អ.ស.ប.បារម្ភថា ដោយសារកូវីដ១៩ ចំនួនអ្នកស្លាប់ដោយជម្ងឺអេដស៍អាចកើនទ្វេដង នៅអាហ្វ្រិកខាងត្បូងសាហារ៉ា
អង្គការសហប្រជាជាតិ បានថ្លែងព្រួយបារម្ភថា ជាមួយនឹងភាពរាំងស្ទះបង្កឡើងដោយជំងឺកូវីដ១៩ ទ្វីបអាហ្រ្វិកតំបន់ខាងត្បូងសាហារ៉ា អាចនឹងត្រូវប្រឈមនឹងការកើនឡើង នូវជំនួនអ្នកស្លាប់ដោយសារជំងឺអេដស៍ មួយទ្វេជាពីរ។ អង្គការសហប្រជាជាតិ បានអំពាវនាវ សុំឲ្យរដ្ឋាភិបាលនៃប្រទេសតំបន់នោះ បន្តយកចិត្តទុកដាក់ផ្សព្វផ្សាយ និងផ្តល់ថ្នាំពន្យាជីវិត ដល់អ្នកជំងឺអេដស៍ មិនត្រូវបោះបង់ចោល ដោយយកលេសរវល់ ក្នុងរឿងកូវីដ១៩នោះទេ។
ចុះផ្សាយនៅថ្ងៃ៖
ស្តាប់ - ០២:៤៧
ចំនួនអ្នកជំងឺអេដស៍ដែលស្លាប់ នៅតំបន់អាហ្វ្រិកខាងត្បូងសាហារ៉ា អាចនឹងកើនឡើងមួយជាពីរ បើសិនជាតំបន់នេះ ត្រូវរាំងស្ទះទាំងស្រុង ដោយសារតែបញ្ហាជំងឺឆ្លងកូវីដ១៩។ អង្គការសហប្រជាជាតិ បានលើកឡើង នៅថ្ងៃចន្ទ ទី១១ឧសភាថា ការរាំងស្ទះដំណើរការរយៈពេល៦ខែ ដូចជាការងារផ្សព្វផ្សាយ ការផ្តល់សេវាកម្មថែទាំសុខភាព ការផ្តល់ថ្នាំពន្យាជីវិត គឺវាអាចធ្វើឲ្យអ្នកជំងឺអេដស៍ ប្រមាណ៥សែននាក់បន្ថែមទៀតស្លាប់ នៅរវាងឆ្នាំ២០២០ និង២០២១នេះ។ ចំនួននេះនឹងទៅបន្ថែមលើចំនួន មនុស្ស៤៧០០០០នាក់ ដែលស្លាប់ដោយជំងឺអេដស៍ ក្នុងតំបន់អាហ្វ្រិកខាងត្បូងសាហារ៉ា នៅក្នុងឆ្នាំ២០១៨។ នេះបើយោងតាមតួលេខចុងក្រោយ របស់អង្គការសុខភាពពិភពលោក និងអង្គការ Onusida។
សូមបញ្ជាក់ថា គិតត្រឹមតួលេខឆ្នាំ២០១៨ តំបន់អាហ្វ្រិកខាងត្បូងសាហារ៉ា មានអ្នកផ្ទុកមេរោគអេដស៍ (HIV-VIH) ចំនួន២៥,៧លាននាក់ ដែលក្នុងនោះ មាន១៦,៤លាននាក់ បានទទួលថ្នាំទប់មេរោគ ឬហៅងាយស្តាប់ថាថ្នាំពន្យាជីវិត (Antirétroviral)។ នៅក្នុងឆ្នាំ២០០៨ តំបន់នេះ មានមនុស្សស្លាប់ដោយជំងឺអេដស៍ប្រមាណ៩៥០០០០នាក់។ ប៉ុន្តែ ប្រមាណ១០ឆ្នាំមកនេះ អង្គការអន្តរជាតិនិងស្ថាប័នរដ្ឋ បានរួមគ្នាធ្វើការបានលទ្ធផលល្អច្រើន។
ប៉ុន្តែ អ្នកជំនាញអង្គការសហប្រជាជាតិបារម្ភថា ភាពរាំងស្ទះបង្កឡើងដោយកូវីដ១៩ គឺវានឹងធ្វើឲ្យខូចដល់ជ័យជំនះការងារ ដែលសម្រេចបានកន្លងមក ក្នុងការប្រយុទ្ធប្រឆាំងនឹងជំងឺអេដស៍។ ការឃោសនាផ្សព្វផ្សាយ ត្រូវអាក់ខាន ការផ្តល់សេវាថែទាំសុខភាព ផ្តល់ថ្នាំជាដើម ។ល។ ក៏ត្រូវអាក់ខាន។
យុទ្ធនាការបង្ការការឆ្លងមេរោគអេដស៍ ពីម្តាយទៅកូន អាចនឹងត្រូវជួបបរាជ័យ ខណៈដែលរវាងឆ្នាំ២០១០ដល់២០១៨ អត្រាឆ្លងពីម្តាយទៅកូន បានថយចុះដល់ទៅ៤៣% ពោលគឺ ចំនួនទារកឆ្លងមេរោគអេដស៍ពីម្តាយ ដែលមាន២៥០០០០នាក់ បានធ្លាក់មកនៅត្រឹម១៤០០០០នាក់។ លទ្ធផលល្អប្រសើរទាំងនេះ អាចនឹងត្រូវរលាយទៅវិញ ដោយសារតែជំងឺកូវីដ១៩។ យោងតាមអ្នកជំនាញ អត្រាឆ្លងមេរោគអេដស៍ពីម្តាយទៅកូន អាចឈានកើនឡើងចំនួន៣៧% នៅប្រទេសម៉ូហ្សំប៊ិក ៧៨%នៅប្រទេសម៉ាឡាវី និង ហ្សំបាប់វ៉េ ឬក៏ ១០៤%នៅអ៊ូហ្កង់ដា។
អង្គការ Onusida បានចេញសេចក្តីប្រកាសមួយ កាលពីថ្ងៃសៅរ៍សប្តាហ៍មុន ដោយបានអំពាវនាវ សូមឲ្យរដ្ឋាភិបាលទាំងអស់ បន្តយកចិត្តទុកដាក់ កុំគិតតែបារម្ភចង់យកឈ្នះលើជំងឺកូវីដ១៩ ហើយបោះបង់ចោលអ្នកជំងឺអេដស៍។ អាជ្ញាធរជំនាញត្រូវតែបន្តការងារ ចាំបាច់ដើម្បីប្រយុទ្ធប្រឆាំងនឹងការឆ្លងរាលដាលជម្ងឺអេដស៍ ព្រមទាំងការពារអាយុជីវិតអ្នកជម្ងឺអេដស៍។
សូមបញ្ជាក់ថា យោងតាមតួលេខរបស់អង្គការ Onusida បច្ចុប្បន្ននេះ មានអ្នកផ្ទុកមេរោគអេដស៍ចំនួន៧៨លាននាក់ នៅទូទាំងពិភពលោក។ ៣៥ឆ្នាំមកនេះ ជម្ងឺអេដស៍ បានសម្លាប់មនុស្ស ប្រមាណ៣៥លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ