ក្តីសង្ឃឹមថ្មី ក្រោយភាគីលីប៊ីទាំង២ ប្រកាសទំលាក់អាវុធបណ្តោះអាសន្ន និងសន្យារៀបចំការបោះឆ្នោត
នៅថ្ងៃទី២២សីហា ភាគីជម្លោះនយោបាយទាំង២នៅលីប៊ី បានចេញលិខិតប្រកាស ដាច់ដោយឡែកពីគ្នា ដោយបានសម្រេចទំលាក់អាវុធ ឈប់បាញ់ជាបណ្តោះអាសន្ន និងបានសន្យាថានឹងរៀបចំការបោះឆ្នោត នៅរវាងខែមីនាខាងមុខ។ នេះគឺជាដំណឹងដ៏ល្អមួយ ធ្វើឲ្យសហគមអន្តរជាតិ មានការត្រេកអរ។ បើទោះបីជាវាមិនមានលក្ខណៈអចិន្ត្រៃយ៍ក្តី តែការយល់ព្រមទំលាក់អាវុធនេះ វាគឺជាការបោះជំហានទៅមុខ ដើម្បីចរចា និងកសាងសន្តិភាព នៅលីប៊ី។
ចុះផ្សាយនៅថ្ងៃ៖
ស្តាប់ - ០២:១៦
លោក Fayez al-Sarraj ប្រមុខរដ្ឋាភិបាលបង្រួបបង្រួមជាតិលីប៊ី ដែលគ្រប់គ្រងភាគខាងលិច បានបញ្ជាឲ្យទំលាក់អាវុធជាបន្ទាន់ និងបានប្រកាសអំពីការរៀបចំបោះឆ្នោតប្រធានាធិបតី និងបោះឆ្នោតសភា នៅខែមីនាឆ្នាំក្រោយ។
នៅក្នុងសេចក្តីប្រកាសមួយទៀត លោក Aguila Saleh ប្រធានសភានៅភាគខាងកើតលីប៊ី បានប្រកាសដែរ អំពីបំណងចង់រៀបចំការបោះឆ្នោត តែដោយមិនបានបញ្ជាក់ថាពេលណាទេ។ ក្រុមភាគខាងកើត បានអំពាវនាវឲ្យទំលាប់អាវុធ ផ្អាកឈប់បាញ់ នៅទូទាំងប្រទេសលីប៊ី។
យោងតាមលិខិតប្រកាស របស់ភាគីទាំង២ ការទំលាក់អាវុធ ក៏គឺដើម្បីអនុញ្ញាតឲ្យ សកម្មភាពផលិតនឹងចម្រាញ់ប្រេងកាត អាចចាប់ផ្តើមដំណើរការឡើងវិញ។ តែជាការចម្លែក ដែលនៅក្នុងលិខិតប្រកាស របស់ក្រុមភាគខាងកើតនេះ គេមិនឃើញហត្ថលេខារបស់លោកមេបញ្ជាការ Haftar ទេ។ យោងតាមការវិភាគខ្លះ ក្រុមភាគខាងកើត ប្រហែលជាបានបោះបង់ចោលការគាំទ្រ លើលោកមេបញ្ជាការ Haftar ដែលមានទំនោររឹងទទឹងជ្រុល ក្នុងចេតនាធ្វើសង្រ្គាម មិនព្រមចរចា ជាមួយក្រុមភាគខាងលិច។
យ៉ាងណាក៏ដោយ ដំណឹងនៃការប្រកាសទំលាក់អាវុធបណ្តោះអាសន្ន ព្រមទាំងចេតនារៀបចំការបោះឆ្នោត ពីសំណាក់ភាគីជម្លោះនយោបាយទាំង២នេះ បានបង្កឲ្យការត្រេកអរ នឹងក្តីសង្ឃឹមជាច្រើន។ អេហ្ស៊ីបដែលកន្លងមក គាំទ្រក្រុមខាងកើត នឹងធ្លាប់បានអះអាងថាចង់នបញ្ជូនទ័ពចូលអន្តរាគមន៍នោះ បានសម្តែងការត្រេកអរចំពោះដំណឹងថ្មីនេះ។
ដូចគ្នាដែរ លោក Josep Borrell ប្រមុខការទូតសហភាពអឺរ៉ុប បានលើកឡើងថា នេះគឺជាការបោះជំហានទៅមុខ ដ៏សំខាន់ ដើម្បីស្វែងរកការចរចាដោយសន្តិវិធី ដើម្បីបញ្ចប់សង្រ្គាមជារៀងដរាបនៅលីប៊ី។ លោកប្រមុខការទូតអឺរ៉ុប បានបន្ថែមថា សហភាពអឺរ៉ុប គាំទ្រឲ្យមានការទំលាក់អាវុធ ជាអចិន្ត្រៃយ៍ ដែលនេះមានន័យថា ត្រូវតែបញ្ឈប់ឲ្យអស់ នូវការប្រយុទ្ធ និងការចល័តទ័ព។ ហើយក្រុមកម្លាំងប្រយុទ្ធ ដែលប្រទេសមួយចំនួនបញ្ជូនមកជួយបក្សម្ខាងៗ គឺត្រូវតែដកចេញពីលីប៊ីឲ្យអស់ ដើម្បីបើកផ្លូវឲ្យមានវត្តមានរបស់កងរក្សសន្តិភាព នៃអង្គការសហប្រជាជាតិ។ យ៉ាងណាមិញ ក្រុមប្រទេសសម្ព័ន្ធអារ៉ាប់ ក៏បានស្រុះស្រួលគ្នា អំពាវនាវថា ត្រូវតែមាន « កិច្ចព្រមព្រៀងរួម » មួយ ដែលនឹងបិទបញ្ចប់ វត្តមានរបស់កងកម្លាំងបរទេស នៅលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ