សភាអាមេរិកបោះឆ្នោតយល់ព្រម ទទួលយកកិច្ចព្រមព្រៀងពង្រឹងទំនាក់ទំនងពាណិជ្ជកម្មជាមួយតៃវ៉ាន់
សភាតំណាងអាមេរិក បានបោះឆ្នោតយល់ព្រមទទួលយកកិច្ចព្រមព្រៀងថ្មីមួយ ដែលតំណាងអាមេរិកបានចុះជាមួយកោះតៃវ៉ាន់ ដើម្បីពង្រឹងទំនាក់ទំនងពាណិជ្ជកម្ម។ កិច្ចព្រមព្រៀងនេះ នឹងត្រូវយកទៅឆ្លងនៅព្រឹទ្ធសភាអាមេរិកមួយដំណាក់ទៀត។ តែយ៉ាងណា ក្រសួងការបរទេសចិន បានប្រកាសថ្កោលទោស ថាការបោះឆ្នោតទទួលស្គាល់ជាផ្លូវការលើកិច្ចព្រមព្រៀងនេះ វាគឺជាការបំពាននឹង “គោលការណ៍ចិនតែមួយ”។
ចុះផ្សាយនៅថ្ងៃ៖
ស្តាប់ - ០២:៣៤
កិច្ចព្រមព្រៀងដែលត្រូវបានចុះហត្ថលេខា ដោយតំណាងរដ្ឋាភិបាលអាមេរិក និងកោះតៃវ៉ាន់ កាលពីថ្ងៃទី១មិថុនានេះ បានកំណត់អំពីការពង្រឹង អភិវឌ្ឍន៍ការដោះដូរពាណិជ្ជកម្មរវាងភាគីទាំងសងខាង។ ការនេះ នឹងតម្រូវឲ្យអាជ្ញាធររដ្ឋាភិបាលទាំងសងខាង រៀបចំប្រព័ន្ធច្បាប់ និងក្រិត្យក្រមមួយចំនួន ឲ្យលក្ខណៈស្របគ្នា ជាក់ស្តែងនៅក្នុងវិស័យគយពន្ធដារ ដែលគ្រប់គ្រងការនាំចូលនាំចេញទំនិញ ព្រមទាំងស្តង់ដារមួយចំនួនទៀត ដើម្បីប្រយុទ្ធប្រឆាំងនឹងអំពើពុករលួយជាដើម។
កិច្ចព្រមព្រៀងនេះ ទើបតែត្រូវបាន សភាតំណាងបោះឆ្នោតទទួលយល់ព្រមនៅថ្ងៃទី២២មិថុនា ហើយត្រូវបញ្ជូនបន្តទៅកាន់ព្រឹទ្ធសភា។ កោះតៃវ៉ាន់ បានអបអរសាទរ និងចាត់ទុកកិច្ចព្រមព្រៀងទំនាក់ទំនងពាណិជ្ជកម្មនេះ គឺជាកិច្ចព្រមព្រៀងជាប្រវត្តិសាស្ត្រ។
ដោយឡែក ក្រសួងការបរទេសចិន បានប្រកាសថ្កោសទោស បន្ទាប់ពីបានដំណឹងថាសភាអាមេរិក បានបោះឆ្នោតទទួលយកជាផ្លូវការនូវកិច្ចព្រមព្រៀងនេះ។ ភាគីចិនលើកឡើងថា កិច្ចព្រមព្រៀងនេះ វាបានបំពានយ៉ាងស្រស់ៗ ទៅលើការសន្យា ដែលសហរដ្ឋអាមេរិកបានសច្ចាជាមួយចិន ថានឹងមានទំនាក់ទំនងជាមួយតៃវ៉ាន់ តែជាលក្ខណៈក្រៅផ្លូវការតែប៉ុណ្ណោះ។ ក្រសួងការបទេសចិន បន្តថា តែនេះ សហរដ្ឋអាមេរិកបែរជាបាន ចុះកិច្ចព្រមព្រៀងជាផ្លូវការជាមួយតៃវ៉ាន់ ដែលជាដែនដីរបស់ចិន ហើយកិច្ចព្រមព្រៀងនេះត្រូវបានសភាអាមេរិកអនុម័តយល់ព្រមទៀត។
នៅក្នុងលិខិតប្រកាសថ្កោលទោសនេះ ក្រសួងការបរទេសចិន បានទាមទារថា ភាគីសហរដ្ឋអាមេរិក ត្រូវតែដកខ្លួនចេញពីកិច្ចព្រមព្រៀងនេះជាបន្ទាន់ ហើយត្រូវតែឈប់ ជំរុញឬផ្តល់ក្តីសង្ឃឹម ឲ្យភាគីតៃវ៉ាន់ដើរលើក្តីសង្ឃឹមថានឹងបានឯករាជ្យ តទៅទៀត ព្រោះថាធាតុពិត ក្តីសង្ឃឹមនេះ វាគឺជាការភ័ន្តច្រឡំទាំងស្រុង។
សូមរំលឹកថា នៅឆ្នាំ១៩៩៤ អាមេរិកនិងតៃវ៉ាន់ មាន “ក្របខណ្ឌ” ទំនាក់ទំនងជាមួយគ្នា លើវិស័យ ពាណិជ្ជកម្ម និងការវិនិយោគ។ តាមរយៈក្រមខណ្ឌពិសេសនេះ អាមេរិកគឺជាអ្នកផ្គត់ផ្គង់គ្រឿងសព្វាវុធធំជាងគេបង្អស់មកឲ្យតៃវ៉ាន់។
គួរបញ្ជាក់ដែរថា ដោយអនុលោមតាមគោលការណ៍ចិនតែមួយ គឺសហរដ្ឋអាមេរិកមិនមានទំនាក់ទំនងផ្លូវការជាមួយតៃវ៉ាន់នោះទេ។ ទំនាក់ទំនងដែលមាន រវាងអាមេរិកនិងតៃវ៉ាន់ គឺជាទំនាក់ទំនងក្រៅផ្លូវការ ដោយគេប្រើ វិទ្យាស្ថានអាមេរិកប្រចាំប្រចាំតៃវ៉ាន់ ធ្វើជាស្ពាន ជំនួសឲ្យស្ថានទូត។ គឺវិទ្យាស្ថានអាមេរិកប្រចាំនៅតៃវ៉ាន់នេះហើយ ដែលបានចុះហត្ថលេខាលើកិច្ចព្រមព្រៀងកាលពីថ្ងៃទី១មិថុនា ជាមួយការិយាល័យសេដ្ឋកិច្ចនិងវប្បធម៌តៃវ៉ាន់ ប្រចាំនៅសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ