ចិនរំលោភតំបន់ការពារដែនអាកាសតៃវ៉ាន់ច្រើនទ្វេដងក្នុងឆ្នាំ២០២២
ទំនាក់ទំនងចិននិងតៃវ៉ាន់ ដែលចាប់ធ្លាក់ដុនដាបស្ទើរដល់បាត តាំងពីលោកស៊ីជីនពីង ចូលកាន់តំណែង កាលពី១០មុនមក បានស្រុតចុះបន្ថែមមួយកំរិតទៀត ជាគំហុកតែម្តងនៅឆ្នាំ២០២២។ ចិនបានបង្កើនការរំលោភបំពានលើតៃវ៉ាន់ ដោយបញ្ជូនយន្តហោះចម្បាំង យន្តហោះសង្គ្រាម ចូលក្នុងតំបន់ការពារដែនអាកាសតៃវ៉ាន់ នៅឆ្នាំ២០២២ ច្រើនជិតពីរដងលើសឆ្នាំ២០២១។ នេះបើតាមការតួលេខស្រង់ដោយទីភ្នាក់ងារសារព័ត៌មានបារាំងAFP ដែលផ្អែកលើទិន្នន័យប្រចាំថ្ងៃផ្តល់ដោយក្រសួងការពារជាតិតៃវ៉ាន់។
ចុះផ្សាយនៅថ្ងៃ៖
តៃវ៉ាន់រស់ក្រោមសម្ពាធគំរាមកំហែងរំលោភចូលដែនអាកាសពីសំណាក់ចិនជាប់ជាប្រចាំ។ ក្នុងមួយឆ្នាំ២០២២ បើតាមសម្រង់របស់ទីភ្នាក់ងារសារព័ត៌មានបារាំង ចិនបានបញ្ជូន យន្តហោះយោធា ចូលក្នុងតំបន់ការពារដែនអាកាសតៃវ៉ាន់ចំនួន១៧២៧លើក ពោលគឺជិតពីរដងច្រើនជាងឆ្នាំ២០២១ ដែលមានត្រឹម៩៦០លើក និង៣៨០លើកកាលពីឆ្នាំ២០២០។
នៅរវាងពីឆ្នាំ ២០២១ ទៅ២០២២ ករណីរំលោភបំពានរបស់យន្តហោះចម្បាំងចិន បានកើនឡើងជាងពីរដង គឺពី ៥៣៨ ទៅ ១២៤១។ ចំណែកយន្តហោះទម្លាក់គ្រាប់បែក រាប់ទាំងយន្តហោះប្រភេទH6ដែលមានសមត្ថភាពនុយក្លេអ៊ែរវិញ បានរំលោភចូលតំបន់ការពារដែនអាកាសតៃវ៉ាន់ចំនួន១០១លើកទល់នឹង៦០លើកកាលពីឆ្នាំ២០២១។
២០២២ ក៏ជាឆ្នាំទីមួយ ដែលចិនបានបញ្ជូនដ្រូន ចូលតំបន់ការពារដែនអាកាសតៃវ៉ាន់ ក្នុងចំនួន៧១លើកគិតចាប់តាំងពីក្រោយទស្សនកិច្ចរបស់លោកស្រីប្រធានសភាអ្នកតំណាងអាមេរិកនៅតៃប៉ិ កាលពីខែសីហាមក។
សូមបញ្ជាក់ថាតំបន់ការពារដែនអាកាស ជាតំបន់ដែលធំទូលាយ រាប់បញ្ចូលទាំងដែនអាកាសតៃវ៉ាន់ ហើយលាតសន្ធឹងទៅឆ្ងាយ ដែលគ្រប់យានយន្តហោះហើរបរទេសត្រូវសុំការអនុញ្ញាតពីអាជ្ញាធរអាកាសចរណ៍មូលដ្ឋាន។ តំបន់ការពារដែនអាកាសតៃវ៉ាន់ មានគងមួយភាគនឹងតំបន់ការពារដែនអាកាសចិន។
ការហោះហើររំលោភតំបន់ការពារដែនអាកាសតៃវ៉ាន់ ត្រូវបានគេចាត់ទុកជាវិធីបញ្ចុះខ្សោយកងយន្តហោះប្រដេញតៃវ៉ាន់ដែលចាស់ទ្រុឌទ្រោមស្រាប់ និងជាវិធីសិក្សាការការពារខ្លួនរបស់តៃវ៉ាន់ ព្រមទាំងជាសារព្រមានដល់សហរដ្ឋអាមេរិកកុំឱ្យបង្ខិតមកជិតឬឆ្លងបន្ទាត់ក្រហមហាមឃាត់។
ចិនតែងចាត់ទុកតៃវ៉ាន់ជាខេត្តមួយរបស់ខ្លួន ដែលត្រូវបង្រួបបង្រួម ឬប្រើកម្លាំងយោធាតែម្តងផងបើចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ