កូនស្រីអតីតនាយករដ្ឋមន្ត្រីថៃថាក់ស៊ីន ក្លាយជាបេក្ខជននាយករដ្ឋមន្ត្រីជាផ្លូវការ
ភឿថៃ គណបក្សប្រឆាំងដ៏ចម្បងគេនៅក្នុងប្រទេសថៃ បានប្រកាសតែងតាំងបេក្ខជននាយករដ្ឋមន្ត្រីជាផ្លូវការ សម្រាប់ការបោះឆ្នោតថ្ងៃទី ១៤ឧសភា២០២៣ខាងមុខ។ នោះគឺលោកស្រី ភែថងថាន ស៊ីណាវ៉ាត់ វ័យ៣៦ឆ្នាំ ដែលត្រូវជា កូនស្រីរបស់អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់។
ចុះផ្សាយនៅថ្ងៃ៖
ស្តាប់ - ០២:២៩
នៅចំពោះមុខហ្វូងសកម្មជនអាវក្រហមឆ្អៅ ដែលមកជួបជុំគ្នានៅក្នុងទីស្តាតមួយជាយក្រុងបាងកក បេក្ខជននាយករដ្ឋមន្ត្រីបក្សភឿថៃ លោកស្រី ភែថងថាន បានបង្ហាញខ្លួន ជាមួយបេក្ខជនពីររូបផ្សេងទៀតរបស់បក្ស គឺ លោក ស្រេដ្ឋា ថាវីស៊ីន សេដ្ឋីផ្នែកអចលនទ្រព្យទើបចូលធ្វើនយោបាយ និងលោក ឆៃកាសេម នីទិស៊ីរី មន្ត្រីជាន់ខ្ពស់បក្សដ៏ចំណាស់។
នៅប្រទេសថៃ គណបក្សនយោបាយនីមួយៗ មានលទ្ធភាពស្នើឈ្មោះបេក្ខជននាយករដ្ឋមន្ត្រីចំនួនបីរូប ដែលក្រោយជោគជ័យ សភានិងព្រឹទ្ធសភាជាអ្នកបោះឆ្នោតជ្រើសតាំងសម្រេច។ ប៉ុន្តែបើយោលទៅលើប្រវត្តិនិងភាពល្បីល្បាញនៃត្រកូលតាំងពីជាង២០ឆ្នាំមក លោកស្រី ភែថងថាន ស៊ីណាវ៉ាត់ ច្បាស់ជាបាំងបាត់បេក្ខជនផ្សេងទៀតហើយ។ សម្រាប់ពេលនេះ លោកស្រី ភែថងថាន លេចមុខជាសាធារណៈយ៉ាងតិចតួចណាស់ ព្រោះលោកស្រីកំពុងមានផ្ទៃពោះ ត្រូវឆ្លងទន្លេកូនទីពីរនៅខែឧសភាខាងមុខ។ លោកស្រីសន្យាចេញសេចក្តីថ្លែងការណ៍ឱ្យបានញឹកញាប់តាមដែលអាចធ្វើទៅបាន។ កិច្ចការឃោសនា ត្រូវជាបន្ទុករបស់គណបក្សដែលផ្តោតជាសំខាន់ទៅលើការសន្យាដំឡើងស្ទើរទ្វេដង ប្រាក់ខែអប្បបរិមា ដល់៦០០បាតក្នុងមួយថ្ងៃ។
ទោះមិនសូវបង្ហាញវត្តមាន ចូលប្រលូកនយោបាយជាលើកទីមួយ ឬគ្មានបទពិសោធន៍ ក៏ដោយ ក៏មិនថ្វីដែរ ឱ្យតែលោកស្រីជាតំណាងបក្សភឿថៃ តំណាងឱ្យលោកថាក់ស៊ីន។ នេះបើតាមទស្សនៈរបស់អ្នកវិភាគ។
ត្រកូល ស៊ីណាវ៉ាត់ នៅតែជាបង្អែកនយោបាយដ៏សំខាន់សម្រាប់ពលរដ្ឋថៃនៅទីជនបទភាគខាងជើង ទល់នឹងក្រុមយោធានិងរាជនិយម នៅក្រុងបាងកក។ ជាមហាសេដ្ឋីមានប្រាក់ប្រមាណ២ពាន់លានដុល្លារ (បើតាមForbes) លោក ថាក់ស៊ីន ស៊ីណាវ៉ាត់ ជាឪពុក ធ្លាប់ជាប់ឆ្នោតក្លាយជានាយករដ្ឋមន្ត្រីថៃ នៅរវាងពីឆ្នាំ២០០១ដល់ឆ្នាំ២០០៦ រួចត្រូវទម្លាក់ដោយរដ្ឋប្រហារយោធា។ ៥ឆ្នាំកន្លង រដ្ឋាភិបាលថៃរបស់លោកស្រី យីងឡាក់ ស៊ីណាវ៉ាត់ ដែលជាម្តាយមីង បានឡើងដឹកនាំប្រទេស តែត្រូវបានពួកយោធាដឹកនាំដោយលោកប្រាយុទ្ធចាន់អូចា ធ្វើរដ្ឋប្រហារទម្លាក់ទៀត។
ដំណើរផ្លូវរបស់លោកស្រី ភែថងថាន នៅវែងឆ្ងាយនិងបង្កប់ដោយឧបសគ្គច្រើនណាស់។ ទោះបីគណបក្សភឿថៃ ឈ្នះខ្លាំងយ៉ាងណាក៏ដោយ ក៏ក្រុមព្រឹទ្ធសភាស្និទ្ធនឹងយោធា អាចរារាំងបេក្ខភាពរបស់លោកស្រី ភែថងថាន មិនឱ្យក្លាយជានាយករដ្ឋមន្ត្រីបានដែរ បើយោលទៅតាមរដ្ឋធម្មនុញ្ញឆ្នាំ២០១៧។ ពេលនោះបើតាមអ្នកវិភាគ បេក្ខភាពលោក ស្រេថា ថាវីស៊ីន ប្រហែលងាយសម្របសម្រួលជាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ