ជំនួបកំពូលរវាងបារាំងនិងក្រុមប្រទេសតំបន់សាហ៊ែល ដើម្បីកំណត់ពីអន្តរាគមន៍របស់យោធាបារាំង
ចុះផ្សាយនៅថ្ងៃ៖
ស្តាប់ - ០៧:៤៣
ប្រឈមនឹងការវាយប្រហារភេរវកម្ម កាន់តែច្រើនឡើង នៅប្រទេសអាហ្វ្រិក តំបន់សាហ៊ែល នៅថ្ងៃចន្ទទី១៣មករានេះ លោកអេម៉ានុយអ៊ែល ម៉ាក្រុង បើកជំនួបកំពូលមួយ នៅទីក្រុងប៉ូ ភាគនិរតីប្រទេសបារាំង ជាមួយនឹងថ្នាក់ដឹកនាំនៃប្រទេសសាហ៊ែលនេះ (ម៉ាលី បួគីណាហ្វាសូ នីហ្សេ ឆាដ និងម៉ូរីតានី)។ បើតាមប្រភពច្បាស់ការ ជំនួបកំពូលនេះ គឺប្រធានាធិបតីបារាំង ត្រូវការឲ្យប្រទេសតំបន់សាហ៊ែល បញ្ជាក់ឲ្យច្បាស់ ទាក់ទិននឹងវត្តមានរបស់កងទ័ពបារាំង នៅតាមប្រទេសខ្លួន ព្រមទាំងគូសវាសរកដំណោះស្រាយ ដើម្បីប្រយុទ្ធប្រឆាំងនឹងក្រុមឧទ្ទាមភេរវកម្មនៅតំបន់សាហ៊ែល។
នៅឆ្នាំ២០១៤ បារាំងបានបញ្ជូនកងទ័ពចំនួន ៤៥០០នាក់ នៅក្នុងប្រតិបត្តិការ «Barkhane » នៅតំបន់សាហ៊ែល (Sahel) ដែលមានប្រាំប្រទេស គឺម៉ាលី បួរគីណាហ្វាសូ នីហ្សេ ឆាត និង ម៉ូរីតានី។ ប្រទេសទាំង៥នេះ ស្ថិតក្នុងតំបន់មួយ ដែលរងការវាយប្រហារ ពីក្រុមឧទ្ទាមជីហាតភេរវកម្ម។ ក្រុមខ្លះ គឺជាផ្នែករបស់ក្រុមអ៊ីស្លាមអាល់កាយដា និងក្រុមខ្លះទៀត ជាក្រុមអង្គការរដ្ឋអ៊ីស្លាម។
បារាំងត្រូវការឲ្យក្រុមប្រទេសសាហ៊ែល ទទួលស្គាល់ថាចង់ឲ្យបារាំងជួយ
បារាំង បានចាប់ផ្តើមចោទសួរពីបញ្ហានេះ គឺបន្ទាប់ពីមានហេតុការណ៍គ្រោះថ្នាក់ឧត្ថម្ភាគចក្រកងទ័ពបារាំងបុកគ្នាស្លាប់ទាហានបារាំង ចំនួន១៣នាក់នៅប្រទេសម៉ាលីកាលពីថ្ងៃទី២៥វិច្ឆិកា ឆ្នាំ២០១៩។ មតិសាធារណៈបារាំង ចាប់ផ្តើមចោទសួរ ថាតើគួរយកជីវិតទាហានបារាំង ទៅចោលនៅតំបន់សាហ៊ែលនេះដែរ ឬទេ? ហើយថាតើវាមានប្រយោជន៍សម្រាប់បារាំង?
ជំនួបកំពូលនៅទៅក្រុងប៉ូ (Pau) ភាគនិរតីបារាំង អ្វីដែលជាកម្មវត្ថុយ៉ាងច្បាស់ របស់លោកប្រធានាធិបតីបារាំង គឺបារាំង ចង់ឲ្យក្រុមប្រទេសសាហ៊ែលទាំង៥ ប្រកាសឲ្យច្បាស់ ពីគោលជំហរខ្លួន ក្នុងការសុំឲ្យបារាំង បន្តធ្វើអន្តរាគមន៍យោធានៅក្នុងប្រទេសខ្លួនតទៅទៀត។ ពោលគឺមិនមែនបារាំង សម្រេចលើកទ័ពទៅអន្តរាគមន៍ដោយខ្លួនឯងទេ តែគឺប្រទេសទាំង៥នេះ ដែលត្រូវការជំនួយរបស់បារាំង ក្នុងការប្រយុទ្ធប្រឆាំងនឹងក្រុមជីហាតភេរវកម្ម។
បញ្ហាមួយទៀត នោះ គឺនៅតាមប្រទេសតំបន់សាហ៊ែលទាំង៥ គឺប្រជាជនគេ ក៏បានផ្ទុះកំហឹង ទាមទារឲ្យបារាំង និងកងទ័ពបរទេសផ្សេងទៀត ត្រូវដកទ័ពចេញ។ ជាក់ស្តែង នៅម៉ាលី ទីក្រុងបាម៉ាកូ មានប្រជាជនជាច្រើនពាន់នាក់ បានធ្វើបាតុកម្ម កាលពីថ្ងៃអាទិត្យ ទី១២មករា ប្រឆាំងនឹងវត្តមានរបស់កងទ័ពបារាំង។ ដូច្នេះ នៅក្នុងជំនួបកំពូល នៅទីក្រុង ប៉ូ នៅថ្ងៃទី១៣មករានេះ លោកប្រធានាធិបតីបារាំង ត្រូវការចម្លើយឲ្យច្បាស់ ពីមេដឹកនាំប្រទេសទាំង៥នេះ ថាតើ ចង់ឲ្យកងទ័ពបារាំងនៅទៀត ដែរឬទេ?
កងទ័ពបារាំង គ្មានបានការ?
យ៉ាងណាក៏ដោយ បើយើងក្រឡេកមើលស្ថានភាពជាក់ស្តែង យើងឃើញថា ការវាយប្រហាររបស់ក្រុមជីហាតភេរវកម្ម ហាក់មិនបានចុះថយទេ ផ្ទុយទៅវិញគឺមានកាន់តែច្រើន នឹងកាន់តែធ្ងន់ធ្ងរថែមទៀតផង។ ជាក់ស្តែង ការវាយប្រហារ កាលពីថ្ងៃព្រហស្បតិ៍ទី៩មករា នៅបន្ទាយ Chinégodar ក្នុងប្រទេសនីហ្សេ ដែលបានសម្លាប់ទាហាននីហ្សេចំនួនប្រមាណ៨៩នាក់ និងការវាយប្រហារនៅបន្ទាយ Inates កាលពីថ្ងៃទី ២២ធ្នូ ស្លាប់ទាហាននីហ្សេ ចំនួន៧១។ បញ្ហានេះ បានធ្វើឲ្យមានមតិខ្លះយល់ថា កងទ័ពបារាំងគ្មានបានការ គួរតែដកចេញទៅ។
តែសួរត្រលប់ទៅវិញថា ក្នុងកាលៈទេសៈ ដែលក្រុមឧទ្ទាមជីហាតភេរវកម្ម កំពុងតែមានកម្លាំង វាយប្រហារកាន់តែខ្លាំង តើយើងគួរឲ្យបារាំងដកទ័ពចេញដែរ ឬទេ? មានកងទ័ពបារាំងនៅជួយ នៅទប់មិនទាំងចង់បានផង ចុះទំរាំតែអត់ កងទ័ពបារាំង ទៀត?
ប្រមាណសប្តាហ៍មកនេះ នៅតាមប្រទេសសាហ៊ែលទាំង៥ គឺមានភាពស្រពិចស្រពិលខ្លាំង ដោយសារតែមានអ្នកនយោបាយខ្លះ បានបំផុះគំនិតប្រឆាំងនឹងបារាំង ប្រឆាំងនឹងកងទ័ពបារាំង។ តែបើតាមការសង្កេត របស់អ្នកវិភាគ និងមន្ត្រីរដ្ឋាភិបាលបារាំង បានលើកឡើង ថា មេដឹកនាំប្រទេសសាហ៊ែល ទាំង៥ ហាក់បានសម្រេចចិត្តច្បាស់ហើយថា ពួកគេពិតជាមិនចង់ឲ្យបារាំងដកទ័ពចេញពេលនេះទេ។
លោក Mahamoudou Issofou ប្រធានាធិបតីប្រទេសនីហ្សេ ទើបតែបានអះអាងប្រាប់វិទ្យុបារាំង RFI ថា “ប្រទេសតំបន់សាហ៊ែល ត្រូវការជំនួយ ត្រូវការអន្តរាគមន៍ របស់កងទ័ពបារាំងនិងកងទ័ពបរទេស ឲ្យកាន់តែមានប្រសិទ្ធិភាព ដើម្បីអាចកំទេចក្រុមជីហាតភេរវកម្មបាន។ បើគ្មានកងទ័ពបារាំងជួយតាំងតែពីឆ្នាំ២០១៤ទេ ម្លេះ ក្រុមជីហាតភេរវកម្ម គ្រប់គ្រងតំបន់សាហ៊ែលនេះ ទាំងមូលបាត់ទៅហើយ”។
ត្រូវពិនិត្យឡើងវិញ លើយុទ្ធសាស្ត្រប្រយុទ្ធ
កងទ័ពបារាំងអាចនឹងបន្តវត្តមាន ព្រោះថា ប្រទេសតំបន់សាហ៊ែលសំណូមពរ។ តែយ៉ាងណា គេក៏ត្រូវការពិនិត្យឡើងវិញដែរ អំពីយុទ្ធសាស្ត្រប្រយុទ្ធប្រឆាំងនឹងក្រុមភេរកម្មនេះ ឲ្យវាមានប្រសិទ្ធិភាពឡើង។
បើតាមការបញ្ជាក់ពីមន្ត្រីបារាំង គឺគេនឹងនិយាយគ្នា ទាក់ទិននឹងយុទ្ធសាស្ត្រប្រយុទ្ធ ការរាយកម្លាំង នៅតាមតំបន់សំខាន់ៗ ក្នុងតំបន់សាហ៊ែល។ យើងត្រូវដឹងថា តំបន់សាហ៊ែលជាតំបន់ដីវាល ខ្ពង់រាបនិងវាលខ្សាច់ លាតសន្ធឹងធំណាស់។ ទាហានបារាំង ៤៥០០នាក់ មិនអាចការពារបានឡើយ។
ដូច្នេះហើយបានគេត្រូវតែរៀបចំ បង្វឹក និងសហការជាមួយកងទ័ពរបស់ប្រទេសនីមួយ។ តំបន់យុទ្ធសាស្ត្រ ដែលគេបានលើកឡើង ថាគួរតែបង្កើនការប្រុងប្រយ័ត្ន គឺតំបន់ព្រំដែន រវាងបីប្រទេស ប្រសព្វគ្នា។ ជាទូទៅ តំបន់ទាំងនេះ តែងតែរងនូវការវាយប្រហារ របស់ក្រុមជីហាតភេរវកម្ម ដែលវាអាចមកពីទិសទាំង៣។ ការកំណត់ដែនដីយុទ្ធសាស្ត្រ ក្នុងទំហំតូចៗ ក៏វាអាចជួយ ឲ្យមានលទ្ធផលជោគជ័យជាក់ស្តែងដែរ។
បើតាមការគ្រោងទុក លោកម៉ាក្រុងជួបប្រជុំជាមួយមេដឹកនាំប្រទេសសាហ៊ែលទាំង៥ រួចរាល់ហើយ គឺមេដឹកនាំទាំង៦ នឹងជួបប្រជុំទាំងអស់គ្នា ជាមួយនឹងរដ្ឋមន្ត្រីក្រសួងការពារជាតិគ្រប់ប្រទេស ដើម្បីនិយាយពីយុទ្ធសាស្ត្រយោធា។ បារាំងនិងក្រុមប្រទេសសាហ៊ែល ទំនងជាអាចត្រូវរូវគ្នា បន្តអន្តរាគមន៍ចំនួន៦ខែទៀត។ បន្ទាប់មក គេនឹងប្រជុំម្តងទៀត ដើម្បីសម្រេច ថាបារាំងត្រូវដកទ័ពចេញឬយ៉ាងណា។
បារាំងចេញមុខ តែមិនចង់ទទួលខុសត្រូវតែម្នាក់ឯង លើវាសនាតំបន់សាហ៊ែល
បើយើងស្តាប់ប្រសាសន៍លោកម៉ាក្រុង គឺគាត់ មិនចង់ឲ្យតំបន់សាហ៊ែល គិតថា បារាំងលើកទ័ពទៅដោយចិត្តឯង ហើយទៅធ្វើអន្តរាគមន៍តែម្នាក់ឯង ដោយអាងថាខ្លួនជាមហាអំណាច ធ្លាប់ដាក់អាណានិគមនៅទីនោះ។ ជាការពិត បារាំងចេញមុខខ្លាំងជាងគេ តែបារាំងមិនចង់មានតួនាទីតែម្នាក់ឯងទេ។ ហេតុដូច្នេះហើយបានជាតាំងតែពីដំបូង បារាំង បានសុំការសហការជាមួយកងទ័ពមួកខៀវរបស់អង្គការសហប្រជាជាតិ និងពីកងទ័ពអាមេរិក។ តែអ្វីដែលគេបារម្ភពេលនេះ គឺអាមេរិកកំពុងតែចង់ឈប់សហការ។
លោកម៉ាក្រុងក៏បានប្រកាស សុំការសហការពីប្រទេសអឺរ៉ុបផ្សេងទៀត ព្រោះថាស្ថិរភាពតំបន់សាហ៊ែល វាជះឥទ្ធិពលដល់អឺរ៉ុបទាំងមូល។ សម្រាប់ពេលនេះ បារាំងកំពុងតែរៀបចំបង្កើតប្រតិបត្តិការមួយឈ្មោះថា ប្រតិបត្តិការ Tacouba រួមគ្នារវាងប្រទេសអឺរ៉ុបចំនួន១២ ដើម្បីជួយអន្តរាគមន៍នៅសាហ៊ែលនេះ។ ហេតុដូច្នេះហើយ បានជានៅល្ងាចថ្ងៃ១៣មករានេះ ក្រោយជំនួបកំពូលចប់សព្វគ្រប់ លោកម៉ាក្រុង ក៏បានអញ្ជើញ លោកCharles Michel ប្រធានក្រុមប្រឹក្សាអឺរ៉ុប និងលោក Antonio Gutteres អគ្គលេខាធិការអង្គការសហប្រជាជាតិ ចូលរួមពិធីលាងសាយភោគ និងពិភាក្សាគ្នា ស្តីអំពីលទ្ធភាពទាំងអស់ ដើម្បីជួយការពារតំបន់សាហ៊ែលអាហ្វ្រិក កុំឲ្យធ្លាក់ទៅក្នុងដៃ របស់ក្រុមជីហាតភេរវកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ