ប្រមុខអូតង់សុំឱ្យកូរ៉េខាងត្បូងបង្កើនជំនួយសព្វាវុធដល់អ៊ុយក្រែន
ក្នុងក្របខ័ណ្ឌនៃទស្សនកិច្ចនៅក្នុងប្រទេសកូរ៉េខាងត្បូង ហើយមុននឹងបន្តដំណើរទៅក្រុងតូក្យូ លោកប្រមុខអង្គការអូតង់ យេន ស្តុលទែនប៊ែរ បានស្នើសុំនៅថ្ងៃចន្ទទី ៣០ មករានេះ ឱ្យកូរ៉េខាងត្បូងបង្កើនជំនួយយោធាដល់អ៊ុយក្រែន។ សម្រាប់លោកប្រមុខអង្គការអូតង់ សេអ៊ូល គួរតែសើរើមើលឡើងវិញនូវនយោបាយយោធាទាក់ទងនឹងការមិនផ្គត់ផ្គង់អាវុធដល់ប្រទេសកំពុងមានសង្គ្រាម។
ចុះផ្សាយនៅថ្ងៃ៖
កូរ៉េខាងត្បូងជាប្រទេសនាំចេញសព្វាវុធកាន់តែសំខាន់ឡើងៗនៅលើពិភពលោក ដោយទើបបានចុះកិច្ចសន្យាលក់រថក្រោះជាច្រើនរយគ្រឿងឱ្យបណ្តាប្រទេសនៅអឺរ៉ុប មានជាអាទិ៍ប៉ូឡូញ ដែលជាសមាជិកអង្គការអូតង់។ ប៉ុន្តែកូរ៉េខាងត្បូង មានច្បាប់ចែងហាមឃាត់មិនឱ្យលក់អាវុធទៅឱ្យប្រទេសណាកំពុងមានសង្គ្រាមទេ។ ហេតុដូច្នេះហើយបានជាសេអ៊ូល មិនអាចផ្តល់ជំនួយជាអាវុធយុទ្ធភ័ណ្ឌអ្វីឱ្យអ៊ុយក្រែនបាន។ កន្លងមកសេអ៊ូលបានត្រឹមផ្តល់សម្ភារៈបរិក្ខារយោធាដែលមិនប្រល័យជីវិតមនុស្ស និងត្រឹមជាជំនួយមនុស្សធម៌តែប៉ុណ្ណោះ។
ប៉ុន្តែដើម្បីសេរីភាព ប្រជាធិបតេយ្យ និងដើម្បីកុំឱ្យលទ្ធិផ្តាច់ការ ឬនិយាយឱ្យចំដើម្បីកុំឱ្យលោកពូទីនឈ្នះសង្គ្រាម អ៊ុយក្រែនត្រូវការអាវុធច្រើនថែមទៀតយ៉ាងចាំបាច់។ ដូច្នេះសេអូល គួរតែបន្ថែមជំនួយយោធាដល់ក្រុងកៀវ។ នេះជាប្រសាសន៍របស់លោកប្រមុខអង្គការអូតង់ ដោយអំពាវនាវឱ្យកូរ៉េខាងត្បូងសើរើច្បាប់មិនផ្គត់ផ្គង់អាវុធដល់ប្រទេសកំពុងធ្វើសង្គ្រាម តាមគំរូ អាល្លឺម៉ង់ ឬន័រវែស ដែលក៏មានច្បាប់ប្រហាក់ប្រហែលនឹងកូរ៉េខាងត្បូងដែរជុំវិញការនាំចេញអាវុធ ប៉ុន្តែប្រទេសទាំងពីរបានកែប្រែច្បាប់ដើម្បីគាំទ្រអ៊ុយក្រែន។
ប្រមុខអង្គការអូតង់ដដែលនេះបានព្រមានទៀតថា យោធារុស្ស៊ីកំពុងត្រៀមសម្រុកប្រយុទ្ធ និងបានទទួលអាវុធជាច្រើនពីកូរ៉េខាងជើង។ បើបណ្តោយឱ្យរុស្ស៊ីឈ្នះសង្គ្រាមនៅអ៊ុយក្រែន នោះមេដឹកនាំផ្តាច់ការដទៃទៀត និងចិនដែរ នឹងប្រើកម្លាំងជាមធ្យោបាយក្រសោបយកអ្វីដែលគេចង់បានជាប្រាកដ។ តែអូតង់មិនចាត់ទុកចិនជាគូប្រជែងឡើយ។ ចិនត្រូវជឿលើការរួបរួមគ្នាដោះស្រាយបញ្ហារាប់តាំងពីការត្រួតពិនិត្យអាវុធដល់ការប្រយុទ្ធប្រឆាំងនឹងការប្រែប្រួលអាកាសធាតុ។ សម្រាប់លោកស្តុនទែនប៊ែរ សម្ព័ន្ធមិត្តរបស់អូតង់នៅតែបន្តធ្វើពាណិជ្ជកម្មជាមួយចិនជានិច្ច ជាការសឱ្យឃើញថាគេមិនត្រូវរំពឹងលើមហាអំណាចផ្តាច់ការពេកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ