ប្រជាពលរដ្ឋស៊ីមបាវ៉េ ៦០% ត្រូវការជំនួយស្បៀងអាហារ នៅឆ្នាំ២០២០
ប្រជាពលរដ្ឋ រស់នៅក្នុងប្រទេស ស៊ីមបាវ៉េ ចំនួនប្រមាណ៦០% ត្រូវធ្លាក់ក្នុងស្ថានភាពអសន្តិសុខចំណីអាហារ ពីពេលនេះដល់ដំណាច់ឆ្នាំ២០២០។ ពោលគឺដោយហេតុតែវិបត្តិអាកាសធាតុរាំងស្ងួតផង វិបត្តិសេដ្ឋកិច្ចដើរថយក្រោយផង បូកនឹងវិបត្តិកូវីដ១៩មួយ ពលរដ្ឋស៊ីមបាវ៉េ ជាង៨លាន៦នាក់ ត្រូវការជំនួយជាស្បៀងអាហារ។ នេះបើតាមការព្រមានរបស់អង្គការកម្មវិធីស្បៀងអាហារពិភពលោក (PAM)។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ពីពេលនេះដល់ចុងឆ្នាំ២០២០ ចំនួនប្រជាពលរដ្ឋរងគ្រោះគ្មានស្បៀងអាហារគ្រប់គ្រាន់ នឹងកើនឡើងដល់៨លាន៦សែននាក់ នៅប្រទេសស៊ីមបាវ៉េឬស្មើនឹងជាងពាក់កណ្តាលប្រទេស (៦០%)។ នេះបើតាមការព្យាករណ៍របស់អង្គការកម្មវិធីស្បៀងអាហារពិភពលោក ចេញផ្សាយនៅថ្ងៃព្រហស្បតិ៍ទី ៣០កក្កដា ២០២០ ជាមួយនឹងការអំពាវនាវស្វែករកមូលនិធិ ចំនួន ២៥០លានដុល្លារ បន្ថែមសម្រាប់យកទៅជួយជនរងគ្រោះទាំងនោះ។
កម្មវិធីស្បៀងអាហារពិភពលោកបានលម្អិតទៀតថា វិធានការបិទខ្ទប់ប្រទេសដើម្បីទប់ស្កាត់ការរីករាតត្បាតនៃជំងឺកូវីដ១៩ បានរុញច្រានពលរដ្ឋរស់នៅទីក្រុង និងទីប្រជុំជន ជាច្រើននាក់ឱ្យធ្លាក់ក្នុងភាពអត់ការងារធ្វើ។ ឯចំណែកពលរដ្ឋរស់នៅតាមទីជនបទត្រូវធ្លាក់ក្នុងគ្រោះទុរ្ភិក្ស កាន់ច្រើន ដោយហេតុតែអ្នកធ្វើចំណាកស្រុកទៅរកការងារធ្វើនៅក្រុងត្រូវបង្ខំចិត្តវិលមកស្រុកកំណើតវិញ ទាំងបាតដៃទទេ។
បើតាមភ្នាក់ងារអង្គការសហប្រជាជាតិនេះដដែល បីភាគបួននៃប្រជាជនស៊ីមបាវ៉េ ជាកសិករ ជាអ្នកដាំដុះធញ្ញជាតិជាស្បៀងអាហារប្រចាំជីវិត ប៉ុន្តែដោយបញ្ហាអាកាសធាតុ ប្រទេសធ្លាក់ក្នុងភាពរាំងស្ងួតខ្លាំងបីរដូវជាប់ៗគ្នា ទិន្នផលកសិកម្មឆ្នាំ២០២០ទាបខ្លាំង ប្រមូលមិនបានពាក់កណ្តាលនៃទិន្នផលកាលពីឆ្នាំកន្លងទៅផង។
ជាមួយនឹងអតិផរណាខ្លាំងហួសហេតុ តម្លៃនៃស្បៀងអាហារជាមូលដ្ឋានបានឡើងថ្លៃកប់ពពកលើសកំរិតជីវភាពមធ្យមរបស់ប្រជាពលរដ្ឋហ្ស៊ីមបាវ៉េជាទូទៅទៀត។ កាលពីខែមុន តម្លៃគ្រាប់ពោតបានឡើងថ្លៃមួយគុណជាពីរ។ ស៊ីមបាវ៉េមានវិបត្តិសេដ្ឋកិច្ចរ៉ាំរ៉ៃតាំងពីជាង២០ឆ្នាំមកហើយ និងជួបគ្រោះខ្វះខាតផលិតផលបឋមជាច្រើនមុខ។ ស្ថានភាពកាន់តែធ្លាក់ដុនដាបខ្លាំងបន្ថែម ដោយហេតុភាពរាំងស្ងួតជាច្រើនឆ្នាំជាប់ៗគ្នា ហើយឥលូវត្រូវមកជួបវិបត្តិកូវីដ១៩មួយទៀត។ គិតមកទល់ថ្ងៃនេះ ស៊ីមបាវ៉េមានករណីវិជ្ជមានកូវីដ១៩ចំនួន ២៨០០នាក់ ក្នុងនោះ៤១នាក់បានស្លាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ