ចិនផ្តើមផ្តល់ទិដ្ឋាការគ្រប់ប្រភេទឡើងវិញក្រោយពីបានផ្អាករយៈ ៣ឆ្នាំដោយសារកូវីដ១៩
នៅក្នុងប្រទេសចិន រដ្ឋាភិបាលបានប្រកាសឲ្យដឹងពីការផ្តើមផ្តល់ទិដ្ឋាការគ្រប់ប្រភេទឡើងវិញដល់ជនបរទេសចាប់ពីថ្ងៃពុធ ទី១៥ មីនាទៅ។ ការសម្រេចនេះបានធ្វើឡើងក្រោយពីចិនបានបិទញ្ចប់ទាំងស្រុងនូវការអនុវត្តន៍នយោបាយហ្សេរ៉ូកូវីដក្នុងខែមករាដើមឆ្នាំ ២០២៣ នេះ។ គួរបញ្ជាក់ថា រដ្ឋអំណាចចិនបានសម្រេចផ្អាកផ្តល់ទិដ្ឋាការ ពិសេសទិដ្ឋាការទេសចរបរទេសតាំងពីខែមីនា ឆ្នាំ ២០២០ ពោលក្នុងពេលដែលប្រទេសបានជួបករណីឆ្លងកូវីដ១៩ ពេញទំហឹង។
ចុះផ្សាយនៅថ្ងៃ៖
ស្តាប់ - ០២:១៥
ចាប់ពីថ្ងៃពុធ ទី១៥ មីនាទៅ ចិននឹងផ្តើមផ្តល់ឡើងវិញនូវទិដ្ឋាការគ្រប់ប្រភេទដល់ជនបរទេស នេះជាខ្លឹមសារដែលបានចុះផ្សាយដោយក្រសួងការបរទេសចិន។ ចំណែកស្ថានទូត និងស្ថានកុងស៊ុលចិននៅបរទេស ពិសេសនៅអាមេរិក និងនៅអឺរ៉ុបក៏បានចុះផ្សាយព័ត៌មានដូចគ្នានេះនៅលើគេហទំព័ររបស់ខ្លួនដែរ។ ក្រៅពីការផ្តល់ទិដ្ឋាការឡើងវិញ រដ្ឋអំណាចចិនក៏នឹងផ្តល់លទ្ធភាពពីការអនុញ្ញាតឲ្យភ្ញៀវទេសចរបរទេសខ្លះចូលចិនដោយមិនចាំបាច់មានទិដ្ឋាការ ពិសេសការចូលកោះទេសចរណ៍ហាយណាន់ ឬភ្ញៀវទេសចរធ្វើដំណើរកំសាន្តតាមកប៉ាល់ដែលចូលចតនៅក្រុងសៀងហៃជាដើម។
មួយវិញទៀត ជនបរទេសណាដែលទទួលបានទិដ្ឋាការនៅមុនការផ្អាកក្នុងថ្ងៃទី២៨ មីនា ឆ្នាំ ២០២០ និងដែលទិដ្ឋាការកំពុងនៅមានសុពលភាព ជនបរទេសនោះអាចចូលចិនបានដោយមិនបាច់មានទិដ្ឋាការថ្មី។ ដំណឹងផ្តល់ទិដ្ឋាការគ្រប់ប្រភេទឡើងវិញរបស់ចិនជាដំណឹងដែលក្រុមហ៊ុនទេសចរណ៍ និងរោងចក្រសហគ្រាសបរទេសបានទន្ទឹងរង់ចាំតាំងពីយូរមកហើយ។ គួររម្លឹកថា តាំងពីថ្ងៃទី២៨ មីនា ឆ្នាំ ២០២០ ដែលចិនបានផ្អាកការផ្តល់ទិដ្ឋាការគ្រប់ប្រភេទ ពិសេសទិដ្ឋាការទេសចរណ៍ដើម្បីទប់ស្កាត់នឹងការឆ្លងរាលដាលកូវីដ១៩។
ជាមួយនឹងនយោបាយហ្សេរ៉ូកូវីដរយៈពេល ៣ឆ្នាំ ចិនបានផ្តាច់ខ្លួនឯងពីពិភពខាងក្រៅ។ ក្នុងរយៈពេល ៣ឆ្នាំ ជនបរទេសដែលរស់នៅចិនមិនអាចត្រឡប់ចូលចិនបានក្រោយពីបានចាកចេញ ហើយចំនួនជើងហោះហើរអន្តរជាតិត្រូវបានកាត់បន្ថយសឹងទាំងស្រុង។ គឺទើបនៅក្នុងខែមករាដើមឆ្នាំ ២០២៣ ថ្មីៗនេះទេដែលចិនបានដកចេញវិញនូវនយោបាយសូន្យកូវីដ និងចាប់ផ្តើមបើកទ្វារប្រទេសបន្តិចម្តងៗឡើងវិញ។ យោងតាមតួលេខរបស់អង្គការទេសចរណ៍ពិភពលោក ចិនទទួលបានភ្ញៀវទេសចរបរទេសចំនួន ៦៥លាន ៧សែននាក់ក្នុងឆ្នាំ ២០១៩ ពោលមុនផ្ទុះវិបត្តិកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ