បារាំងលើកការប្រជុំជាមួយក្រុមប្រទេសសាហ៊ែល ក្រោយការវាយប្រហារ ស្លាប់ទាហាននីហ្សេ៧១នាក់
កាលពីថ្ងៃអង្គារទី១០ធ្នូ មានហេតុការណ៍វាយប្រហារមួយ បង្កឡើងដោយក្រុមឧទ្ទាមភេរវកម្ម ឆ្មក់វាយកងទ័ពប្រទេសនីហ្សេ នៅឯបន្ទាយមួយភាគខាងលិចប្រទេស។ ទាហាននីហ្សេ ស្លាប់ចំនួន៧១នាក់ របួស១២នាក់ និងបាត់ខ្លួនជាច្រើននាក់។ ហេតុការណ៍នេះ បានបង្ខំឲ្យប្រធានាធិបតីប្រទេសនីហ្សេ ស្នើសុំទៅលោកប្រធានាធិបតីបារាំង ឲ្យលើកពេលប្រជុំ ជាមួយមេដឹកនាំប្រទេសតំបន់សាហ៊ែល ដែលបានគ្រោងធ្វើនៅថ្ងៃទី១៦ធ្នូខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ក្រសួងការពារជាតិនីហ្សេ បានឲ្យដឹងថា ហេតុការណ៍វាយប្រហារ កាលពីថ្ងៃអង្គារទី១០ធ្នូ គឺជាការវាយប្រហារទ្រង់ទ្រាយធំ មិនធ្លាប់មាន ដោយក្រុមឧទ្ទាមជីហាតភេរវកម្ម បានឆ្មក់វាយមកលើបន្ទាយរបស់កងទ័ពនីហ្សេ។ ក្រុមជីហាតភេរវកម្ម បានបាញ់ផ្លោងគ្រាប់កាំភ្លើងធំ និងបានបញ្ជារថយន្តបំផ្ទុះគ្រាប់បែកអត្តឃាត ថែមទៀតផង។ ក្នុងហេតុការណ៍នេះ ទាហាននីហ្សេស្លាប់៧១នាក់ របួស១២នាក់ នឹងបាត់ខ្លួនជាច្រើននាក់ទៀត។ កងទ័ពនីហ្សេ ក៏បានសម្លាប់ជនជីហាតភេរវកម្ម បានមួយចំនួនដែរ។
ដោយមានការស្នើសុំពីលោកប្រធានាធិបតីនីហ្សេ លោកម៉ាក្រុងប្រធានាធិបតីបារាំង បានបញ្ជាក់នៅថ្ងៃព្រហស្បតិ៍នេះថា ការណាត់ជួបប្រជុំជាមួយមេដឹកនាំប្រទេសតំបន់សាហ៊ែល ដែលគ្រោងធ្វើនៅថ្ងៃទី១៦ធ្នូ នៅឯទីក្រុងប៉ូ ភាគនីរតីប្រទេសបារាំងនោះ នឹងត្រូវលើកទៅធ្វើនៅដើមឆ្នាំ២០២០វិញ។
សូមរំលឹកថា លោកម៉ាក្រុងបានអញ្ជើញមេដឹកនាំក្រុមប្រទេសសាហ៊ែល ទាំង៥ប្រទេសគឺ ម៉ាលី បួគីណាហ្វាសូ នីហ្សេ ឆាត និងម៉ូរីតានី មកប្រជុំគ្នា ដើម្បីនិយាយអំពីអន្តរាគមន៍របស់កងទ័ពបារាំង នៅតំបន់នោះ។ គួរបញ្ជាក់ថា ក្រោយហេតុការណ៍ធ្លាក់ឧត្ថម្ភាគចក្រ ស្លាប់ទាហានបារាំងចំនួន១៣នាក់នៅប្រទេសម៉ាលី មតិសាធារណៈបារាំង ចាប់ផ្តើមចោទសួរ អំពីថាតើបារាំង គួរបន្តវត្តមានកងទ័ព នៅតំបន់សាហ៊ែលដែរឬទេ។
បើផ្អែកតាមប្រភពពីវិមានអេលីហ្សេ លោកម៉ាក្រុង បានយល់ពីការព្រួយបារម្ភរបស់មតិសាធារណៈ ទើបបានជាលោកកោះប្រជុំជាមួយមេដឹកនាំនៃប្រទេសសាហ៊ែល។ កម្មវត្ថុរបស់លោកម៉ាក្រុង គឺធ្វើយ៉ាងណា ឲ្យប្រទេសទាំង៥នៃតំបន់សាហ៊ែលនេះ ទទួលស្គាល់ជាសាធារណៈថា ខ្លួនត្រូវការវត្តមានរបស់កងទ័ពបារាំង ដើម្បីជួយ ក្នុងការបង្រ្កាបក្រុមជីហាតភេរវកម្ម ដែលកំពុងតែទន្ទ្រានបង្កអស្ថិរភាពនៅតំបន់នោះ។
ប្រភពស្និទនឹងលោកប្រធានាធិបតីបារាំង អះអាងថា លោកម៉ាក្រុង មិនចង់ឲ្យគេគិតថា បារាំងទៅចូលលូកដៃ ដោយអាងថាខ្លួនជាមហាអំណាច ធ្លាប់ដាក់អាណានិគមនោះឡើយ។ បើសិនជាក្រុមប្រទេសសាហ៊ែល មិនទទួលស្គាល់ ថាខ្លួនត្រូវការបារាំងជួយនោះទេ នោះលោកម៉ាក្រុង នឹងពិចារណារឿងដកទាហានបារាំង ទាំងអស់ចេញពីតំបន់នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ