ចិនប្រកាសធ្វើសមយុទ្ធក្បែរតៃវ៉ាន់តបនឹងទង្វើផ្គើនរបស់អាមេរិក
ចិនបានអះអាងនៅថ្ងៃអាទិត្យទី ២៥ធ្នូ ថាបានដឹកនាំធ្វើសមយុទ្ធក្បែរកោះតៃវ៉ាន់ ដើម្បីឆ្លើយតបទៅនឹងទង្វើបង្កហេតុ និងទង្វើស៊ុំគ្រលំរបស់អាមេរិកជាមួយតៃវ៉ាន់។ ប៉ុន្តែចិនមិនបានលម្អិតអំពីទំហំនៃសមយុទ្ធ ព្រមទាំងទីតាំងពិតប្រាកដនៃលំហាត់សឹកពេលនេះទេ។
ចុះផ្សាយនៅថ្ងៃ៖
ស្តាប់ - ០១:៥០
បើតាមអ្នកនាំពាក្យនៃកងប្រតិបត្តិការខាងកើត កងទ័ពរំដោះប្រជាជនចិនបានធ្វើសមយុទ្ធក្នុងដែនទឹក និងដែនអាកាសជុំវិញកោះតៃវ៉ាន់ អមដោយការល្បាតបែបត្រៀមលក្ខណៈប្រយុទ្ធ ដែលមានច្រើនផ្នែក ព្រមទាំងលំហាត់សឹកអន្តរយោធាផ្នែកវាយប្រហារផង។
កងទ័ពរំដោះប្រជាជនចិន បានថែមទាំងបង្ហាញរូបថតយន្តហោះទម្លាក់គ្រាប់បែក នាវាសង្គ្រាម និងទិដ្ឋភាពថតពីលើអាកាសតាមបង្អួចយន្តហោះឃើញជួរភ្នំតៃវ៉ាន់ ដែលគេអាចយល់បានថាយន្តហោះចិន បានចូលកៀកជិតឆ្នេរតៃវ៉ាន់ខ្លាំងមែនទែន។
សេចក្តីថ្លែងការណ៍បានបញ្ជាក់ទៀតថា សមយុទ្ធនេះជាឆ្លើយដ៏ច្បាស់លាស់តបទៅនឹងការពង្រឹងគំនិតស៊ុំគ្រលំគ្នារបស់សហរដ្ឋអាមេរិកជាមួយនឹងអាជ្ញាធរតៃវ៉ាន់ផង និងទង្វើផ្គើនរបស់ពួកគេផង។
ក្រសួងការបរទេសចិន បានបញ្ចេញប្រតិកម្ម នៅថ្ងៃសៅរ៍ទី ២៣ធ្នូ ប្រឆាំងដាច់ខាតនឹងការអនុម័តច្បាប់ថវិការបស់អាមេរិកសម្រាប់វិស័យការពារជាតិដោយសម្រេចផ្តល់ថវិកាចំនួន១០ពាន់លានដុល្លារជាជំនួយយោធានិងការលក់អាវុធទៅឱ្យតៃវ៉ាន់។
ចិនមិនសប្បាយចិត្តសោះ នឹងឃើញរដ្ឋាភិបាលតៃវ៉ាន់មានទំនាក់ទំនងកាន់តែជិតស្និទ្ធខ្លាំងឡើងជាមួយសហរដ្ឋអាមេរិក ដែលតែងតែផ្គត់ផ្គត់និងគាំទ្រយោធាតៃវ៉ាន់ជារហូតមក។ តាំងពីអាណត្តិលោកដូណាល់ត្រាំមក តៃវ៉ាន់និងអាមេរិកកាន់តែស្និទ្ធស្នាលគ្នាខ្លាំង ទំនាក់ទំនងចិនអាមេរិកកាន់តែតានតឹង។ កាលពីខែសីហា កងទ័ពប្រជាជនចិន បានដឹកនាំធ្វើសមយុទ្ធទ្រង់ទ្រាយធំបំផុតម្តងហើយជុំវិញកោះតៃវ៉ាន់ ក្រោយដំណើរទស្សនកិច្ចរបស់ប្រធានព្រឹទ្ធសភាអាមេរិក ណាន់ស៊ី ប៉េឡូស៊ី នៅតៃប៉ិ ដែលសម្រាប់ចិន នេះជាទង្វើផ្គើននឹងនយោបាយទទួលស្គាល់គោលការណ៍ចិនតែមួយ។
ប៉េកាំងតែងចាត់តៃវ៉ាន់ជាដីខេត្តមួយដុំរបស់ចិន ដែលអាជ្ញាធរចង់បង្រួបបង្រួមដោយសន្តិវិធី ប៉ុន្តែត្រៀមប្រើកម្លាំងក្រសោបយកភ្លាម បើកោះហ៊ានប្រកាសឯករាជ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ