:០៤
គឺនៅក្នុងកិច្ចសន្ទនាមួយឲ្យកាសែតកូរ៉េខាងត្បូងឈ្មោះ Chosun Ilbo ចុះផ្សាយក្នុងថ្ងៃចន្ទ ទី២ មករាដែលប្រធានាធិបតីកូរ៉េខាងត្បូងលោកយូន ស៊ុកយោលបានទទួលស្គាល់ថា ឆ័ត្រនុយក្លេអ៊ែររបស់អាមេរិកមិនគ្រប់គ្រាន់ដើម្បីការពារសន្តិសុខពលរដ្ឋកូរ៉េខាងត្បូងទេ។ នៅក្នុងន័យនេះ លោកយូន ស៊ុកយោលចង់ឲ្យអាមេរិកចូលរួមបន្ថែមទៀតជាមួយកូរ៉េខាងត្បូងតាមរយៈការរៀបចំ ការចែករំលែកនូវព័ត៌មាន ការហ្វឹកហ្វឺន និងលំហាត់សឹកស្តីពីអាវុធនុយក្លេអ៊ែរ។ តាមលោកយូន ស៊ុកយោល ភាគីអាមេរិកមិនបានជំទាស់នឹងសំណើរបស់លោកទេ។
សំណើរបស់ប្រធានាធិបតីកូរ៉េខាងត្បូងរូបនេះបានធ្វើឡើង មួយថ្ងៃក្រោយពីមេដឹកនាំកូរ៉េខាងជើងលោកគីម ជុងអ៊ុនបានអំពាវនាវឲ្យបង្កើនសព្វាវុធនុយក្លេអ៊ែររបស់កូរ៉េខាងជើង។ ទន្ទឹមគ្នានេះ លោកគីម ជុងអ៊ុនក៏បានប្រកាសពីការអភិវឌ្ឍន៍មីស៊ីលបាលីស្ទិកអន្តរទ្វីបប្រភេទ ICBM ថ្មីៗទៀតដើម្បីប្រឈមទប់នឹងអារិភាពរបស់អាមេរិក និងកូរ៉េខាងត្បូង។ គួររម្លឹកថាពេញមួយឆ្នាំ ២០២២ ដែលទើបបិទបញ្ចប់ ក្រុងព្យុងយ៉ាងបានបាញ់សាកល្បងសឹងរាល់ខែនូវសព្វាវុធ ក្នុងនោះក៏មានមីស៊ីលបាលីស្ទិកអន្តរទ្វីបប្រភេទ ICBM ដែរ។
ជាក់ស្តែងនៅចុងសប្តាហ៍កន្លងទៅមុននឹងដាច់ឆ្នាំ ២០២២ កូរ៉េខាងជើងបានបាញ់សាកល្បងមីស៊ីលចម្ងាយជិតចំនួន ៣គ្រាប់ដើម្បីស្វាគមន៍ឆ្នាំថ្មី ២០២៣។ តាមក្រុងសេអ៊ូល និងក្រុងវ៉ាស៊ីនតោន ក្រុងព្យុងយ៉ាងមានបំណងធ្វើការសាកល្បងនុយក្លេអ៊ែរនាពេលខាងមុខដែលជាលើកទី៧ និងជាលើកទី១ គិតតាំងពីឆ្នាំ ២០១៧។ គេនៅមិនទាន់ដឹងថា តើសមយុទ្ធនុយក្លេអ៊ែររវាងអាមេរិក និងកូរ៉េខាងត្បូងធ្វើឡើងនៅពេលណា និងក្រោមរូបភាពយ៉ាងម៉េចទេ។ អ្វីដែលគេបានមើលឃើញ ការបង្កើនបាញ់មីស៊ីលរបស់លោកគីម ជុនអ៊ុនបានបង្ខំឲ្យលោកយូន ស៊ុកយោលប្តូរយុទ្ធសាស្រ្តថ្មីនៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ