Human Rights Watch៖ប្រធានាធិបតីអេហ្ស៊ីបប្រើឱកាសវិបត្តិកូវីដ-១៩ ដើម្បីពង្រឹង និងពង្រីកអំណាចរបស់ខ្លួន
នៅក្នុងប្រទេសអេហ្ស៊ីប ច្បាប់ស្តីពីស្ថានភាពអាសន្នបានចូលជាធរមានតាំងពីឆ្នាំ ២០១៧មកដល់សព្វថ្ងៃ។ តែច្បាប់មួយនេះត្រូវបានរឹតបន្តឹងបន្ថែមទៀតដើម្បីប្រយុទ្ធប្រឆាំងនឹងការឆ្លងរាលដាលនៃជំងឺកូវីដ-១៩។ នាដំណាច់ខែមេសា សភាបានធ្វើវិសោធនកម្មលើមាត្រាមួយចំនួននៃច្បាប់ដដែលនេះ និងដែលប្រធានាធិបតីលោកអាល់ស៊ីស៊ីទើបបានឲ្យសច្ចាប័ន្រ។ អង្គការសិទ្ធិមនុស្ស Human Rights Watch បានចេញសេចក្តីប្រកាសព័ត៌មានបរិហារលើការធ្វើវិសោធនកម្មច្បាប់ស្តីពីស្ថានភាពអាសន្ន និងបារម្ភថា ទង្វើមួយនេះអនុញ្ញាតឲ្យប្រធានាធិបតីលោកអាល់ស៊ីស៊ីពង្រឹង និងពង្រីកអំណាចរបស់ខ្លួនបន្ថែមទៀត។ លោកអាម៉េដ បេនស៊ឹមស៊ី នាយកផ្នែកទំនាក់ទំនងរបស់ Human Rights Watch ប្រចាំតំបន់មជ្ឈិមបូព៌ា និងអាហ្រ្វិកខាងជើងបានថ្លែងដោយមិនលាក់លៀមថា លោកអាល់ស៊ីស៊ីបានប្រើឱកាសវិបត្តិកូវីដ-១៩ ដើម្បីបង្កើនការបង្រ្កាបលើប្រជាជនអេហ្ស៊ីបថែមមួយកម្រិតទៀត។
ចុះផ្សាយនៅថ្ងៃ៖
ស្តាប់ - ០១:៣៨
« ច្បាប់ដែលបានចូលជាធរមានតាំងពីឆ្នាំ ២០១៧ បានផ្តល់ឲ្យរដ្ឋាភិបាល និងកម្លាំងសន្តិសុខនូវអំណាចក្នុងការចាប់ខ្លួនមនុស្សដោយគ្មានកំណត់ និងសួរចម្លើយជនសង្ស័យគ្រប់រូបដោយគ្មានការត្រួតពិនិត្យពីប្រព័ន្ធតុលាការ។ បន្ទាប់មក ច្បាប់ដដែលនេះក៏បានអនុញ្ញាតឱ្យមានការតាមឃ្លាំមើលមនុស្សក្រោមទ្រង់ទ្រាយធំ មិនឲ្យមានការផ្សព្វផ្សាយ និងអនុញាតឲ្យមានការរឹបអូសទ្រព្យសម្បត្តិ។ ទង្វើទាំងនេះអាចធ្វើបានដោយមិនចាំបាច់មានការត្រួតពិនិត្យ និងការអនុញ្ញាតពីតុលាការឡើយ។
នេះជាអ្វីដែលកំពុងមានស្រាប់ជាមួយនឹងច្បាប់ស្តីពីស្ថានភាពអាសន្នតាំងពីឆ្នាំ ២០១៧ ពោលមុនការផ្ទុះវិបត្តិនៃជំងឺកូវីដ-១៩។ តែនៅថ្ងៃទី២២ មេសាកន្លងទៅថ្មីនេះ សភាបានធ្វើវិសោធនកម្មលើច្បាប់ដដែលមួយនេះដោយបន្ថែមអំណាចថ្មីៗទៀតក្នុងត្រួតពិនិត្យដោយគ្មានការតាមដានពីប្រព័ន្ធតុលាការ។ ឧទាហរណ៍ឥឡូវនេះ ប្រធានាធិបតីលោកអាល់ស៊ីស៊ីអាចសម្រេចបិទសាលារៀនទាំងអស់ បិទទ្វារតុលាការ ហាមមិនឲ្យមានការជួបជុំជាសាធារណៈ ហាមមិនឲ្យរៀបចំក្បួនបាតុកម្ម ហាមមិនឲ្យរៀបចំពិធីផ្សេងៗ រួមទាំងការជួបជុំជាលក្ខណៈឯកជនដែលរឿងខ្លះគ្មានជាប់ពាក់ព័ន្ធនឹងរឿងសុខភាពផង។
និយាយដោយសង្ខេបទៅ លោកអាល់ស៊ីស៊ីបានប្រើឱកាសវិបត្តិកូវីដ-១៩ ដើម្បីបង្កើនការបង្រ្កាបលើប្រជាជនអេហ្ស៊ីបមួយកម្រិតថែមទៀត »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ