ចិន និងអាមេរិករិះគន់គ្នាយ៉ាងចាស់ដៃ នៅកិច្ចប្រជុំស្តីពីសន្តិសុខអាស៊ី Shangri-la
នៅកិច្ចប្រជុំកំពូលស្តីពីសន្តិសុខអាស៊ី Shangri-la នៅប្រទេសសិង្ហបុរី រដ្ឋមន្រ្តីការពារជាតិចិន លោកលី ស្ហាំងហ្វូ នៅថ្ងៃអាទិត្យទី៤មិថុនា បានដំឡើងសំឡេងរិះគន់ខ្លាំងៗ ការប៉ុនប៉ងបង្កើតបក្សសម្ព័ន្ធនៅអាស៊ី ដែលមានទម្រង់រូបរាងដូច បក្សសម្ព័ន្ធអូតង់។ សម្រាប់រដ្ឋមន្រ្តីការពារជាតិចិន ការប្រមូលផ្តុំចងក្រងជាបក្សសម្ព័ន្ធរបស់ប្រទេសមួយក្រុមនឹងអាចរុញច្រានអាស៊ីប៉ាស៊ីហ្វិកទៅក្នុង ជម្លោះ ប្រឈមមុខដាក់គ្នា នៅក្នុងតំបន់។ ការព្រមានរបស់ប្រមុខការពារជាតិចិន ធ្វើឡើងនៅចំពេលក្រសួងការពារជាតិអាមេរិកខឹងសម្បារ ចោទប្រកាន់កប៉ាល់ចិនថា បានធ្វើសកម្មភាពដ៏គ្រោះថ្នាក់ នៅក្បែរកប៉ាល់ចម្បាំងអាមេរិក និងកាណាដា នៅច្រកសមុទ្រតៃវ៉ាន់ កាលពីថ្ងៃសៅរ៍ម្សិលមិញ។
ចុះផ្សាយនៅថ្ងៃ៖
ស្តាប់ - ០២:៤៩
ឡើងថ្លែងនៅក្នុងសន្និសីទ រៀបចំឡើងក្នុងក្របខ័ណ្ឌនៃកិច្ចប្រជុំកំពូល សង់គ្រីឡា Shangri-la នៅប្រទេសសិង្ហបុរី រដ្ឋមន្រ្តីការពារជាតិចិន លោកលី ស្ហាំងហ្វូ នៅថ្ងៃអាទិត្យនេះ បរិហាររិះគន់ខ្លាំងៗ ការប៉ុនប៉ង បង្កើតបក្សសម្ព័ន្ធ “បែបអូតង់” នៅអាស៊ីប៉ាស៊ីហ្វិក។ តាមប្រមុខការពារជាតិចិន ការប៉ុនប៉ងជំរុញឲ្យមានបក្សសម្ព័ន្ធនៅអាស៊ីប៉ាស៊ីហ្វិក ជាមធ្យោបាយចាប់ជំរិតប្រទេសក្នុងតំបន់ជាចំណាប់ខ្មាំង និងបំប៉ោងជម្លោះ ព្រមទាំងការប្រឈមមុខដាក់គ្នា។ ជាលទ្ធផល វានឹងរុញច្រានអាស៊ីប៉ាស៊ីហ្វិកទៅក្នុងខ្យល់គួចនៃជម្លោះ ការស្អប់បែរខ្នងដាក់គ្នា។
សម្រាប់លោករដ្ឋមន្រ្តីការពារជាតិចិន អាស៊ីប៉ាស៊ីហ្វិក សព្វថ្ងៃត្រូវការការសហការដោយបើកចំហរ ប៉ុន្តែ មិនមែនបក្សសម្ព័ន្ធ ប្រទេសមួយក្រុមតូចៗ។ “គេមិនត្រូវភ្លេចគ្រោះមហន្តរាយដែលជាលទ្ធផលនៃសង្រ្គាមលោកទាំងពីរ ដែលបានបណ្តាលឲ្យប្រជាជនគ្រប់ប្រទេសក្នុងលោក រងគ្រោះ។ គេមិនត្រូវអនុញ្ញាតឲ្យប្រវត្តិសាស្រ្តដ៏ឈឺចាប់កើតឡើងសាជាថ្មី” នេះជាប្រសាសន៍របស់លោកលី ស្ហាំងហ្វូ។
ប្រមុខការពារជាតិចិន លោកលី ស្ហាំងហ្វូ មិនបាននិយាយរិះគន់ចំឈ្មោះ ប៉ុន្តែ គេដឹងថា លោកចង់សំដៅដល់អាមេរិក ដែលចាប់ដៃជាមួយអូស្ត្រាលី និងអង់គ្លេសសម្រាប់បក្សម្ព័ន្ធ AUKUS និងសម្ព័ន្ធQUAD ដែលអាមេរិកចូលរួមបង្កើតជាមួយ អូស្ត្រាលី ឥណ្ឌា និងជប៉ុន ក្នុងគោលដៅទប់ទល់ការពង្រីកដែនឥទ្ធិពលរបស់ចិន នៅអាស៊ី ប៉ាស៊ីហ្វិក។
ភាគីអាមេរិកមិនទាន់ប្រតិកម្មទៅនឹងការលើកឡើងរបស់រដ្ឋមន្រ្តីការពារជាតិចិន ព្រោះថា រដ្ឋមន្រ្តីការពារជាតិអាមេរិកផ្ទាល់ នៅពេលឡើងថ្លែងនៅក្នុងកិច្ចប្រជុំកំពូល Shangri-la កាលពីថ្ងៃសៅរ៍ម្សិលមិញ ក៏បានបញ្ចេញសំឡេងរិះគន់ចិន និងចេញមុខធានាការពារសម្ព័ន្ធមិត្ត ប្រទេសដៃគូ នៅចំពោះមុខការគំរាមកំហែង កំញើញធ្វើបាបរបស់កងទ័ពចិន នៅ សមុទ្រចិនខាងត្បូង។
នៅថ្ងៃអាទិត្យនេះ ភាពតានតឹង អាមេរិក ចិន បានកើនឡើងមួយកម្រិតទៀត បន្ទាប់ពីកងទ័ពអាមេរិកខឹងសម្បារ ចោទប្រកាន់កងទ័ពចិនថា បានធ្វើសកម្មភាពដ៏គ្រោះថ្នាក់ សាជាថ្មីម្តងទៀត នៅច្រកសមុទ្រតៃវ៉ាន់។ តាមសេចក្តីថ្លែងការណ៍របស់បញ្ជាការដ្ឋានកងទ័ពអាមេរិក កាលពីថ្ងៃសៅរ៍ កប៉ាល់ចិនមួយគ្រឿងបានបើកបត់ចុះ បត់ឡើង ជុំវិញ កប៉ាល់ចម្បាំងរបស់អាមេរិក USS Chung-Hoonដែលកំពុងអមនាវាចម្បាំងកាណាដា នៅច្រកសមុទ្រតៃវ៉ាន់។ សម្រាប់អ្នកនាំពាក្យក្រសួងការពារជាតិអាមេរិក ដែលធ្វើដំណើរអមលោករដ្ឋមន្រ្តីការពារជាតិ ឡយអូស្ទីន នៅសិង្ហបុរី អាមេរិកនៅតែព្រួយបារម្ភពីសកម្មភាពដ៏គ្រោះថ្នាក់របស់កងទ័ពជាតិចិន នៅក្នុងតំបន់។ ហេតុការណ៍ កាលពីថ្ងៃសៅរ៍ជាឧទាហរណ៍ជាក់ស្តែង។
កងទ័ពជាតិចិនវិញ អះអាងថា កប៉ាល់ចិនបានចេញទៅតាមដានដំណើរគោចររបស់កប៉ាល់ចម្បាំងទាំងពីររបស់អាមេរិក និងកាណាដា នៅក្បែរកោះតៃវ៉ាន់ ដែលចិនអះអាងជាទឹកដីមួយផ្នែករបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ