មនុស្ស៨នាក់ក្នុងនោះជនជាតិបារាំង៦នាក់ ត្រូវបានក្រុមភេរវកម្មសម្លាប់នៅប្រទេសនីហ្សេ
មានមនុស្ស៨នាក់ ក្នុងនោះជនជាតិបារាំង៦នាក់ ត្រូវបានក្រុមភេរវកម្មសម្លាប់ នៅភាគនិរតីប្រទេសនីហ្សេ កាលពីថ្ងៃអាទិត្យ ទី៩សីហា។ ជនជាតិបារាំងទាំង៦នាក់ ដែលស្លាប់ គឺជាបុគ្គលិករបស់អង្គការក្រៅរដ្ឋភិបាលមួយ ដែលបំពេញបេសកកម្មនៅប្រទេសនីហ្សេ។ នេះគឺជាការវាយប្រហារ ដោយក្រុមភេរវកម្ម លើកទីមួយនៅតំបន់នេះ ដែលគេស្គាល់ថា ជាតំបន់ទេសចរណ៍អភិរក្ស ពូជសត្វកវែងដ៏កម្រមួយប្រភេទ។
ចុះផ្សាយនៅថ្ងៃ៖
ស្តាប់ - ០១:៥៦
ជនជាតិបារាំង៦នាក់ រួមជាមួយមគុទេសន៍ ទេសចរណ៍ម្នាក់ និងអ្នកបើកឡានម្នាក់ជាជនជាតិនីហ្សេ ត្រូវបានក្រុមភេរវកម្ម សម្លាប់នៅក្នុងពេលពួកគេ កំពុងធ្វើដំណើរនៅតំបន់ Kouré ភាគនិរតីប្រទេសនីហ្សេ។ ជនជាតិបារាំងទាំង៦នាក់ គឺជាបុគ្គលិករបស់អង្គការ Acted ដែលបំរើការងារក្នុងប្រទេសនីហ្សេ។ នេះបើផ្អែកតាមការអះអាង របស់លោកមេធាវីអង្គការនេះ។
ហេតុការណ៍នេះ បានកើតឡើងនៅថ្ងៃអាទិត្យទី៩សីហា ក្នុងពេលដែលជនរងគ្រោះ កំពុងស្ថិតនៅតំបន់អភិរក្សសត្វកវែងដ៏កម្រមួយប្រភេទ។ ទាហានបារាំង និងទាហាននីហ្សេ បានបើកប្រតិបតិ្តការ ការពារសន្តិសុខនៅកន្លែងកើតហេតុ។ យោងតាមព័ត៌មានបឋម ក្រុមឃាតករគឺជាក្រុមភេរវកម្ម ដែលបានជិះម៉ូតូ កាត់ព្រៃ សំងំស្ទាក់បាញ់សម្លាប់ជនបរទេស ដែលចូលមកតំបន់នេះ។ ក្នុងចំណោមអ្នកស្លាប់ទាំង៨នាក់ ៧នាក់គឺស្លាប់ដោយគ្រាប់ភ្លើង។ ស្ត្រីជនជាតិបារាំងម្នាក់ បានរត់គេចខ្លួន ប៉ុន្តែត្រូវបានពួកឃាតករ តាមស្ទាក់បាន និងបានអារកសម្លាប់។
លោកម៉ាក្រុង ប្រធានាធិបតីបារាំង បានថ្លែងសារថ្កោលទោស ចំពោះទង្វើយង់ឃ្នងព្រៃផ្សៃនេះ និងបានប្តេជ្ញា សហការជាមួយប្រទេសអាហ្វ្រិកតំបន់សាហ៊ែល ធ្វើយ៉ាងណា បោសសំអាតក្រុមភេរវកម្មឲ្យខាងតែបាន។ ដូចគ្នាដែរ លោក ប្រធានាធិបតីនីហ្សេ និងលោកប្រធានាធិបតីម៉ាលី បានថ្លែងសារ ថ្កោលទោសកម្មភាពព្រៃផ្សៃនេះ និងបានលើកឡើងអំពីសារៈសំខាន់ ក្នុងការប្រយុទ្ធប្រឆាំងនឹងក្រុមភេរវកម្មអ៊ីស្លាម ជ្រុលនិយមនៅតំបន់សាហ៊ែល។
គួរកត់សំគាល់ថា នេះជាលើកទីមួយហើយ ដែលមានករណី វាយប្រហារដោយក្រុមភេរវកម្ម នៅតំបន់Kouré ភាគនិរតីប្រទេសនីហ្សេ។ តំបន់នេះ ត្រូវបានគេស្គាល់ថា គឺជាតំបន់អភិរក្ស ព្រោះជាជម្រកសត្វកវែងដ៏កម្រមួយប្រភេទេ។ បើផ្អែកតាមមន្ត្រីអង្គការក្រៅរដ្ឋាភិបាលមួយចំនួន បានអះអាងថា តំបន់នេះ កន្លងមក មិនត្រូវបានគេចាត់ទុកថាជាតំបន់គ្រោះថ្នាក់ទេ។ បុគ្គលិកអង្គការ ឬមន្ត្រីទូតបរទេស តែងតែមានទំលាប់ទៅលេងនៅតំបន់នេះ នៅចុងសប្តាហ៍ ព្រោះវាស្ថិតនៅចំងាយតែប្រមាណ៦០គីឡូម៉ែត្រ ពីរដ្ឋធានី Niamey៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ