សភាបារាំង ហៅឲ្យរដ្ឋាភិបាលបារាំងកំណត់គោលជំហរ ពង្រឹងវត្តមាននៅតំបន់ឥណ្ឌូប៉ាស៊ីហ្វិក
គណកម្មាធិការកិច្ចការអន្តរជាតិ នៃរដ្ឋសភាបារាំង បានចេញរបាយការណ៍មួយ ដោយបានហៅឲ្យរដ្ឋាភិបាលបារាំង កំណត់កម្មវត្ថុ ព្រមទាំងមធ្យោបាយឲ្យបានច្បាស់ ដើម្បីវត្តមានរបស់បារាំង នៅក្នុងតំបន់ឥណ្ឌូប៉ាស៊ីហ្វិក។ ជាការពង្រឹងគោលជំហរ បន្ទាប់ពីបារាំង បានបាត់បង់កិច្ចសន្យាលក់នាវាមុជទឹកបាតសមុទ្រជាមួយអូស្ត្រាលី និងបន្ទាប់ពីអាមេរិក បានបង្កើតសម្ព័ន្ធ AUKUS ដោយគ្មានជូនដំណឹងមកបារាំង។
ចុះផ្សាយនៅថ្ងៃ៖
ស្តាប់ - ០២:២៤
បន្ទាប់ពីរឿងរ៉ាវនាវាមុជទឹកបាតសមុទ្រ ដែលអូស្ត្រាលីបានផ្តាច់កិច្ចសន្យាជាមួយបារាំង ងាកទៅទិញរបស់អាមេរិកវិញ បារាំងហាក់ឯកោខ្លាំង នៅក្នុងតំបន់ឥណ្ឌូប៉ាស៊ីហ្វិក។ មិនត្រឹមតែបាត់បង់អូស្ត្រាលី ដែលជាដៃគូយុទ្ធសាស្ត្ររបស់បារាំង នៅក្នុងតំបន់ឥណ្ឌូប៉ាស៊ីហ្វិកប៉ុណ្ណោះទេ តែតំបន់នេះ កំពុងតែត្រូវបានសហរដ្ឋអាេមរិក រៀបចំចងក្រងសម្ព័ន្ធភាពដាច់ដោយឡែកមួយ ឈ្មោះថា AUKUS ដោយមិនបានហៅបារាំង ឬអឺរ៉ុប ឲ្យចូលរួមជាមួយឡើយ។
របាយការណ៍គណកម្មាធិការកិច្ចការអន្តរជាតិ នៃសភាបារាំង បានលើកឡើងថា ក្នុងខណៈពេល ដែលអឺរ៉ុប មិនទាន់មានការរៀបចំសម្ព័ន្ធយុទ្ធសាស្ត្រ ឲ្យបានរឹងមាំ សម្រាប់តំបន់ឥណ្ឌូប៉ាស៊ីហ្វិក គឺបារាំង ត្រូវតែរៀបចំពង្រឹងសម្ព័ន្ធភាពទ្វេភាគី នៅក្នុងតំបន់នេះឲ្យបានល្អប្រសើរឡើង។
របាយការណ៍លើកឡើងថា ចំណងសហប្រតិបត្តិការទ្វេភាគី រវាងបារាំង និងឥណ្ឌា ត្រូវតែពង្រឹង និងពង្រីកឲ្យបានបន្ថែមទៀត ត្បិតអីឥណ្ឌា មានការយល់ឃើញស្របជាមួយបារាំង ទាក់ទិននឹងយុទ្ធសាស្ត្រឥណ្ឌូប៉ាស៊ីហ្វិក។ ដូចគ្នាដែរ បារាំងត្រូវតែវិនិយោគ ពង្រីកបន្ថែមនូវវិស័យសហប្រតិបត្តិការផ្សេងទៀត ជាមួយជប៉ុន។
ក្រៅពីឥណ្ឌា និងជប៉ុន បារាំង ក៏ត្រូវតែស្រវាចាប់សម្ព័ន្ធភាពផ្សេងទៀត ជាអាទិ៍ជាមួយកូរ៉េខាងត្បូង។ កូរ៉េខាងត្បូងគឺជាមហាអំណាចអាស៊ីមួយ ដែលកំពុងតែស្វែងរកជំហរបង្អែកមួយចំហៀងទៀត ព្រោះគេមិនចង់ស្ថិតនៅចំកណ្តាល នៃការប្រទាញប្រទង់ឥទ្ធិពលគ្នា រវាងតែចិន និងអាមេរិកនោះឡើយ។
សមាជិកសភាបារាំង បានលើកឡើងផងដែរ អំពីភាពចាំបាច់ ដែលបារាំង ត្រូវតែបង្កើនសន្ទុះដល់ចំណងសហការជាមួយឥណ្ឌូណេស៊ី។ ឥណ្ឌូណេស៊ី គឺជាប្រទេសដែលមានប្រជាជនច្រើនជាងគេបង្អស់ លំដាប់ទី៤នៃពិភពលោក។ ដូច្នេះ ការប្រមើរមើលលើសហប្រតិបត្តិការផ្នែកសេដ្ឋកិច្ច និងកិច្ចការសន្តិសុខ ជាមួយឥណ្ឌូណេស៊ី គឺមានភាពធំទូលាយ និងសម្បូរបែបខ្លាំងណាស់ ដែលបារាំងត្រូវតែគិតគូរ។
សមាជិកសភាបារាំង បានអំពាវនាវ ឲ្យរដ្ឋាភិបាលបារាំង ត្រូវតែគូសបញ្ជាក់នូវគោលជំហរ កម្មវត្ថុ និងមធ្យោបាយ ទាំងផ្នែកនយោបាយ រដ្ឋបាល កងទ័ព ធនធានមនុស្ស និងថវិកា ដើម្បីធ្វើយ៉ាងណាសម្រេច ធានាការពារវត្តមានរបស់បារាំងនៅតំបន់ឥណ្ឌូប៉ាស៊ីហ្វិក។ ទន្ទឹមគ្នានេះដែរ រដ្ឋាភិបាលបារាំង ត្រូវតែជំរុញឲ្យសហភាពអឺរ៉ុបចូលរួមឲ្យបានច្រើន លើកជាគម្រោងផែនការយុទ្ធសាស្ត្រទៅថ្ងៃខាងមុខ ព្រោះថាសម្រាប់ពេលនេះ វត្តមានរបស់អឺរ៉ុបនៅក្នុងតំបន់ឥណ្ឌូប៉ាស៊ីហ្វិក គឺមិនត្រូវបានគេមើលឃើញទាល់តែសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ