នាយករដ្ឋមន្រ្តីជប៉ុនបំពេញទស្សនកិច្ចនៅក្នុងបណ្តាប្រទេសសមាជិក G៧ ដោយផ្តើមនៅបារាំងមុនគេ
នៅថ្ងៃចន្ទ ទី៩ មករា នាយករដ្ឋមន្រ្តីជប៉ុនលោកហ៊្វូមីអូ គីស្ហ៊ីដាផ្តើមទស្សនកិច្ចមួយជុំទ្វីបអឺរ៉ុប និងអាមេរិកឡាទីន។ បារាំងជាប្រទេសដែលលោកគីស្ហ៊ីដាបានបំពេញទស្សនកិច្ចមុនគេ។ វត្តមានរបស់លោកគីស្ហ៊ីដានៅក្នុងបណ្តាប្រទេសសមាជិក G៧ ធ្វើឡើងក្នុងនាមជប៉ុនជាប្រធានប្តូរវេន G៧ ក្នុងឆ្នាំ ២០២៣។ តែក្រៅពីនិយាយពីកិច្ចការរបស់ G៧ វត្តមានរបស់លោកគីស្ហ៊ីដានៅក្នុងបណ្តាប្រទេសសមាជិក G៧ ក៏ជាឱកាសមួយដើម្បីនិយាយពីទំនាក់ទំនងទ្វេភាគីដែរ។
ចុះផ្សាយនៅថ្ងៃ៖
ស្តាប់ - ០១:៥២
កម្មវិធីនៅក្នុងទីក្រុងប៉ារីស ប្រទេសបារាំង លោកគីស្ហ៊ីដាទទួលជួបដោយប្រធានាធិបតីលោកម៉ាក្រុងនៅវិមានអេលីហ្សេ ហើយឥស្សរជនទាំងពីរនាក់អញ្ជើញទៅទស្សនាការដ្ឋានជួសជុល Notre-Dame de Paris ដែលបានរងការឆាបឆេះយ៉ាងដំណំកាលពីឆ្នាំ ២០១៩។ តាមវិមានប្រធានាធិបតីបារាំងអេលីហ្សេ នេះជាលើកទី១ ដែលលោកម៉ាក្រុងអញ្ជើញមេដឹកនាំបរទេសម្នាក់ឲ្យទៅមើលការដ្ឋានជួសជុល Notre-Dame de Paris និងក៏ជាឱកាសមួយដែលបារាំងបង្ហាញពីស្នាដៃ រួមទាំងចំណេះដឹងស្តីពីបេតិកភណ្ឌ។
ចំណែកប្រធានបទស្តីពីជំនួបរវាងលោកម៉ាក្រុង និងលោកគីស្ហ៊ីដាមានច្រើនទាក់ទងនឹងកិច្ចការរបស់ G៧ រួមទាំងទំនាក់ទំនងទ្វេភាគីបារាំង ជប៉ុន។ វិមានអេលីហ្សេបានបញ្ជាក់ថា លោកម៉ាក្រុងផ្តល់ការគាំទ្រទាំងស្រុងរបស់បារាំងចំពោះប្រធានប្តូរវេន G៧ របស់ជប៉ុន និងការភ្ជាប់របស់បារាំងចំពោះសកម្មភាពរបស់ G៧ ក្នុងការគាំទ្រអ៊ុយក្រែន។ ទាក់ទងនឹងទំនាក់ទំនងទ្វេភាគីវិញ លោកម៉ាក្រុង និងលោកគីស្ហ៊ីដាពិនិត្យ និងជជែកលើកិច្ចសហប្រតិបត្តិការក្នុងវិស័យថាមពល ការពារ បច្ចេកវិទ្យា និងវប្បធម៌។
បន្ទាប់មក លោកម៉ាក្រុង និងលោកគីស្ហ៊ីដាលើកឡើងពីភាពជាដៃគូនៅក្នុងលំហឥណ្ឌូប៉ាស៊ីហ្វិកដោយផ្តោតលើការពង្រឹងមហិច្ឆតា និងកិច្ចសហប្រតិបត្តិការយុទ្ធសាស្រ្តបារាំង ជប៉ុន។ លោកគីស្ហ៊ីដាបញ្ចប់ទស្សនកិច្ចក្នុងប្រទេសបារាំងជាមួយនឹងការទទួលទានអាហារពេលល្ងាចជាមួយលោកម៉ាក្រុង។ ចេញពីបារាំង លោកគីស្ហ៊ីដាបន្តដំណើរទៅកាន់ប្រទេសអ៊ីតាលីនៅថ្ងៃទី១០ មករា ប្រទេសអង់គ្លេសនៅថ្ងៃទី១១ មករា ប្រទេសកាណាដានៅថ្ងៃទី១២ មករា និងបញ្ចប់ទស្សនកិច្ចនៅសហរដ្ឋអាមេរិកនៅថ្ងៃទី១៣ មករា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ