ចិនកំណត់ទិសដៅកំណើនសេដ្ឋកិច្ច៥%«តិចជាងសព្វដង» តែបន្ថែមចំណាយលើវិស័យកងទ័ព
ថ្ងៃអាទិត្យ ថ្នាក់ដឹកនាំកំពូលចិន បានកំណត់ទិសដៅកំណើនសេដ្ឋកិច្ច រង្វង់៥% សម្រាប់ឆ្នាំ២០២៣។ ការព្យាករនេះ គឺមានចំនួនតិចតួច និង ទាបឆ្ងាយ បើធៀបនឹងការរំពឹងទុកពីឆ្នាំមុនៗ។ ផ្ទុយទៅវិញ ថ្នាក់ដឹកនាំចិន បានសម្រេចបន្ថែមការចំណាយលើវិស័យកងទ័ព ពោលគឺថវិកាវិស័យយោធា ត្រូវឡើង ៧,២% នៅឆ្នាំនេះ។ សេចក្តីរំពឹងនិងការសម្រេចនេះ គឺធ្វើឡើងនៅឱកាស ដែល សភាប្រជាជនចិន បើកសម័យប្រជុំពេញអង្គប្រចាំឆ្នាំ នៅរដ្ឋធានីប៉េកាំង។
ចុះផ្សាយនៅថ្ងៃ៖
ស្តាប់ - ០២:២៥
ការព្យាករកំណើនសេដ្ឋកិច្ច ៥% គឺជាទិសដៅរំពឹងប្រចាំឆ្នាំរបស់លោក លី ខឺជាង នាយករដ្ឋមន្ត្រីផុតអាណត្តិ។ កំណើនចំនួនប៉ុណ្ណេះ តិចខ្លាំង មិនធ្លាប់មាន ក្នុងរយៈពេលច្រើនទសវត្សរ៍។ ក៏ប៉ុន្តែ ចិនគឺនៅតែរក្សាកំណើនចំណាយទៅលើវិស័យយោធា។
ឆ្នាំ២០២៣ ចំពោះមុខបណ្តាសមាជិកសភាប្រជាជនចិន ប្រមាណ ៣ ពាន់នាក់ ថ្នាក់ដឹកនាំចិន បានប្រកាសបង្កើនកញ្ចប់ថវិកាយោធា ឲ្យដល់ ២២៥ ពាន់លានដុល្លារ (១.៥៥៣,៧ Yuans)។ ចំនួននេះ គឺកើនឡើងខ្លាំង ជាងឆ្នាំ២០១៩ឆ្ងាយទៅទៀត។ របាយការណ៍ក្រសួងហិរញ្ញវត្ថុចិន បញ្ជាក់ថា កញ្ចប់ថវិកាយោធាចិន កើនឡើង ៧,១% ឆ្នាំទៅមិញ។ បានសេចក្តីថា ថវិកាយោធាចិន ចេះតែកើនឡើងៗជាលំដាប់។
នេះក៏ព្រោះតែ ចិន កំណត់ទិសដៅស្រេចហើយពីការពង្រឹងសមត្ថភាពយោធា ហើយម្យ៉ាងទៀត ក៏ព្រោះតែការប្រឈមមុខដាក់គ្នាកាន់តែស្រួច ជាមួយ ឥណ្ឌានៅព្រំដែនភ្នំហេមពាន្ត ប្រឈមមុខជាមួយជប៉ុនក្នុងបញ្ហាប្រជុំកោះសិនកាគុ ឬទាវយូ ហើយនិង ហ្វីលីពីន ដែលនៅកៀកនឹងកោះតៃវ៉ាន់ ដែលកាន់តែធ្វើសមយុទ្ធច្រើនៗជាមួយទ័ពអាមេរិក។
អ្នកជំនាញខាងយោធាចិន James Char ស្រាវជ្រាវនៅសកលវិទ្យាល័យសិង្ហបុរី វិភាគមើលឃើញថា កញ្ចប់ថវិកាយោធាចិន ត្រូវចាយវាយសម្រាប់បង្កើនប្រាក់បៀវត្សរ៍យោធា ចំណាយលើសមយុទ្ធហ្វឹកហាត់ និងទិញគ្រឿងបរិក្ខារទំនើបៗ។ ហើយម្យ៉ាង ដើម្បី ពង្រឹងសមត្ថភាពគ្រប់គ្រងតៃវ៉ាន ហើយនិងទប់ទល់នឹងសហរដ្ឋអាមេរិកផង។
ទោះជាម្តេចក្តី កញ្ចប់ថវិកាយោធាចិន កើនឡើងច្រើនប៉ុណ្ណេះក្តី ក៏នៅចាញ់កញ្ចប់ថវិកាយោធាសហរដ្ឋអាមេរិក ឆ្ងាយណាស់។ បើតាមរបាយការណ៍របស់វិទ្យាស្ថានស្រាវជ្រាវយុទ្ធសាស្ត្រ Sipri នៅស្កុកខុម ឆ្នាំ២០២១ អាមេរិកចាយថវិកាយោធា ជាង៨០១ពាន់លានដុល្លារ។ ពោល គឺកញ្ចប់លុយយោធាចិនតិចជាងអាមេរិកដល់ទៅ ៣ ដងឯណោះ។
នៅតំបន់អាស៊ី ទិន្ននាការបង្កើនចំណាយវិស័យយោធា គឺមិនមែន មានតែប្រទេសចិនមួយទេ។ សម្រាប់ឆ្នាំ២០២៣ ឥណ្ឌាប្រកាសបង្កើន១៣% កូរ៉េខាងត្បូង កើន៤,៤% ហើយជប៉ុន ក៏បង្កើនទ្វេដង ពោលគឺ២%នៃផលិតផលក្នុងស្រុកសរុបឯណោះ ចាប់ពីពេលនេះទៅ២០២៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ