ចិនប្រាប់បារាំងថា ប្រាថ្នាចង់ធ្វើឲ្យសហប្រតិបត្តិជាមួយបារាំង កាន់តែស៊ីជម្រៅគ្រប់វិស័យ
កាលពីថ្ងៃទី២៩កក្កដា លោករដ្ឋមន្ត្រីក្រសួងសេដ្ឋកិច្ចបារាំង បានទៅចូលរួមវេទិកាសន្ទនា បារាំង-ចិន នៅឯទីក្រុងប៉េកាំង។ នៅក្នុងឱកាសនោះ ភាគីចិន បានលើកឡើងថា ចិនពិតជាមានចេតនា ក្នុងការពង្រឹង ពង្រីក ធ្វើឲ្យចំណងសហប្រតិបត្តិការជាមួយបារាំង កាន់តែស៊ីជម្រៅប្រសើរឡើង គ្រប់វិស័យទាំងអស់។ គួរកត់សំគាល់ថា ក្នុងអំឡុងពេលនេះ បារាំងក៏ដូចជាប្រទេសអឺរ៉ុបផ្សេងទៀត បានបង្ហាញជំហរ ចង់ឈប់ពឹងផ្អែកខ្លាំងជ្រុលពេក ទៅលើទំនិញ និងទីផ្សាររបស់ចិន។
ចុះផ្សាយនៅថ្ងៃ៖
ស្តាប់ - ០២:២១
លោក He Lifeng ឧបនាយករដ្ឋមន្ត្រីចិន បានថ្លែងប្រាប់ លោក Bruno Le Maire រដ្ឋមន្ត្រីក្រសួងសេដ្ឋកិច្ចបារាំង ថាចិន ចង់ធ្វើឲ្យសហប្រតិបត្តិការរវាងបារាំងនិងចិន កាន់តែស៊ីជម្រៅ ក្នុងវិស័យជាច្រើន មិនថាសេដ្ឋកិច្ច ហិរញ្ញវត្ថុ ឬពាណិជ្ជកម្ម ព្រមទាំងវិស័យវិទ្យាសាស្ត្រ និងបច្ចេកវិទ្យាទំនើបផងដែរ។
លោកឧបនាយករដ្ឋមន្ត្រីចិន បានបន្ថែមថា ចិនក៏ចង់ឃើញភាគីបារាំង ប្រឹងប្រែងដែរ ក្នុងការស្តារពង្រឹងទំនាក់ទំនង រវាងចិននិងសហភាពអឺរ៉ុប ឲ្យកាន់តែល្អប្រសើរ។ ទំនាក់ទំនងបារាំង-ចិន ដែលលោក He Lifeng បានចាត់ទុកថា ស្ថិតនៅលើមាគ៌ាដ៏ត្រឹមត្រូវ។
សូមបញ្ជាក់ថា ចិនគឺជាដៃគូពាណិជ្ជកម្មធំទី៣សម្រាប់បារាំង បន្ទាប់ពីសហភាពអឺរ៉ុប និងសហរដ្ឋអាមេរិក។ ក៏ប៉ុន្តែ សហគ្រាសបារាំងកាន់តែច្រើន បានបង្ហាញការព្រួយបារម្ភ ដោយសារតែខ្លាចក្រែង ត្រូវស្ថិតនៅលើផ្លូវខ្វែងនៃការប្រជែងឥទ្ធិពល ក៏ដូចជាវិវាទពាណិជ្ជកម្មរវាងមហាយក្សទាំង២ គឺចិននិងអាមេរិក។ បន្ថែមពីនេះទៀត កាលពីខែមិថុនា ប្រទេសសមាជិកសហភាពអឺរ៉ុប បានសម្រេចជាឯកច្ឆ័ន្ទ ដាក់ចេញនូវទណ្ឌកម្មកញ្ចប់ទី១១ទៅលើរុស្ស៊ី ដែលធ្វើសង្គ្រាមឈ្លានពានអ៊ុយក្រែន។ ទណ្ឌកម្មដែលអាចនឹងប៉ះពាល់ទៅលើក្រុមហ៊ុនចិន ដែលគេចាត់ទុកថាបានជួយរុស្ស៊ី ក្នុងការបង្វែងទណ្ឌកម្ម ដែលអឺរ៉ុបបានដាក់កន្លងមក។
នៅប៉េកាំង លោក Bruno Le Maire រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុបារាំង បានលើកឡើង មានសំណុំរឿង៣ធំៗ ដែលបារាំងនិងចិន ត្រូវរួមគ្នាដោះស្រាយ។ ទីមួយគឺ សំណុំរឿងអន្តរកម្មថាមពល ទី២គឺការរៀបចំឡើងវិញ នូវបណ្ដាញតម្លៃ ហើយទី៣ គឺការធ្វើអភិវឌ្ឍន៍ឈានឡើង ផ្នែកបច្ចេកវិទ្យា ដោយធ្វើយ៉ាងណា បើកទីផ្សារចិនឲ្យក្រុមហ៊ុនសហគ្រាសបារាំង ក្នុងវិស័យធនាគារ នុយក្លេអ៊ែរ គ្រឿងសំអាង និងកសិកម្មផងដែរ។
លោករដ្ឋមន្ត្រីបារាំង បានបន្ថែមថា វាជារឿងចាំបាច់ពិតមែន ដែលត្រូវតែពង្រឹងសហប្រតិបត្តិការ ដូច្នេះគឺត្រូវតែប្រើប្រាស់ឱកាសនេះដើម្បីជជែកពិភាក្សាគ្នា។ បន្ថែមពីនេះដែរ លោករដ្ឋមន្ត្រីបារាំង បានអះអាងប្រាប់ភាគីចិនថា បារាំងអាចពិចារណា ទទួលស្វាគមន៍ការវិនិយោគរបស់ចិន ក្នុងវិស័យសំខាន់ៗមួយចំនួន ជាក់ស្តែង វិស័យបច្ចេកវិទ្យាទំនើប មិនថាក្នុង ឬនៅក្រៅវិស័យពាក់ព័ន្ធនឹងអធិបតេយ្យភាពជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ