ប៉ាគីស្ថាន ចាប់ខ្លួនថ្នាក់ដឹកនាំគណបក្សលោក អ៊ីមរ៉ាន់ ខាន់ និងពង្រាយកងទ័ពប្រឈមនឹងបាតុកម្មប្រឆាំង
នៅប៉ាគីស្ថាន យ៉ាងហោចណាស់ ថ្នាក់ដឹកនាំសំខាន់ៗរបស់គណបក្សលោក អ៊ីមរ៉ាន់ ខាន់ ចំនួន ៧ នាក់បន្ថែមទៀត ត្រូវចាប់ខ្លួននិងឃុំខ្លួន។ នេះតាមការបញ្ជាក់របស់កងយោធាប៉ាគីស្ថាន នៅព្រឹកថ្ងៃព្រហស្បត្តិ៍ និងដែលអះអាងមូលហេតុថា ព្រោះតែពួកគេជាមេខ្លោងបង្កអំពើហិង្សាបាតុកម្មប្រឆាំងនឹងរដ្ឋាភិបាល។ ការចាប់ខ្លួននេះ គឺបន្ទាប់ពីអតីតនាយករដ្ឋមន្ត្រីប៉ាគីស្ថាន លោក អ៊ីមរ៉ាន់ ខាន់ ត្រូវក្រុមទាហានប៉ារ៉ា ចុះមកចាប់ខ្លួនដល់តុលាការ កាលពីថ្ងៃអង្គារទី៩ឧសភា។
ចុះផ្សាយនៅថ្ងៃ៖
ស្តាប់ - ០២:២៥
ជាច្រើនខែមកហើយ ប៉ាគីស្ថាន ធ្លាក់ក្នុងវិបត្តិសេដ្ឋកិច្ចលំបាកមួយជាន់ ហើយពេលនេះ ស្ថានភាពនយោបាយក៏កាន់តែដុបដាប់ខ្លាំងទៀត។ បណ្តាប្រជាជនប៉ាគីស្ថាន ដែលមានសមានចិត្តស្រឡាញ់គាំទ្រ លោក អ៊ីមរ៉ាន់ ខាន់ និងគាំទ្រដើមតាមគណបក្ស«ចលនាប៉ាគីស្ថានដើម្បីយុត្តិធម៌» PTI របស់លោក គឺ បាននាំគ្នាចុះផ្លូវតវ៉ាប្រឆាំងប៉ុន្មានថ្ងៃមកនេះ ហើយអ្នកខ្លះ ប្តេជ្ញាលពីជីវិត ដើម្បីអតីតនាយករដ្ឋមន្ត្រីប៉ាគីស្ថានរូបនេះទៀតផង។
បាតុករម្នាក់ ឈ្មោះ Niaz Ali នៅក្រុង Peshawar បានថ្លែងប្រាប់អ្នកកាសែតទីភ្នាក់ងារព័ត៌មានបារាំងAFPថា ពួកយោធាចាប់ខ្លួនលោក អ៊ីមរ៉ាន់ ខាន់ ព្រោះតែចង់បំបាក់ស្មារតីអ្នកគាំទ្រ ក៏ប៉ុន្តែ ពួកគេ ពួកយោធាយល់ច្រឡំហើយ ច្រឡំពីព្រោះថា ពួកយើងនឹងនៅតែដើរតាមលោក អ៊ីមរ៉ាន់ ខាន់ ជានិច្ច ហើយនឹងគាំទ្ររូបលោករហូតទាល់តែដល់ជីវិតចុងក្រោយ។
គួរជ្រាបថា ក្រោយពីចាប់ខ្លួនលោក អ៊ីមរ៉ាន់ ខាន់ នៅថ្ងៃអង្គារ៍ ពួកយោធាប៉ាគីស្ថាន ក៏បានចាប់ខ្លួនថ្នាក់ដឹកនាំបក្ស«ចលនាប៉ាគីស្ថានដើម្បីយុត្តិធម៌» ៧នាក់ ព្រមទាំងពួកបាតុករផ្សេងទៀត ចំនួនប្រមាណ ២ ពាន់នាក់ ក៏ត្រូវចាប់ឃាត់ខ្លួនដែរ។ ជាការសម្តែងកំហឹងប្រឆាំងបតវិញ ឡាន ម៉ូតូ យានជំនិះមួយចំនួន របស់ពួកអាជ្ញាធរប៉ូលិស ត្រូវពួកបាតុករដុតកម្ទេចចោល។ មន្ទីរពេទ្យបញ្ជាក់ថា យ៉ាងហោចមានមនុស្ស ៦ នាក់បានស្លាប់ នៅក្នុងការប៉ះទង្គិចគ្នារវាងបាតុករនិងប៉ូលិស។
នៅថ្ងៃនេះ នគរបាល ដាក់ពង្រាយកម្លាំងពេញរដ្ឋធានីអ៊ីស្លាមម៉ាបាត និងនៅទីក្រុង Peshawar កន្លែងដែលមានប្រជាជនរស់នៅផ្តុំច្រើនជាងគេ និងនៅទីប្រជុំជនផ្សេងទៀត។ អាជ្ញាធរខាងទូរគមនាគមន៍ ក៏បានកាត់ផ្តាច់ប្រព័ន្ធអ៊ិនធ័រនែត ហើយត្បិតត្បៀតរឹតបន្តឹងការប្រើប្រាស់បណ្តាញសង្គម ដូចជា ហ្វេសុបក ធ្វីតធ័រ ឬយូធូប។ ចំណែកឯ សាលារៀននៅទូទាំងប្រទេស ត្រូវបិទទ្វារ។ ការប្រលងទាំងឡាយទាំងពួក ត្រូវលើកពេល។
ប្រឈមមុខចំពោះសភាពការណ៍បែបនេះ បណ្តាប្រទេសនៅបស្ចិមលោក បានអំពាវនាវឲ្យ ប៉ាគីស្ថាន បន្ថាយភាពតានតឹង និងគោរពគោលការណ៍ប្រជាធិបតេយ្យ។ នៅថ្ងៃពុធ អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូទែរស៍ បានដាស់តឿនឲ្យអាជ្ញាធរប៉ាគីស្ថាន គោរពនីតិរដ្ឋ ហើយទម្លាក់ចោលសកម្មភាពដែលបង្កឲ្យប្រឈមមុខដាក់គ្នាកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ