ប្រទេសហុងឌូរ៉ាសប្រកាសពីគម្រោងបែរខ្នងពីចិនតៃវ៉ាន់ដោយងាកទៅឱបចិនដីគោកវិញ
នៅក្នុងប្រទេសហុងឌូរ៉ាស ប្រធានាធិបតីលោកស្រីអ៊ីយ៉ូម៉ារ៉ា កាស្រ្តូបានប្រកាសកាលពីថ្ងៃអង្គារ ទី១៤ មីនាថា ហុងឌូរ៉ាសនឹងភ្ជាប់ទំនាក់ទំនងផ្លូវការជាមួយចិនដីគោក។ ប្រតិកម្មភ្លាមៗ កោះតៃវ៉ាន់ដែលកំពុងមានទំនាក់ទំនងផ្លូវការជាមួយហុងឌូរ៉ាសបានចាត់ទុកការសម្រេចចិត្តរបស់ហុងឌូរ៉ាសជាការសម្រេចចិត្តអាក្រក់ និងស្នើឲ្យហុងឌូរ៉ាសកុំឲ្យធ្លាក់ក្នុងអន្ទាក់របស់ចិនដីគោក។
ចុះផ្សាយនៅថ្ងៃ៖
ស្តាប់ - ០២:២៩
ការប្រកាសរបស់ប្រធានាធិបតីហុងឌូរ៉ាសលោកស្រីអ៊ីយ៉ូម៉ារ៉ា កាស្រ្តូបានធ្វើឡើងនៅក្នុងទំព័រ Twitter របស់លោកស្រីដោយបានបញ្ជាឲ្យប្រមុខការទូតលោកអេឌ័រដូ រ៉េណាជាអ្នករៀបចំបើកទំនាក់ទំនងផ្លូវការជាមួយប្រទេសចិន។ តែលោកស្រីអ៊ីយ៉ូម៉ារ៉ាមិនបានបញ្ជាក់ច្បាស់ៗពីកម្រិតនៃទំនាក់ទំនងផ្លូវការនោះទេ។ មួយវិញទៀត លោកស្រីអ៊ីយ៉ូម៉ារ៉ាក៏មិនបានបញ្ជាក់ច្បាស់ៗពីអនាគតនៃទំនាក់ទំនងដែលហុងឌូរ៉ាសកំពុងមានជាផ្លូវការជាមួយកោះតៃវ៉ាន់តាំងពីច្រើនទសវត្សរ៍កន្លងមកដែរ។ គួរបញ្ជាក់ថាមកទល់ពេលនេះ ហុងឌូរ៉ាសស្ថិតក្នុងចំណោម ១៤ប្រទេសក្នុងលោកដែលបានទទួលស្គាល់ និងមានទំនាក់ទំនងការទូតជាមួយកោះតៃវ៉ាន់។
តែចិនដែលមិនចង់ឃើញប្រទេសណាមួយក្នុងលោកទទួលស្គាល់តៃវ៉ាន់ជាផ្លូវការបានអះអាងថា ប្រទេសណាដែលបានទទួលស្គាល់ និងមានទំនាក់ទំនងការទូតជាមួយចិនដីគោកមិនអាចទទួលស្គាល់ និងមានទំនាក់ទំនងការទូតជាមួយចិនតៃវ៉ាន់បានឡើយ។ ការអះអាងរបស់ចិននេះមានន័យថា ការងាករកចិនរបស់ប្រទេសណាមួយមានន័យស្មើនឹងការបែរខ្នងដាក់តៃវ៉ាន់របស់ប្រទេសនោះជាស្វ័យប្រវត្តិ។ យ៉ាងណាក៏ដោយ តៃវ៉ាន់តាមរយៈក្រសួងការបរទេសបានបញ្ចេញប្រតិកម្មភ្លាមៗដោយចាត់ទុកការសម្រេចចិត្តរបស់ហុងឌូរ៉ាជាការសម្រេចចិត្តអាក្រក់ និងស្នើឲ្យហុងឌូរ៉ាសពិចារណាឡើងវិញកុំឲ្យធ្លាក់ក្នុងអន្ទាក់របស់ចិនដីគោក។
គេមិនដឹងថា តើមានមូលហេតុអ្វីដែលបានជំរុញឲ្យហុងឌូរ៉ាសប្តូរជំហរ ១៨០អង្សារដោយបែរខ្នងដាក់តៃវ៉ាន់ និងបែរមុខដាក់ចិនទេ។ អ្វីដែលគេអាចនិយាយបាន ការសម្រេចចិត្តរបស់ហុងឌូរ៉ាសពេលនេះបានធ្វើឡើងបន្ទាប់ពីមានព្រឹត្តិការណ៍ពីរផ្ទួនគ្នា ទី១ ជំនួបរវាងប្រមុខការទូតចិន និងហុងឌូរ៉ាសក្នុងប្រទេសប្រេស៊ីលនាឱកាសចូលរួមពិធីស្បថចូលកាន់តំណែងប្រធានាធិបតីប្រេស៊ីលរបស់លោកលូឡាក្នុងថ្ងៃទី១ មករា និងព្រឹត្តិការណ៍ទី២ ប្រមុខការទូតហុងឌូរ៉ាសបានប្រកាសក្នុងថ្ងៃទី២ កុម្ភៈពីការចរចាជាមួយចិនដើម្បីកសាងទំនប់វារីអគ្គិសនីមួយ។ គួរបញ្ជាក់ថា ចិនធ្លាប់បានផ្តល់លុយចំនួន ៣០០លានដុល្លារដើម្បីសាងសង់ទំនប់វារីអគ្គិសនីមួយទៀតនៅហុងឌូរ៉ាសក្នុងជំនាន់ប្រធានាធិបតីលោកហ័ន អរឡង់ដូ អែរណង់ដេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ