ថៃ៖ នាយករដ្ឋមន្ត្រីប្រកាសរំលាយសភា ដើម្បីរៀបចំការបោះឆ្នោតសភាជាថ្មី
ដូចអ្វីដែលគេរង់ចាំ លោកប្រាយុទ្ធចាន់អូចា នាយករដ្ឋមន្ត្រីថៃ បានប្រកាសរំលាយសភានៅថ្ងៃចន្ទទី ២០ មីនា ២០២៣។ ក្រោយសេចក្តីសម្រេចរបស់ប្រមុខរដ្ឋាភិបាលនេះ ការបោះឆ្នោតសភាជាតិថ្មី ជាលើកទីពីរគិតចាប់តាំងពីរដ្ឋប្រហារយោធាឆ្នាំ២០១៤មក អាចនឹងប្រព្រឹត្តទៅថ្ងៃទី ៧ ឬថ្ងៃទី ១៤ខែសភា ខាងមុខ។ នេះបើតាមប្រភពសារព័ត៌មានថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ការបោះឆ្នោតសភាជាថ្មី នឹងត្រូវប្រព្រឹត្តទៅនៅរវាង ៤៥ទៅ៦០ថ្ងៃ ក្រោយសេចក្តីសម្រេចរំលាយសភា របស់ប្រមុខរដ្ឋាភិបាល។ ដូច្នេះគណៈកម្មការជាតិរៀបចំការបោះឆ្នោត ត្រូវប្រកាសបញ្ជាក់កាលបរិច្ឆេទនៃការបោះឆ្នោតថ្មី នៅប៉ុន្មានថ្ងៃខាងមុខនេះ។
ប៉ុន្តែយុទ្ធនាការឃោសនាបោះឆ្នោត បានចាប់ផ្តើមជាលក្ខណៈក្រៅផ្លូវការ តាំងពីជាច្រើនសប្តាហ៍មកហើយ តាមរយៈការរៀបចំធ្វើមិទ្ទិញ និងបិទផ្ទាំងបដាឃោសនាតាមដងផ្លូវ។ ជាការបោះឆ្នោតដែលមានការប្រកួតប្រជែងខ្លាំង រវាងនាយករដ្ឋមន្ត្រីផុតអាណត្តិដ៏អប្រជាប្រិយភាពបំផុត និងអ្នកនយោបាយថ្មីវ័យ៣៦ឆ្នាំ លោកស្រី ភែថងថាង ស៊ីណាវ៉ាត់ ដែលត្រូវជាកូនស្រីរបស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ ដែលរស់និរទេសខ្លួនតាំងពីជាច្រើនឆ្នាំមកហើយ តែបន្តមានឥទ្ធិពលខ្លាំងលើនយោបាយថៃ និងត្រូវជាក្មួយស្រីរបស់លោកស្រីយីងឡាក់ ស៊ីណាវ៉ាត់ អតីតនាយករដ្ឋមន្ត្រីធ្លាក់ពីតំណែងដោយរដ្ឋប្រហារដឹកនាំដោយលោកប្រាយុទ្ធចាន់អូចា។
ឡើងកាន់តំណែងដោយធ្វើរដ្ឋប្រហារយោធានៅឆ្នាំ២០១៤ បន្ទាប់មកបានជាប់ឆ្នោតដោយចម្រូងចម្រាសនៅឆ្នាំ២០១៩ លោកប្រាយុទ្ធចាន់អូចា បានក្លាយជាមេដឹកនាំរដ្ឋាភិបាលថៃ ដ៏យូរជាងគេម្នាក់ ក្នុងប្រទេសដែលល្បីខាងមានរដ្ឋប្រហារដ៏ញឹកញាប់ (១២ដងគិតចាប់តាំងពីឆ្នាំ១៩៣២មក)។
បើតាមការស្ទង់មតិផ្សព្វផ្សាយនៅថ្ងៃអាទិត្យទី ១៩មីនា គណបក្សភឿថៃ ដឹកនាំដោយលោកស្រី ភែថងថាន ស៊ីណាវ៉ាត់ បានទទួលការគាំទ្រចង់បោះឆ្នោតឱ្យដល់ទៅពាក់កណ្តាល ទល់នឹង១២%សម្រាប់គណបក្សរបស់លោក ប្រាយុទ្ធចាន់អូចា។ ប៉ុន្តែរដ្ឋធម្មនុញ្ញឆ្នាំ២០១៧ តាក់តែងដោយរបបសឹក ទំនងជានឹងរារាំងគណបក្សភឿថៃ ឱ្យពិបាកសម្រេចកម្មវត្ថុប្រមូលសំឡេងភាគច្រើន (៣១០អាសនៈក្នុងចំណោម៥០០) ហើយក្លាយជាប្រមុខដឹកនាំរដ្ឋាភិបាលថ្មីណាស់ ព្រោះនាយករដ្ឋមន្ត្រីត្រូវតែងតាំងដោយសមាជិកសភាផង និងដោយសមាជិកព្រឹទ្ធសភាចំនួន២៥០រូបដែលសុទ្ធតែមាននិន្នាការស្និទ្ធនឹងយោធាផង។
ក្រៅពីលោកប្រយុទ្ធចាន់អូចា និងលោកស្រី ភែថងថាន ស៊ីណាវ៉ាត់ គណបក្សMove Forward បានទទួលការគាំទ្រ១៧% និងធ្លាប់បានបង្កការភ្ញាក់ផ្អើលខ្លាំងក្នុងសម័យបោះឆ្នោតឆ្នាំ២០១៩។ ប្រមុខបក្ស លោក ភីតា លីមចារឿងរ៉ាត់ រំពឹងលើបាតុករប្រជាធិបតេយ្យឆ្នាំ២០២០ ដោយធានាថា ទិដ្ឋភាពនយោបាយថៃបានផ្លាស់ប្តូរច្រើនក្នុងរយៈពេលបួនឆ្នាំកន្លងមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ