អង្គការសុខភាពពិភពលោកចង់ឲ្យមានការធ្វើតេស្តកូវីដលឿនឲ្យបានចំនួន ១២០លានសំរាប់រដ្ឋក្រីក្រ
ខណៈដែលជំងឺរាតត្បាតកូវីដនៅតែបន្តវាយប្រហារប្រទេសជាច្រើននៅទូទាំងពិភពលោក មិនថាប្រទេសអ្នកមាន ប្រទេសក្រីក្រក្តី អង្គការសុខភាពពិភពលោក បានប្រកាសពីបំណង ចង់ឲ្យមានការធ្វើតេស្តកូវីដយ៉ាងរហ័សឲ្យបានចំនួន ១២០ លានសំរាប់រដ្ឋក្រីក្រ។ កាលពីថ្ងៃចន្ទ ២៨ កញ្ញាម្សិលមិញ អង្គការសុខភាពពិភពលោកបាននិយាយថា ការធ្វើតេស្តយ៉ាងលឿនចំនួនប្រមាណ ១២០ លាននឹងត្រូវផ្គត់ផ្គង់ទៅឲ្យបណ្តាប្រទេសក្រីក្រ ក្នុងតម្លៃម្នាក់៥ ដុល្លារ ប្រសិនបើអង្គការអាចស្វែងរកថវិកាទ្រទ្រង់បានគ្រប់គ្រាន់។
ចុះផ្សាយនៅថ្ងៃ៖
អង្គការសុខភាពពិភពលោក បានប្រកាសឲ្យដឹងថា ថវិកាទ្រទ្រង់ គឺជាគម្រោងថវិកាចំនួន ៦០០ លានដុល្លារ ដែលនឹងអាចជួយដល់បណ្តាប្រទេសមានប្រាក់ចំណូលទាប និងមធ្យម ឲ្យអាចកាត់បន្ថយគម្លាតជាមួយប្រទេសអ្នកមាន ក្នុងការធ្វើតេស្តរកជំងឺកូវីដ។ ជំងឺកូវីដដែលបានសម្លាប់មនុស្សជាងមួយលាននាក់ ចាប់តាំងពីផ្ទុះឡើងដំបូងនៅក្នុងទីក្រុងវូហាន ប្រទេសចិនកាលពីខែធ្នូ ឆ្នាំ២០១៩មក។
ការធ្វើតេស្តលឿនរហ័ស នឹងត្រូវផ្គត់ផ្គង់នៅទូទាំង ១៣៣ ប្រទេសក្រក្រី ក្នុងរយៈពេល ៦ ខែខាងមុខ គឺមិនគួរឲ្យទុកចិត្តដូចការធ្វើតេស្តតាមច្រមុះ (PCR តេស្ត) នោះទេ ប៉ុន្តែវាលឿនជាង មានតម្លៃធូរថ្លៃ និងងាយស្រួលអនុវត្តជាង។
ប្រធានអង្គការសុខភាពពិភពលោកតេដ្រូស (Tedros Adhanom Ghebreyesu) បានថ្លែងក្នុងសន្និសីទសារព័ត៌មានមួយថា “យើងមានកិច្ចព្រមព្រៀង យើងប្រឹងប្រែងប្រមូលមូលនិធិ ហើយឥឡូវនេះយើងត្រូវការថវិកាឲ្យបានគ្រប់ចំនួន ដើម្បីទិញសម្ភារៈធ្វើតេស្តទាំងនោះ (RDTតេស្ត)”។
លោកប្រធានអង្គការសុខភាពពិភពលោករូបនេះបានបន្ថែមទៀតថា ការធ្វើតេស្តលឿនចំនួនប្រមាណ ១២០ លានតេស្តនឹងត្រូវផ្គត់ផ្គង់ដល់ប្រទេសដែលមានប្រាក់ចំណូលទាបនិងមធ្យម។ “ការធ្វើតេស្តនេះ ផ្តល់នូវលទ្ធផលគួរឲ្យទុកចិត្តក្នុងរយៈពេលប្រហែលជា ១៥ ទៅ ៣០ នាទី ជាជាងរយៈពេលច្រើនម៉ោង ឬច្រើនថ្ងៃ ក្នុងតម្លៃទាបជាមួយនឹងឧបករណ៍ដែលមិនសូវទំនើបខ្លាំងដូចការធ្វើតេស្ត PCRឡើយ។
យ៉ាងណាក៏ដោយ អង្គការសុខភាពពិភពលោកបាននិយាយថា ការធ្វើតេស្តនេះនឹងជួយបង្កើនចំនួនធ្វើតេស្តរកជំងឺកូវីដនៅក្នុងតំបន់ដែលពិបាកទៅដល់និងដែលមិនមានមន្ទីរពិសោធន៍ ឬបុគ្គលិកសុខាភិបាល ដែលបានទទួលការបណ្តុះបណ្តាលគ្រប់គ្រាន់ដើម្បីធ្វើតេស្ត PCR៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ