អតីតប្រធានាធិបតីតៃវ៉ាន់ទៅចិន ដើម្បីស្តារស្ថានភាពឱ្យប្រសើរឡើងវិញ
លោក ម៉ា យីងចូវ អតីតប្រធានាធិបតីតៃវ៉ាន់ បានអញ្ជើញទៅបំពេញទស្សនកិច្ចនៅប្រទេសចិនចាប់ពីថ្ងៃ ចន្ទទី ២៧មីនានេះ សម្រាប់រយៈពេល១២ថ្ងៃ។ នេះជាលើកទីមួយ គិតចាប់តាំងពីជាង៧ទសវត្សរ៍មក ដែលអតីតឬមេដឹកនាំកោះតៃវ៉ាន់ ធ្វើដំណើរទៅជាន់ដីចិនប្រជាមានិត។ បក្សកាន់អំណាចតៃវ៉ាន់ បានសម្តែងការសោកស្តាយ ចំពោះទង្វើរបស់តំណាងបក្សប្រឆាំងរូបនេះយ៉ាងខ្លាំង។ សកម្មជនប្រជាធិបតេយ្យមួយក្តាប់តូចបានប្រមូលផ្តុំគ្នាធ្វើបាតុកម្មប្រឆាំងនឹងទស្សនកិច្ចរបស់លោកម៉ា នៅអាកាសយានដ្ឋានតៃប៉ិតែម្តង។
ចុះផ្សាយនៅថ្ងៃ៖
ស្តាប់ - ០២:០៩
ទទួលស្វាគមន៍ដោយអ្នកទទួលខុសត្រូវរដ្ឋាភិបាលមជ្ឈិមនិងក្រុងសៀងហៃ តាមគម្រោង លោក ម៉ា យីងចូវ គ្មានជំនួបជាផ្លូវការជាមួយថ្នាក់ដឹកនាំរបស់ប៉េកាំងទេ។ កម្មវត្ថុចម្បង ទស្សនកិច្ចរបស់លោកគឺអញ្ជើញទៅគោរពវិញ្ញាណក្ខន្ធដូនតា និងផ្តល់សន្ទុះដល់ការផ្តោះប្តូរជាមួយយុវវ័យ។ ពីអាកាសយានដ្ឋានក្រុងតៃប៉ិ អតីតប្រធានាធិបតីវ័យ៧៣ឆ្នាំ បានបង្ហាញក្តីរំពឹងថានឹងជំនួបជាមួយយុវវ័យចិន នឹងជួយស្តារស្ថានភាពក្នុងតំបន់ឱ្យប្រសើរឡើង ដើម្បីឱ្យកោះបានស្គាល់និងជួបសន្តិភាពក្នុងពេលដ៏ឆាប់ៗ។ ក្រសួងការបរទេសចិនក៏មិនធ្វើអត្ថាធិប្បាយអ្វី ទាក់ទងនឹងដំណើរទស្សនកិច្ចដែលមិនផ្តោតលើបញ្ហាការទូតនេះដែរ។
ប៉ុន្តែសម្រាប់គណបក្សកាន់អំណាចរបស់លោកស្រីប្រធានាធិបតី សៃ អ៊ីនវ៉េន ទស្សនកិច្ចរបស់លោកម៉ា ពេលនេះ ជាការគាំទ្រនយោបាយចិនចំពោះកោះតៃវ៉ាន់។ តៃវ៉ាន់ត្រូវសាមគ្គីគ្នាជាធ្លុងមួយ តែគួរស្តាយបក្សគួមីងតាំង និងអតីតប្រធានាធិបតីបែរជាទៅឈរខាងបក្សកុម្មុយនិស្តចិនទៅវិញ។ នេះបើតាមសេចក្តីថ្លែងការណ៍របស់គណបក្សកាន់អំណាចតៃវ៉ាន់ដដែល។
លោក ម៉ា យីងចូវ ជាឥស្សរជនដ៏សំខាន់របស់បក្សគួមីងតាំង ដែលជាបក្សប្រឆាំងដ៏ចម្បងនៅសភាតៃវ៉ាន់បច្ចុប្បន្ន មានជំហរចង់ជិតស្និទ្ធនឹងរបបក្រុងប៉េកាំងជានិច្ច តែក៏បដិសេធមិនត្រលប់ទៅនៅក្រោមចិនវិញទេ។ នៅក្នុងសម័យបោះឆ្នោតប្រធានាធិបតីឆ្នាំក្រោយ បក្សគួមីងតាំង ជាគូប្រជែងផ្ទាល់របស់បក្សកំពុងកាន់អំណាច។ ក្រោមអាណត្តិរបស់លោកប្រធានាធិបតី ម៉ាយីងចូវ ពីឆ្នាំ២០០៨ដល់ឆ្នាំ២០១៦ ទំនាក់ទំនងរវាងតៃវ៉ាន់និងចិនប៉េកាំង បានប្រសើរខ្លាំង រហូតមានជំនួបកំពូលជាមួយប្រធានាធិបតីស៊ីជីនពីងនៅសិង្ហបុរីផង កាលពីឆ្នាំ២០១៥។ តែតាំងពីលោកស្រី សៃអ៊ីនវ៉េន ឡើងកាន់តំណែងមក ចិនបានបង្កើនសម្ពាធយោធា សេដ្ឋកិច្ច និងការទូតលើតៃវ៉ាន់យ៉ាងខ្លាំង រហូតធ្វើឱ្យសម្ព័ន្ធមិត្ត៩ប្រទេសផ្តាច់ទូតពី តៃវ៉ាន់ទៅអោបចិនវិញ។ ហុងឌូរ៉ាស ជាករណីជាក់ស្តែងចុងក្រោយដែលឈប់ទាក់ទងការទូតជាមួយតៃវ៉ាន់ ហើយងាកទៅភ្ជាប់ទំនាក់ទំនងជាផ្លូវការជាមួយចិន កាលពីថ្ងៃអាទិត្យ ពោលគឺមួយថ្ងៃមុនទស្សនកិច្ចរបស់លោកម៉ា យីងចូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ