រដ្ឋមន្រ្តីក្រសួងហិរញ្ញវត្ថុអាមេរិកទាមទារឲ្យមានកិច្ចសន្ទនាផ្ទាល់រវាងក្រុងវ៉ាស៊ីនតោន និងក្រុងប៉េកាំង
ថ្ងៃសៅរ៍ ទី៨ កក្កដានេះជាថ្ងៃទី២ នៃទស្សនកិច្ចរបស់រដ្ឋមន្រ្តីក្រសួងហិរញ្ញវត្ថុអាមេរិកលោកស្រីចានែត យេលែននៅក្នុងប្រទេសចិន។ នៅក្នុងជំនួបជាមួយឧបនាយករដ្ឋមន្រ្តីចិនលោកហ៊ី លីហ្វេង លោកស្រីចានែត យេលែនបានទាមទារឲ្យមានកិច្ចសន្ទនាដោយផ្ទាល់រវាងក្រុងវ៉ាស៊ីនតោន និងក្រុងប៉េកាំងទាក់ទងនឹងសំណុំរឿងដែលមានបង្កប់ដោយភាពមន្ទិលសង្ស័យ និងក្តីបារម្ភ។ ក្រៅពីទំនាក់ទំនងទ្វេភាគី លោកស្រីចានែត យេលែនក៏ចង់ឃើញអាមេរិក និងចិនចាប់ដៃគ្នាដើម្បីដោះស្រាយបញ្ហាប្រឈមក្នុងលោក ពិសេសការប្រែប្រួលអាកាសធាតុ៕
ចុះផ្សាយនៅថ្ងៃ៖
ស្តាប់ - ០២:២៣
នៅក្នុងជំនួបជាមួយឧបនាយករដ្ឋមន្រ្តីចិនលោកហ៊ី លីហ្វេងដែលទទួលបន្ទុកសំណុំរឿងសេដ្ឋកិច្ច រដ្ឋមន្រ្តីក្រសួងហិរញ្ញវត្ថុអាមេរិកលោកស្រីចានែត យេលែនបាននិយាយប្រាប់លោកហ៊ីថា នៅពេលដែលអាមេរិក និងចិនមានមន្ទិលសង្ស័យ និងក្តីបារម្ភទាក់ទងនឹងសំណុំរឿងសេដ្ឋកិច្ចពិសេសណាមួយ អាមេរិក និងចិនត្រូវតែជួបជជែកគ្នាដោយផ្ទាល់។ លោកស្រីចានែត យេលែនបានបន្ថែមថា ទោះបីជាអាមេរិក និងចិនទើបស្គាល់ភាពតានតឹងថ្មីៗរវាងគ្នាក៏ដោយក៏ការដោះដូរពាណិជ្ជកម្មរវាងប្រទេសទាំងពីរក្នុងឆ្នាំ ២០២២ បានឡើងដល់កម្រិតកំពូលគួរឲ្យកត់សម្គាល់។
ក្រៅពីប្រធានរឿងសេដ្ឋកិច្ចដែលនៅតែមានភាពប្រសើរ លោកស្រីចានែត យេលែនបានផ្តោតលើប្រធានរឿងអាកាសធាតុដែលលោកស្រីយល់ថា កិច្ចសហប្រតិបត្តិការរវាងអាមេរិក និងចិនជារឿងសំខាន់ក្នុងការប្រយុទ្ធប្រឆាំងនឹងការប្រែប្រួលអាកាសធាតុ។ « ដោយសារអាមេរិក និងចិនជាអ្នកបញ្ចេញឧស្ម័នផ្ទះកញ្ចក់ច្រើនជាងគេក្នុងលោក និងជាអ្នកវិនិយោគធំជាងគេលើថាមពលកកើតឡើងវិញ អាមេរិក និងចិនមានការទទួលខុសត្រូវរួម និងមានសមត្ថភាពក្នុងការបង្ហាញផ្លូវ »នេះជាការថ្លែងរបស់លោកស្រីចានែត យេលែន។
នៅក្នុងន័យនេះ លោកស្រីចានែត យេលែនបានលើកឡើងពីកិច្ចសហប្រតិបត្តិការរវាងអាមេរិក និងចិនលើហិរញ្ញប្បទានប្រឆាំងនឹងការប្រែប្រួលអាកាសធាតុដោយបានស្នើឲ្យចិនគាំទ្របណ្តាស្ថាប័នពហុភាគីដូចយ៉ាងមូលនិធិបៃតងសម្រាប់អាកាសធាតុ។ គួរបញ្ជាក់ថា ចិនបានព្យួរកិច្ចចរចារឿងអាកាសធាតុជាមួយអាមេរិកកាលពីរដូវក្តៅឆ្នាំ ២០២២ ដើម្បីប្រឆាំងនឹងទស្សនកិច្ចរបស់អតីតប្រធានសភាអាមេរិកលោកស្រីណាន់ស៊ី ប៉េឡូស៊ីនៅតៃវ៉ាន់។ តែឥឡូវនេះ សញ្ញានៃភាពធូរស្រាលហាក់បានផ្តើមមានជាថ្មី ពិសេសតាមរយៈទស្សនកិច្ចរបស់រដ្ឋមន្រ្តីហិរញ្ញវត្ថុអាមេរិកលោកស្រីចានែត យេលែននៅចិន។
អ្នកទទួលខុសត្រូវម្នាក់របស់ក្រសួងការបរទេសអាមេរិកបានបញ្ជាក់ថា ប្រេសិតពិសេសអាមេរិកទទួលបន្ទុកសំណុំរឿងអាកាសធាតុលោកចន ឃ៊ែរីនឹងទៅបំពេញទស្សនកិច្ចនៅចិននាពេលខាងមុខដើម្បីជជែកជាមួយចិនពីលទ្ធភាពនៃកិច្ចសហប្រតិបត្តិការប្រយុទ្ធប្រឆាំងនឹងការប្រែប្រួលអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ