អ.ស.ប. អបអរទ្វីបអាហ្វ្រិកដែលមិនរងគ្រោះខ្លាំងដោយកូវីដ១៩ តែអំពាវនាវឲ្យជួយប្រឈមនឹងវិបត្តិសេដ្ឋកិច្ច
ទ្វីបអាហ្វ្រិកមានអ្នកឆ្លងកូវីដ១៩ ប្រមាណជិត៩ម៉ឺននាក់ ដែលក្នុងនោះមានស្លាប់ ប្រមាណ២៥០០នាក់។ នេះគឺជាកម្រិតរងគ្រោះតិចបំផុត បើប្រៀបធៀបទៅនឹងទ្វីបដ៏ទៃ។ អង្គការសហប្រជាជាតិ បានចេញសេចក្តីថ្លែងការណ៍មួយ ដោយបានអបអរចំពោះទ្វីបអាហ្វ្រិក ដែលបានចាត់វិធានការដ៏ក្លាហាន និងទាន់ពេលវេលា ដើម្បីទប់ស្កាត់ ការឆ្លងរាលដាលនូវជំងឺកូវីដ១៩។ តែទន្ទឹមនឹងនេះ អង្គការសហប្រជាជាតិ បានអំពាវនាវ ឲ្យសហគមអន្តរជាតិ ត្រូវតែរួមគ្នាជួយទ្វីបអាហ្វ្រិកជាបន្ទាន់ ព្រោះមនុស្សរាប់សិបលាននាក់ អាចធ្លាក់ទៅក្នុងភាពក្រីក្របំផុត ដោយសារតែវិបត្តិសេដ្ឋកិច្ច បង្កឡើងដោយជម្ងឺកូវីដ១៩ នៅទូទាំងពិភពលោក។
ចុះផ្សាយនៅថ្ងៃ៖
ស្តាប់ - ០២:២២
លោកអគ្គលេខាធិការនៃអង្គការសហប្រជាជាតិ បានលើកឡើង នៅក្នុងសេចក្តីថ្លែងការណ៍ ដោយបានអបអរសរសើរបណ្តាប្រទេសនៅទ្វីបអាហ្វ្រិក ដែលបានចាត់វិធានការបានរហ័ស ប្រកបដោយភាពក្លាហាន ក្នុងការប្រយុទ្ធប្រឆាំងនឹងជម្ងឺឆ្លងកូវីដ១៩។ ជាលទ្ធផល គិតមកត្រឹមពេលនេះ ចំនួនអ្នកឆ្លងនិងអ្នកស្លាប់ ដោយកូវីដ១៩នៅអាហ្រ្វិក គឺមានទំហំតិចជាងអ្វីដែលអ្នកជំនាញបានបារម្ភ។
យ៉ាងណាមិញ នៅក្នុងបទសម្ភាសន៍ផ្តល់ឲ្យវិទ្យុបារាំងអន្តរជាតិ នៅថ្ងៃពុធទី២០ឧសភានេះ លោកអង់តូនីញ៉ូ ហ្គូតតេរ៉េស បានលើកឡើងថា ប្រទេសអភិវឌ្ឍន៍ខ្លះ គួរយកគម្រូបទពិសោធន៍របស់ប្រទេសទ្វីបអាហ្វ្រិក ក្នុងការប្រយុទ្ធនឹងការឆ្លងរាលដាល។ ប្រឈមនឹងកូវីដ១៩ ប្រទេសអាហ្វ្រិកក្រីក្រមែន តែមានភាពក្លាហាន ហើយចាត់វិធានការបានរហ័ស ជាងប្រទេសអ្នកមានខ្លះ ដែលយឺតយ៉ាវ ហើយភាពយឺតយ៉ាវនេះ បានធ្វើឲ្យមានមនុស្សឆ្លង និងស្លាប់កាន់តែច្រើន។
តែទោះជាយ៉ាងនេះក្តី លោកអគ្គលេខាធិការអង្គការសហប្រជាជាតិ បានអំពាវនាវ ឲ្យសហគមអន្តរជាតិ ត្រូវរួមគ្នាជួយទ្វីបអាហ្វ្រិក ព្រោះថាទ្វីបនេះ នឹងក្លាយជាអ្នករងគ្រោះធ្ងន់ធ្ងរបំផុត ដោយវិបត្តិទាំងឡាយ ដែលរងឥទ្ធិពលពីវិបត្តិជម្ងឺកូវីដ១៩។ មនុស្សរាប់សិបលាននាក់នៅទ្វីបអាហ្វ្រិក អាចធ្លាក់ទៅក្នុងភាពក្រីក្រតោកយ៉ាងបំផុត ដោយសារវិបត្តិសេដ្ឋកិច្ចសកល។
ភាពក្រីក្រដែលមានស្រាប់ ជង្ងឺឆ្លងផ្សេងៗ គ្រោះទុរភិក្ខខ្វះស្បៀងអាហារ គ្មានសេវាសុខភាព ទាំងអស់នេះ កំពុងតែគម្រាមទ្វីបអាហ្វ្រិកទាំងមូល។ អង្គការសហប្រជាជាតិ បានអំពាវនាវ ឲ្យគ្រប់គ្នា ត្រូវបន្តការប្រឹងប្រែង ជួយទ្វីបអាហ្វ្រិក ក្នុងវិស័យសុខាភិបាល វិស័យអបរំ ព្រមទាំងការពារសហគ្រាស និងវិស័យការងារនៅអាហ្វ្រិក ធ្វើយ៉ាងណាកុំឲ្យប្រជាជនអាហ្វ្រិកបាត់បង់ចំណូល និងបន្តការពារបណ្តាញផ្គត់ផ្គង់ស្បៀងអាហារ។
លោកអគ្គលេខាធិការអង្គការសហប្រជាជាតិ បានអះអាងថា ផែនការ ព្យួរមិនយកកាប្រាក់ ពីប្រទេសអាហ្វ្រិក ដែលក្រុមប្រទេសG20 បានសម្រេចកាលពីពាក់កណ្តាលខែមេសា គឺវានៅមិនទាន់គ្រប់គ្រាន់ទេ។ លោកបានអំពាវនាវ ថាត្រូវតែ លប់ចោលបំណុល ពីប្រទេសអាហ្វ្រិកខ្លះ ព្រមទាំងរៀបចំធ្វើយុទ្ធសាស្ត្ររួម សម្រាប់សេដ្ឋកិច្ចអាហ្វ្រិក ធ្វើយ៉ាងណាកុំឲ្យធ្លាក់ទៅក្នុងវិបត្តិហិរញ្ញវត្ថុ និងក្ស័យធន់។ លោកអង់តូនីញ៉ូ ហ្គូតេរ៉េស បានលើកឡើងទៀតថា ទ្វីបអាហ្វ្រិក ត្រូវការជំនួយបន្ទាន់ គិតជាប្រាក់ប្រមាណ២០០ពាន់លានដុល្លារបន្ថែមទៀត ដើម្បីអាចមានលទ្ធភាពដោះស្រាយវិបត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ